TSINGANU 1
1
Vulahi vwi Tsinganu
1Yitsi ni tsinganu tsia Solomoni mwana wa Daudi, wali Mwami wa Israeli: 2Tsinganu yitsi tsikhukhonyanga khumanya vusitsa nende mechitso malahi ku khulonda, limanya nende makhuva kivisa ku mukari. 3Tsikhuheetsanga mivaalo ku khulonda khuvirila khu vusitsa mu likhola liu vulunji, katoto, khandi liiva liu khuva shilala mu limenya lieru. 4Tsinyala khulomba mundu wakorwa shindu shiosi khuva mucheli, nu khwechitsa vandu vavukha khuli vanyala khukhola mu limenya liavo, khu vave ni vindu viavo vene. 5Tsinganu yitsi tsinyala khumeeta vucheli khu mundu uli nu vusitsa, khandi khwimilila mundu uli ni limanya mu vikholwa,
6khumamanya vivune viaviswa vi tsinganu,
khandi vutiinyu vwa vandu vu vusitsa vavirilamu.
Vayayi Vavukha Vakhonywa Inganakani
7Khuha Mwami Nyasaye luyali nakhwo khuraanga khukhuva nu vucheli,
navutswa vandu vayiingwa vachayanga vusitsa nende mivaalo.
8Mwana wanje, uhulishitsi mivaalo ka tata wowo,
khandi uvuli khuchaya mechitso ka mama wowo.
9Kaliitsa khuva khuli shilemba shilahi shiene khu murwi kwokwo,
khuli matongolo kang'eleng'ananga mwing'ori mwomwo.
10Mwana wanje, lwa vandu vooni vakhukaatilitsanga,
uvuli khuhuchilila makhuva kavo.
11Nikava valavoola,
“Hamba khutsi; khukoneshe mundu khumwiiri;
Hambi khutsi khwinjilila vandu vavula vutamanu vwosi!
12Khuliitsa khuvamiila nivashili mwoyo,
khuli shihatisi shimiilanga vandu,
khandi valiitsa khukwa khuli vandu vakwitsanga mu vwina.
13Khuliitsa khunyola miandu chiu vukuuli vululu chiosi,
vindu viakhuyaayi viliitsa khwitsula mu tsinzu tsieru!
14Hamba uhambane na khutsi,
khutsitsanga khukavana vindu via khwahuuva.”
15Yivi mwana wanje, uvuli khuhaambana na vandu khuli venavo,
lekhana navo.
16Ni vaangu mu likhola vutamanu.
Shia khase khosi vayirechekha khwiira.
17Vukhala vuvulakhuho vu khureeka ineti
manyonyi koosi nikalolanga!
18Navutswa vandu khuli venavo vireekanga mireeko vene,
mireeko chiliitsa khuvativitsa.
19Vunuuli vuchilanga munuuli akhutsa --
nako kakholekhanga khu mundu
wamenya nasalilitsanga vandi.
Vusitsa Vulaanganga
20Hulishitsa! Vusitsa vulaanjililanga mu tsinjila tsia mataala
khandi shia havundu hosi mu tsisokoni,
21nitsilaanjilila ikulu muno ha vilivwa vi litaala likali
khandi havundu ha vandu vakanilanga halala:
22“Munyi vandu vayiingwa, munyala khutsililila khuva vayiingwa
khutukha inyinga shina?
Mulatsililila khukholela vucheli shihenye henye khutukha lina?
Munyala khuvula khwekakhu toto?
23Muhulishitsi lwa mukondeshelanga;
namukhonya inganakani indahi masanje na munyi mu vucheli vwanje.
24Namenya nimulaanganga, navutswa mwayambakhana khuhulishitsa,
namwinjilitsa ni mikhono chiosi, navutswa mwayambakhana.
25Mwayambakhana khulonda inganakani yanje yosi,
khandi muvula lienya liu khuchelihitswa.
26Lwa muliitsa khukwa mu matiinyu,
ninzi uliitsa khumusekha munyi.
Niitsa khumukholela shihenye henye lwa muranga khuria nu khutechela --
27lwa muliitsa khuria nu khutechela khuli imbuutsa,
matiinyu kaliitsa khumunyola khuli shihungutsi,
lwa muliitsa khunyakhana mu mioyo chienyu nu muminikha mu mioyo.
28Nalwo lwa muliitsa khunaanga lira lianje,
navutswa mbuli khuchipa.
Muliitsa khukhava shia havundu hosi,
navutswa shiumuliitsa khunyola tawe.
29Mushili khwenyakhu vukhonyi khurula khu vucheli
khandi shia khase khosi mwayambakhana khuha Mwami Nyasaye luyali.
30Mwayambakhana khulonda inganakani yanje yu khumukhonya
inoho khuhulishitsakhu lwa namuchelihitsanga.
31Khulwa yako, muliitsa khunyola shiamutushili muve numunyolanga;
khandi vikholwa vienyu viliitsa khumukhola mulwale.
32Vandu vavula vucheli vakhutsanga shichila vayambakhana vusitsa.
Vandu vayiinga vativanga lwa vavula khuheenda mwoyo.
33Navutswa mundu umbulishitsanga aliitsa khumenya mu vulindi vulahi,
aliitsa khuva mu milembe, vuchila khuria vutamanu.”
Currently Selected:
TSINGANU 1: LLLPRO
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013