TSINGANU 29
29
1Niiva ulatsililila khuva muhaaka shia khase khosi
lwa uchelihitswangwa,
litukhu lilala uliitsa khutivitswa, ulivula khuhona.
2Lwa mundu wi likhola liu vulunji yamihanga, vandu vali nu vuyaanzi;
navutswa lwa mundu mutamanu yamihanga, vandu valilanga tsikhwili.
3Mwana wayaanza vusitsa achilanga tata wewe asangala,
navutswa mundu uchendanga na vakhali valaaya
amalanga miandu chiechie.
4Lwa mwami aheendelanga katoto mwoyo, shivala shili ni tsingulu,
navutswa niiva ahuchililanga khuheelwa asoya, alativitsa shivala shieshie.
5Mundu wurumishilanga vupele khu mureende wewe,
yilombelanga mureeko kukhukwamu mwene.
6Mundu mutamanu akwitsanga mu mureeko ku vwoni vwevwe mwene;
navutswa mundu wi likhola liu vulunji yimbanga nu vuyaanzi.
7Mundu wi likhola liu vulunji wamanya katoto ka vandu vamanani venyekhanga vakholelwi,
navutswa mundu mutamanu avulakhu shindu shia yamanya.
8Vandu vi shihenye henye varaanjitsanga shileeche mu litaala;
navutswa vandu vu vusitsa vikalilanga vurima.
9Lwa mundu uli nu vusitsa atsitsanga khuyaala mundu muyiingwa mushiina,
mundu muyiingwa akumilwa nu vurima vululu, atsililila khusekha, vuchila khuhonjela.
10Vandu valumindi vahima vandu vasuuvilwa,
navutswa vandu vi likhola liu vulunji valindanga vulamu vwa vandu khuli venavo.
11Mundu muyiingwa amanyinyanga vurima vwevwe havulavu,
navutswa mundu uli nu vusitsa yikhutsilanga nahonjela.
12Niiva mwamihi alahulishitsa makhuva ku vuvehi,
varumishi veve voosi valiitsa khuva vatamanu.
13Mundu mumanani nende mundu utambitsanga vandi vasanganga shindu shilala -
Mwami Nyasaye wavaha voosi tsimoni tsiu khulola.
14Niiva mwami alakhalachila vamanani vuchila khuvihonela,
aliitsa khwamiha khumihika minyishi.
15Shivoko nende khuchelihitsa khuhaananga vusitsa,
navutswa mwana walekhwa alerelanga mama wewe tsisoni.
16Lwa vandu vatamanu vamihanga, vutamanu vumeetekhanga,
navutswa vandu vi likhola liu vulunji valindililanga khulola nivativitswi.
17Chelihitsa mwana wowo, akhukhole khuvula khuheenda mwoyo;
Alakhukhola khuva nu vuyaanzi mu mwoyo kwokwo.
18Havundu ha khuvula malolo ka vaprofeti, vandu vali ni limenya litamanu;
navutswa ali ni ikhaavi mundu utsilililanga khulonda malako.
19Murumishi shianyala khuchelihitswa na makhuva ka vavoolanga vutswa tawe;
khali nikava wakamanya, aliitsa khwambakhana khukahulishitsa.
20Khuliho ni lisuuvilitswa linyishi khu mundu muyiingwa
khuvira mundu ukungukhanga mu makhuva vuchila khukanakanakhu.
21Niiva ulaha murumishi wowo shia shindu shiosi shia yenyanga khuraanjila muvwana vwevwe,
litukhu lindi aliitsa khuvukula miandu chiochio chiosi.
22Mundu uli nu vurima vwangu achilanga lilembana livaho,
mundu uli nu vurima achilanga matiinyu manyishi nikikholekha.
23Vwiloli vu mundu vumutivitsanga mwene,
navutswa vwichehitsi vumulerelanga luyali.
24Mulina wi shihuuvi nu mutsiku mutamanu khu vulamu vwevwe;
aliitsa khusalilitswa niiva alavoola katoto mushiina,
khandi Nyasaye alamulaama navula khukhola ndio.
25Khuria vandu vandi nu khwireeka mwene;
navutswa khusuuvilila mu Mwami Nyasaye
nu khumenya mu vulindi vulahi.
26Shia mundu wosi yenyanga mwamihi amuvukule vulahi,
navutswa katoto kakholwangwa nu Mwami Nyasaye.
27Vandu vatamanu vasiinya vandu vi likhola liu vulunji;
navutswa vandu valahi vasinya vandu vatamanu.
Currently Selected:
TSINGANU 29: LLLPRO
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013