TSINGANU 20
20
1Idivai ichilanga mundu akhola shihenye henye, malwa kaleranga lilembana;
mundu wakoyanyinywa navio avula vusitsa.
2Vurima vu mwami ali navwo vuli khuli muhumu kwi isimba;
khumukhola khuva nu vurima kali vutswa khuli wenyanga khukwa mu maraava.
3Ni likhuva liu luyali mundu khulekhana nu khulembana;
mundu muyiingwa naye ulembananga.
4Mundu mukaara yambakhana khulima mumatukhu ku khulima;
mumatukhu ku khuchesa akhavanga shiukhuchesa avula khushinyola.
5Tsinganakani tsiu mundu ali natsio tsili khuli matsi mushisima shiatsia muusi mu malova,
navutswa mundu uli ni limanya anyala khutsirulitsamu.
6Vandu vanyishi vikholanga khuva valahi,
navutswa mundu musuuvilwa yakhanyolekha hena?
7Mundu wi likhola liu vulunji namenya limenya lilahi,
vaana veve vali ni ikhaavi lwa aliitsa khuva niyakhutsa.
8Mwami yikhalanga khu shisoko shiu khukhalachila
amanyanga shia vutamanu vwosi vwalolanga.
9Ni viina unyala khuvoola, “Mwoyo kwanje nu mulahi;
natakaswa khurula mu vwoni vwanje?”
10Tsilaatili tsiu vuvehi nende vipimu viu vuvehi
viasiinya Mwami Nyasaye,
11Khali mwana amanyikhananga khurula khu vikholwa vievie,
kave ali nu mwiima mulahi inoho likhola liu vulunji.
12Mwami Nyasaye wakhuha
tsimoni tsiu khulola khandi maroyi ku khuhulishitsa.
13Uvuli khuyaanza tsindolo, inoho ulakwa mumanani;
ukhalavane iyi neyo, unyole shiukhulia shinyishi shiulia.
14Mukuuli wi vindu wamenya niyilililanga vukuuli vwi vindu vuli ikulu,
navutswa arulaho atsia khwichinjilila khuli akhanyinyanga mulikuulana vindu.
15Khuliho ni itsahabu, khandi mu vunyishi machina ku vukuuli vululu;
navutswa shindu shiu vukuuli vululu muno ni makhuva ku vucheli.
16Mundu niyirulitsa khusinjilila likoovi liu mundu mucheni imbeli wowo,
nu vulahi khuvukula inguvu yeye;
khumukhola khurunga likoovi liu mundu mucheni yali niyavukula lwa yirulitsa khumusinjilila.
17Shiukhulia shinyolekhanga munjila yu vukaati ni shinuulu,
navutswa lwa shitukhanga mu munwa shikwitsanga khuli muyeeshe.
18Likhola liosi lirulananga khu inganakani ya vandu vahaananga;
nu wenyi khuraanjitsa liihe khutukha mwikhale mulomolomele mu vusitsa.
19Mundu mumoonyi achilanga likhuva livisa limanyikhana havulavu;
khulwa yako, uvuli khuva mulina wu mundu wayaanza khwilomolominya.
20Niiva mundu alalaama tata wewe inoho mama wewe,
vulavu vwevwe vu vulamu vuliitsa khutsima khuli itaaha itsimanga mu shisuundi.
21Miandu chinyolekhanga vwangu muliraanga,
chiliitsa khuvula khuva chi tsikhaavi lukhumalilikha.
22Uvuli khuvoolakhu, “Nzitsanga khuvanzila vutamanu khu vulahi”,
navutswa uve ni liusuuvilitswa mu Mwami Nyasaye,
naye aliitsa khukhukhonya.
23Tsilaatili tsiu vukaati tsiasinyu Mwami Nyasaye,
khandi vipimu viu vuvehi ni shikholwa shitamanu.
24Mwami Nyasaye wamanya shia shindu shiosi shia khukholanga mu limenya lieru;
mundu yakhamanya ndina ka mwene akholanga?
25Nu vutamanu khuhaana lilaaka liu vwangu khu Nyasaye,
vuchila khukanakanakhu shitsitsanga khwikholekha.
26Mwami uli nu vusitsa amanyanga vulahi vwene mundu wu kholanga vindu vitamanu,
nu khumusalilitsa vuchila khumuvela tsimbavasi.
27Tsinganakani tsiu mukari mu mundu ni itaaha yu Mwami Nyasaye;
neye uheenzeshitsanga shia shindu shiosi shiaviswa mu mwoyo.
28Vulahi nende vusuuvilwa vilindanga mwami;
khandi shisoko shieshie shiu vwami shili ni tsingulu khuvirila mu vuyaanzi.
29Luyali lwa vaana vi shiyayi ni tsingulu tsiavo,
navutswa tsimbutse tsia vasakhulu nu luyali lwavo.
30Matukhu malala matiinyu ka khuvirilamu karulitsaho vindu vtamanu;
khuchelihitswa munjila yeneyo khunihitsanga mwoyo.
Currently Selected:
TSINGANU 20: LLLPRO
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013