LIVALITSWA 13
13
Varunishitsi vi Shivala shia Kanaani
(Litsu 1:19-33)
1Mwami Nyasaye yavoolela Musa, 2“Ruma vandu vatsi khurunishitsa shivala shia Kanaani, shia mbetsanga Vaisraeli. Shia mwimilili, aliitsa khurumwa khurula mu shia luhia mu vandu vi tsimbia likhomi na tsivili tsia Israeli.” 3Nalwo lwa Musa yavaruma, voosi, nivali vimilili Vaisraeli khurula mu Shiangalangwi shia Parani, khuli Mwami Nyasaye yali namuvoolele. 4Vandu venavo vali Shamuha mwana wa Zakuri, warovolwa khurula mu vandu vuluhia lwa Rubeni.
5Shafati mwana wa Hori khurula mu vandu vuluhia lwa Simioni.
6Kalebu mwana wa Yefune khurula mu vandu vuluhia lwa Yuda.
7Igali mwana wa Yosefu khurula mu vandu vuluhia lwa Isakari.
8Mwana wa Nuni wali ni lira Hosheha khurula mu vandu vuluhia lwa Efurahimu;
9Mwana wa Rafu wali ni lira Paliti khurula mu vandu vuluhia lwa Benyamini;
10Mwana wa Sodi wali ni lira Gadieli khurula mu vandu vuluhia lwa Zabuloni;
11Gadidi mwana wa Susi khurula mu vandu vuluhia lwa Manaase; (nivali vandu vuluhia lwa Yosefu.)
12Amieli mwana wa Gemali khurula mu vandu vuluhia lwa Dani.
13Mikaheli mwana wa Setsuri khurula mu vandu vuluhia lwa Asheri.
14Nahubi mwana wa Vofusi khurula mu vandu vuluhia lwa Nafutali;
15Gehuheli mwana wa Maki khurula mu vandu vuluhia lwa Gadi.
16Navo vandu va Musa yaruma khutsia khurunishitsa shivala shia Kanaani. Yakalukhanyinya lira lia Hosheha mwana wa Nuni, namukulikha lira lindi Yoshwa.
17Lwa Musa yavaruma khutsia khurunishitsa shivala shia Kanaani, yavavoolela, “Tikulishi ivuluka mutsi khwinjilila khuluveka luli ikuvanda wi shivala shia Kanaani; khandi mutsililile khutukha mu shivala shi vikulu. 18Muheenzeshitsi mulole, khuli shivala shienesho shikhala. Muheenze mulole niiva vandu vamenyamu, vali ni tsingulu inoho ni vateteshele, khandi niiva ni vatititi inoho ni vanyishi. 19Muheenze mulole niiva shivala shienesho, ni shilahi inoho shitamanu; khandi niiva vandu vamenyanga, mu mataala ki tsimbinga inoho kavula tsimbinga. 20Muheenze mulole, niiva malova ni malahi inoho matamanu, khandi niiva shivala shienesho, shili ni miliru inoho shivula. Muve ni ikholo indahi, khandi muchelitsi khulerakhu matunda karaakwayo.” (Kikholekha mumatukhu ka matunda ki misabibu, kali nikakharaanga khwenga.)
21Vandu likhomi na vavili venavo, vatikulukha nivatsia khuluveka luli ivuluka. Varunishitsa shivala shia Kanaani nivali mu Shiangalangwi shia Sini khuluveka luli ikuvanda khutsia khutukha mu litaala lia Rehobu, himbi havundu halaangwangwa Injila ya Hamaatsi, khuluveka luli ivuluka. 22Vasimukha, nivaraanga khwinjila khuvirila khuluveka luli ikuvanda mu shivala shia Kanaani, nivatsia khutukha mu litaala lia Hebroni; havundu ha tsinzu tsia Ahimani, Sheshahi nende Talumahi, nivali vitsukhulu va Anaka #13:22 Vitsukhulu va Anaka: Nakhwo khuvoola luhia lwi mindu miraambi chi tsingulu tsinyishi. vamenyanga. (Litaala lia Heburoni liumbakhwa mihika saba, nichimali khuvira lusomo lwa Zohani luli mu shivala shia Misri nilushili khumbakhwa.) 23Vatukha mu Luhoongo lwa Eshikoli; nivareemamu lusia lulitoho lu musala ku musabibu lwali nu lwamakhu matunda manyishi ki misabibu, khali nikalomba vandu vavili nivakachinga khu maveeka kavo ni varumishilanga musala. Vachinga khandi matunda kalaangwangwa pomenguraneti #13:23 pomenguraneti: Ni matunda kasasanga khuli machiungwa, nikhali ni mamuuchi. nende matunda ki mikhuyu. 24(Havundu henaho hakulikhwa lira Luhoongo lwa Eshikoli, shichila Vaisraeli varemaho lusia lwa matunda ki misabibu).
25Lwa vali nivamali khurunishitsa shivala shienesho, khumatukhu makhomi kane, varunishitsi venavo vakalukha 26khu Musa, Haruni nende vandu vi tsimbia tsia Israeli voosi, mu litaala lia Kadeshi mu Shiangalangwi shia Parani. Vavavoolela makhuva, ka vali nivaloli koosi mu shivala shienesho, ni vavamanyinya matunda ka vali nivanyoli khurula mu shivala shienesho. 27Vavoolela Musa, “Khwarunishitsa shia shindu shiosi, shiakholekhanga mu shivala shienesho, nu khunyola ndi shivala shienesho shili nu vuhinda khandi lilova lilahi, nende vushi. Matunda ka khunyolimu nako yaka. 28Navutswa vandu vamenyanga mu shivala shienesho, vali ni tsingulu tsinyishi. Mataala kavo kayevwa na masisi khandi ka vambalala. Khumeeta khu kenako, khali khwalolayo vitsukhulu va Anaka. 29Vaamaleki vamenyanga khuluveka luli ikuvanda wi shivala shienesho; Vaahitse, Vayeebusi, nende Vaamori vamenyanga mu shivala shi vikulu. Vakanaani vamenyanga himbi khu Inyanza ya Meditarenia, khandi khuluchinga lu Muchela kwa Yorodani.”
30Kalebu yahonjelitsa vandu vali nivilililanga shichila Musa, navoola, “Hambi, khutikulushi vwangu, khuvukule shivala shienesho; khuli ni tsingulu tsinyishi tsiu khuvakuura.”
31Navutswa vandu vasimukha nivatsia halala na Kalebu, vavoola, “Khuvula tsingulu tsiu khukwana vandu venavo; shichila vali ni tsingulu tsinyishi khukhuvira.” 32Vandu venavo, vavoolela Vaisraeli makhuva ku vuvehi, khulondokhana khu shivala shia vali nivarunishitsi. Vavoola, “Shivala shia khwarunishitsa ni shi inzala khu vandu vamenyanga mushio. Vandu voosi va khwalolayo ni varaambi khuvira shichelo. 33Khwalolayo (Vitsukhulu va Anaka varulanga mu mindu miraambi chi tsingulu tsinyishi chiu luhia lwa Nefilimu) Nefilimu. Khwalolekha khuva vatititi, khuli madakalala imbeli wavo, nindio khandi khwalolekha khuvo.”
Currently Selected:
LIVALITSWA 13: LLLPRO
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013
