TSINGANU 2
2
Vihanwa Virulananga khu Vusitsa
1Mwana wanje, nikava ulahuchilila makhuva kaanje
nu khuvula khwivilila mivaalo kaanje,
2uve muhulili khu vindu vilondokhananga nu vusitsa,
nu khuchelitsa khuva nu mwoyo ku khwenya limanya;
3katoto, reeva unyole vucheli;
chelitsa khwenyelitsa limanya.
4Niiva uliitsa khuvwenyelitsa khuli ifetsa,
lwa khuvukhava khuli livishilu liaviswa;
5nalwo uliitsa khumanya khuha Mwami Nyasaye luyali ni shina
khandi unyole vucheli vu khumanya Nyasaye.
6Mwami Nyasaye neye uhaananga vusitsa,
khandi neye wu vucheli nende limanya virulakhu.
7Neye ukhonyanga vandu vi likhola liu vulunji, nivali vandu vatoto,
khandi ali khuli ingavo yu khulinda yavo vali vasuuvilwa khuye.
8Alindanga vandu vakholanga katoto,
khandi ashinga vasuuvilwa veve mu ka vakholanga.
9Niiva uliitsa khumbulishitsa, nalwo lwa uliitsa khumanya likhola liu vulunji,
katoto, khandi shia shindu shiosi shilahi.
Uliitsa khumanya shia utushili uve nukholanga;
10shichila uliitsa khuva nu vusitsa,
khandi vucheli vuliitsa khuyaanzitsa mwoyo kwokwo.
11Vucheli vwovwo vuliitsa khukhulonda;
limanya liliitsa khukhulinda;
12Vuliitsa khukhwikalila khukhola shindu shitamanu;
khurula khu vandu valomolomanga vindu viu vukoyanu;
13vandu valekhana ni limenya liu vulunji
khukorela mu vindu vi shisuundi,
14vandu vayaanzililanga khukhola vindu vitamanu
khandi vikhoyelanga mu vindu vitamanu vi shikhaya;
15vandu vakoyanu mu limenya liavo,
vanyala khuvula khusuuvilwa mu vikholwa viavo.
16Uliitsa khuhonyinywa khurula khu mukhali muheeyi,
khurula mu vuheeyi vwa makhuva keke ku khukaatilitsa,
17mukhali walekhana nu musatsa wewe wali niyamuhila,
khandi wivilila lilakano lia yakhola na Nyasaye wewe.
18Niiva uliitsa khwinjila munzu mwemwe,
kali khuli uli khunjila ikhuhilanga mu likhutsa.
Khutsiayo nu khwisuunda khu likhutsa.
19Mundu utsitsanga khuye, aliitsa khuvula khukalukha,
inoho khukalukha nashili mwoyo.
20Khulwa yako, ulonde mwiima kwa vandu valahi,
umenye limenya liu vulunji.
21Vandu vi likhola liu vulunji navo valiitsa khunyola shivala,
khandi vasuuvilwa valiitsa khutsililila khuva mwoyo mushio.
22Navutswa Nyasaye aliitsa khurulitsa vandu vatamanu mu shivala
khandi aliitsa khurinyuula vooni khurula mushio
khuli viraakwa virinyuulwa mu mulimi.
Currently Selected:
TSINGANU 2: LLLPRO
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013