TSINGANU 19
19
1Nu vulahi khuva mundu mumanani wi limenya lilahi,
khuvira khuva mundu mukoyanu khandi muyiingwa wilomolominyanga vuvehi.
2Nu vutamanu mundu khuvula khuva nu vucheli;
mundu uli vwangu mu likhola lielie alisikarila.
3Lwa mundu muyiingwa yitivitsanga khurulana khu vikholwa vievie viu vuyiingwa;
alolelanga vurima Mwami Nyasaye.
4Miandu chileranga valina vanyishi vayia,
navutswa mundu mumanani yilukhwangwa na valina veve.
5Mushiahidi wu vuvehi aliitsa khusalilitswa,
khandi mundu wilomolominyanga vuvehi shianyala khwihonolokha tawe.
6Vandu vanyishi vayaanzililanga khumanyikhana khu vimilili;
shia mundu wosi yenyanga khulomba vulina khu mundu uhaananga vihanwa.
7Mundu mumanani wahimwa na vamwavo veve;
valina veve navo vamwilukhanga vatsia ihale wene!
Khali navalomolomela makhuva ku khuvalera khuye, avulakhu khuli avanyola.
8Mundu wiyenyelanga vusitsa wayiyaanza mwene;
woyo utsilililanga khwenya khuva ni limanya aliitsa khuva muhinda.
9Mushiahidi wu vuvehi aliitsa khusalilitswa;
mundu uvoolanga makhuva ku vuvehi aliitsa khutivitswa.
10Nu vutamanu khu vandu vayiingwa khumenya mu limenya liu khwiyaanzilila,
khandi nu vutamanu khushila muno murukwa khwamiha vimilili.
11Mundu wacheliha avula vurima vu vwangu,
khandi mundu namukholele shindu shitamanu, alekhananga na kenako.
12Vurima vu mwami avetsanga navwo vuli khuli muhumu kwi isimba,
navutswa vulahi vwevwe vuli khuli liime khu vunyasi.
13Mwana muyiingwa achilanga tata wewe ativitswa,
khandi mukhali wamenya nalembananga ali khuli imbula ikhuvanga ninyilila.
14Inzu nende miandu virulanga khu vivuli;
navutswa mukhali wacheliha arulanga khu Mwami Nyasaye.
15Khukarahala khuchilanga mundu akona tsindolo tsinyishi;
mundu mukaara alanyakhana shichila inzala.
16Mundu ulondanga malako ka Nyasaye alatsililila khuva mwoyo;
woyo wambakhananga khukalonda alakhutsa.
17Mundu ukhonyanga mumanani yikopitsanga Mwami Nyasaye;
naye aliitsa khumurunga shichila shikholwa shieshie shilahi.
18Uchelihitsi mwana wowo lisuuvilitswa nilishiliho;
uvuli khumusalilitsa khali khumutivitsa.
19Mundu uli nu vurima vululu aliitsa khusalilitswa;
Numurulitsa mu matiinyu, uliitsa khumurulitsamu khandi.
20Niiva ulahulishitsa inganakani yu khonywangwa nende mechitso,
litukhu lilala uliitsa khuva nu vusitsa.
21Mundu akanakananga vinyishi viu khukhola,
navutswa lienya liu Mwami Nyasaye nalio likholekhanga.
22Khuva musuuvilwa ni shindu shienyekhanga khurula khu mundu;
Nu vulahi khuva mumanani khuvira khuva mundu muvehi.
23Khuha Mwami Nyasaye luyali navwo vulamu vwatoto;
mundu wu kholanga ndio mu vunyishi alahulila vulahi mu mmbili;
shianyala khuvirila mu linyakhana tawe.
24Mundu mukaara atuumbanga vutswa mu shiukhulia,
navutswa avula tsingulu tsiu khulia.
25Nusalilitsa mundu wi shihenye henye nalwo lwa mundu muyiingwa acheliha;
chelihitsa mundu uli ni limanya khu atsililile khuva nu vucheli.
26Mundu unyashitsanga tata wewe khandi akhunga mama wewe,
nu mwana uchilanga tsisoni nitsinyolekha khandi mwononyinyi.
27Yivi mwana wanje, lekha khukoyana navutswa ulondelele mivaalo,
uvuli khulekhana na makhuva kachelihitsanga vandu.
28Mushiahidi wakhamanya shindu akholelanga katoto shihenye henye,
khandi mundu mutamanu wayaanza khwilomolominya vindu vitamanu.
29Vandu vi shihenye henye valiitsa khusalilitswa,
khandi vandu vayiingwa valiitsa khushutwa khu mikongo chiavo.
Currently Selected:
TSINGANU 19: LLLPRO
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013