TSINGANU 10
10
Tsinganu tsia Solomoni
1Yitsi natsio tsinganu tsia Solomoni.
Mwana uli nu vusitsa ayaanzitsanga tata wewe;
navutswa mwana muyiingwa avelelitsanga mwoyo kwa mama wewe.
2Miandu chinyolekhanga munjila indamanu chivula vukhonyi,
navutswa likhola liu vulunji lirulitsanga mundu mu likhutsa.
3Mwami Nyasaye shianyala khulekhakhu vandu vi likhola liu vulunji khuva ni inzala tawe;
navutswa yikalilanga vandu vatamanu khunyola via venyanga.
4Vukara vulombanga mundu khuva mumanani,
navutswa khukhola mihinzilu ni tsingulu khuchilanga mundu ava ni miandu.
5Mwana uli nu vucheli avunjelitsanga viraakwa mumatukhu ki shimiyu;
navutswa mwana ukonanga tsindolo mumatukhu ki lichesa anyolanga tsisoni.
6Mundu wi likhola liu vulunji anyolanga tsikhaavi;
navutswa lilomoloma liu mundu mutamanu livisanga tsinganakani tsiu khusalilitsa vandi.
7Khwitsushitsa vandu vi likhola liu vulunji khuli ni tsikhaavi;
navutswa vandu vatamanu valiitsa khwivililwa.
8Vandu vu vusitsa valondanga malako;
navutswa vandu vilomolominyanga mu vuyiingwa valiitsa khutivitswa.
9Vandu vi likhola liu vulunji vamenyanga vulahi khandi mu vulindi vulahi,
navutswa vakoyana mu limenya valiitsa khunyolekhana.
10Mundu wikalililanga katoto khuvoolwa achilanga vutiinyu nu vunyolekha,
navutswa woyo ukaretsanga havulavu
vuchila khuria achilanga milembe chivaho.
11Makhuva ku mundu wi likhola liu vulunji alomolomanga kali khuli shirula shiu vulamu,
navutswa lilomoloma liu mundu mutamanu livisanga liiva lielie liu khusalilitsa.
12Vuhimwa vuchilanga lilembana livaho;
navutswa vuyaanzi vwikalilanga vutamanu vwosi.
13Mundu uli ni limanya alomolomanga vindu viu vusitsa,
navutswa mundu muyiingwa aliitsa khurumulwa ni shivoko.
14Vandu vali nu vusitsa vatsilililanga khuva nu vucheli,
navutswa lilomoloma lia vandu vayiingwa lichilanga vutiinyu nu vunyolekha.
15Miandu nachio chilindanga vandu vahinda;
vumanani vuchilanga mumanani ativitswa.
16Murungu ku mundu wi likhola liu vulunji kuchilanga anyola vulamu,
navutswa ku mundu mutamanu akholanga kachilanga vwoni nu vuvaho.
17Mundu uhulishitsanga mivaalo aliitsa khutsililila khuva mwoyo,
navutswa yavo vambakhananga khuchelihitswa
valiitsa khukwa mu maraava.
18Mundu uvisanga vuhimwa nu muvehi,
navutswa woyo umoonyanga vandi nu muyiingwa.
19Makhuva manyishi nikalomolomwi, vwoni vunyolekhaho,
navutswa woyo wiyikalilanga khulomoloma wacheliha.
20Lilomoloma liu mundu wi likhola liu vulunji lili khuli ifetsa inyukhu;
tsinganakani tsiu mundu muyiingwa tsivula vukhala vwosi.
21Lilomoloma liu mundu wi likhola liu vulunji likhonyanga vanyishi;
navutswa vandu vayiingwa vakhutsanga shichila ni vasilo.
22Tsikhaavi tsiu Mwami Nyasaye natsio tsileranga miandu,
khandi tsingulu tsiu mundu mu likhola muhinzilu tsivula shia tsimeetakhu.
23Mundu muyiingwa akholanga vindu vitamanu khuli nu muvayo khuye,
navutswa mundu uli ni limanya akholanga vindu viosi khuvirila mu vusitsa.
24Shia vandu vatamanu varia, nashio shiliitsa khuvakwila;
navutswa shia vandu vi likhola liu vulunji vikombanga,
nashio shia valiitsa khunyola.
25Lwa imbuutsa yi shihungutsi ivetsanga nihuutsa,
vandu vatamanu vahuutswa varulaho,
navutswa vandu vi likhola liu vulunji vasimiikhwa ni tsingulu mihika ni mihika.
26Ukhavoolelakhu mundu mukaara akhukholele shindu tawe;
aliitsa khuva mululu khuli shilulu khu miino koko
inoho khuli mwooshi mu tsimoni tsiotsio.
27Khuha Mwami Nyasaye luyali, khumeetanga mihika mu limenya;
navutswa mihika chia vandu vatamanu chiliitsa khwimbihitswa.
28Lisuuvilitswa lia vandu vi likhola liu vulunji lichilanga nivasangala;
navutswa vandu vatamanu vavula shia valindililanga khunyola.
29Mwami Nyasaye alindanga vandu vi likhola liu vulunji,
navutswa ativitsanga yavo vakholanga vindu vitamanu.
30Vandu vi likhola liu vulunji valiitsa khulindwa vulahi shia khase khosi,
navutswa vandu vatamanu valarulitswa mu shivala.
31Vandu vi likhola liu vulunji valomolomanga makhuva ku vusitsa,
navutswa vandu valomolomanga vuvehi valakaywa.
32Vandu vi likhola liu vulunji valomolomanga ka vamanyi kahuchililwa,
navutswa vandu vatamanu vavoolanga shia khase khosi
vindu viu khusalilitsa vandi.
Currently Selected:
TSINGANU 10: LLLPRO
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013