TSINGANU 28
28
1Vandu vatamanu vilukhanga vuchila mundu khuvahitsanyinya,
navutswa vandu vi likhola liu vulunji vali ni ikholo khuli isimba.
2Lwa shivala shiranganga shileeche shia mahingani
shili na vamihi vanyishi,
navutswa mwamihi uli nu vucheli naliho,
shivala shili mu vulindi vulahi.
3Mwamihi utambitsanga vamanani
ali khuli imbula inyililanga niyononyinya viraakwa.
4Vandu vivilila khulonda malako vitsominyanga vandu vatamanu,
navutswa yavo valondanga malako vahingananga navo.
5Vandu vatamanu shivamanyi shindu shiosi shichila katoto tawe,
navutswa yavo vasaalanga khu Mwami Nyasaye vakamanya vulahi.
6Nu vulahi khuva mumanani nu khumenya mu vusuuvilwa,
khuvira khumenya limenya liu vukoyanu khali niiva uli muhinda.
7Yavo valondanga malako vali khuli vaana vu vusitsa,
navutswa valina va vanyeseli valerelanga vivuli vavo tsisoni.
8Mundu wimeetelanga vukhala khu ave muhida aliitsa khukoritsa;
avunjishitsilanga wundi ulolelanga tsimbavasi vamanani.
9Niiva mundu anyala khwambakhana khuhulishitsa malako,
khali lisaala lielie liasiinya Nyasaye.
10Mundu uchilanga mundu mulahi nakhola vindu vitamanu,
aliitsa khukwa mu vwina vwevwe mwene.
Navutswa vandu vavula vutamanu valiitsa khunyola vindu vilahi.
11Mundu muhinda yivukulanga mwene khuva nu vusitsa,
navutswa mumanani uli ni limanya wamumanya vulahi.
12Lwa vandu valahi vanyolanga vwimilili, shia mundu wosi asangalanga,
navutswa lwa vandu vatamanu vamihanga vandu vivisanga.
13Mundu uvisanga vwoni vwevwe aliitsa khuvula khuva muhinda;
navutswa woyo wiyamanga nu khwivilila aliitsa khuvelwa tsimbavasi.
14Ali ni ikhaavi mundu uheetsanga Mwami Nyasaye luyali;
navutswa woyo uli nu murwi mukali aliitsa khukwa mu matiinyu.
15Mwamihi mutamanu aliitsa khwamiha vamanani,
khuli isimba ihumahumanga inoho khuli likunyuli liseeranga inyama yindi.
16Mwamihi uvula limanya neye mutambitsi mululu muno;
navutswa woyo wambakhananga vukhala vu vuvehi aliitsa khuhindila.
17Mundu unyoleshe nu vutamanu vu khwiira wundi,
alatsililila khuva mukimbitsi khutukha khu likhutsa lielie;
mundu akhachelitsakhu khumulinda tawe.
18Mundu wi limenya lilahi aliitsa khurulitswa mu matiinyu;
navutswa mundu mukaati aliitsa khukwa mu vwina ativitswi.
19Mundu ulimanga mulimi kwekwe alanyola shiukhulia shinyishi;
navutswa woyo umalilanga vwiyangu vwevwe aliitsa khuva mumanani.
20Mundu musuuvilwa alanyola tsikhaavi mu vunyishi,
navutswa woyo wilukhachilanga khuva muhinda aliitsa khusalilitswa.
21Nu vutamanu khwihonela vandi;
navutswa shitonye shiu mukati shichilanga mundu akhola vindu vitamanu.
22Mundu wakwa mu vutiinyu yilukhachilanga vwangu khunyola miandu,
khali wakorwa khumanya ndi vumanani vumulindililanga.
23Mundu uchelihitsanga wundi naye utsililila khukholelwa malahi,
khuvira woyo ukaatanga vandi na makhuva malahi.
24Mundu uhuuvilanga vivuli veve navoola,
“Vwoni vuvulakhuho mu kakholi,”
akholanga shikholwa shilala shiele nu mutivitsi.
25Mundu mwilili achilanga vutiinyu vuvaho,
navutswa woyo wasuuvilila mu Mwami Nyasaye alava muhinda.
26Mundu ulondanga tsinganakani tsietsie mwene nu muyiingwa;
woyo wumenyanga shichila vusitsa alava mu vulindi vulahi.
27Mundu wirulitsanga khukhonya vamanani aliitsa khuvula khucheheelwa;
navutswa woyo wambakhananga khuvaheendelakhu mwoyo alanyola shilaamo.
28Lwa vandu vatamanu vamihanga vandu vivisanga,
navutswa lwa vativitswangwa, vandu vi likhola liu vulunji vameetekhanga.
Currently Selected:
TSINGANU 28: LLLPRO
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013