TSINGANU 9
9
Vusitsa nende Vuyiingwa
1Vusitsa vumali khumbakha inzu yeye;
inzu yi tsirilu saba.
2Vumali khuhaana lilako muruku khusinzwa shichila mulukha,
nu kutsukani ni tsipilapili mu idivai,
nu khwala imesa.
3Umali khuruma varumishi veve vi shikhana khutsia,
khulaanjilila khurula ha vutoonje hi tsinzu mu litaala likali:
4“Munyi vandu vayiingwa, yinjili munu!”
Vuvoolelanga mundu muyiingwa:
5“Hamba, ulii shiukhulia shianje
nung'wa idivai yamali khutsukanyinya.
6Lekhana nu vuyiingwa, utsililile khuva mwoyo;
wenyelitsi makhuva khulondokhana khu limanya.”
7Mundu uchelihitsanga mundu wi shihenye henye anyekwangwa;
woyo ukondeshelanga mundu mutamanu aliitsa khwisalilitsa mwene.
8Uvuli khuchelihitsakhu mundu wi shihenye henye,
inoho alakhwambakhana;
navutswa niiva ulachelihitsa mundu uli nu vusitsa,
alakhuyaanza.
9Shia shindu shiosi shiuvoolela mundu uli nu vusitsa shilachila ave nu vusitsa.
Shia shindu shiosi shiuvoolela mundu wi likhola liu vulunji
shilatsililila khuva nu vucheli vunyishi.
10Khuha Mwami Nyasaye luyali nalio liraanga liu khuva nu vusitsa,
khandi khumanya woyo uli Mutakatifu nakhwo khunyola vucheli.
11Vusitsa vuliitsa khukhukhola khuhindila,
nu khumeetwa mihika chindi khu vulamu vwovwo.
12Niiva uli nu vusitsa, vusitsa vwovwo vulakhuha vukhala;
niiva uli mundu wayaanza khuchayilila, uliitsa khunyakhana yivi mwene.
13Mukhali muyiingwa washila liyooko,
wakorwa shia shindu shiosi khandi avula tsisoni.
14Yikhalanga ha muliango kwi inzu yeye
inoho khu shisoko ha vutoonje hene wi litaala likali,
15nalaanga vandu vavetsanga nivaviraho,
vandu vakholanga mihinzilu chiavo vene:
16“Munyi vandu vayiingwa, hambi hanu!”
Avoolelanga mundu musilo,
17“Matsi ka wahuuva ni malahi.
Mukati kwa walia muvwivisi kwanuula!”
18Navutswa khali vwakorwa khumanyikhu,
ndi mivili chia vakhutsa chiliho,
khali ndi vacheni veve vali mu shihatisi.
Currently Selected:
TSINGANU 9: LLLPRO
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013