LIVALITSWA 12
12
Miriamu nende Haruni Vahinganyinya Musa
1Musa yali wahila mukhali khurula mu shivala shia Midiani, ma Miriamu nende Haruni nivalomoloma vindu vitamanu shichila kenako. 2Vareeva, “Ni Musa wonyene wu Mwami Nyasaye yalomoloma khuvirilakhu? Khali kanyala khuva ashili khulomoloma khuvirila khu khutsi?” Mwami Nyasaye yahulila ka vali nivavooli. ( 3Musa yali mwichehitsi, mwichehitsi muno khuvira shia mundu wundi wosi mu shivala.)
4Mwami Nyasaye yavoolela Musa, Haruni nende Miriamu, “Mwenyanga munyi vandu vavaka khwitsa ha Liheemo Litakatifu.” Vasimukha nivatsia, 5ma Mwami Nyasaye niyikha hasi khuvirila mu malesi malitoho; nasinjila mu vwinjililu vwi Liheemo, nalaanga, “Haruni! Miriamu!” Vo vavili vitsa imbeli, 6Mwami Nyasaye navoola, “Muhulishitsi makhuva kaanje! Lwa vaprofeti vamenyanga mu munyi, nzimanyinyanga mwene khuvo khuvirila mu malolo, nu khulomoloma khuvo khuvirila mu malooro. 7Navutswa nyala khuvula khwimanyinya ndio, khu murumishi wanje Musa; muheele vunyali vu khusinjilila vandu vaanje Vaisraeli voosi. 8Nomolomanga khuye mumoni namoni, havulavu shikali khuvirila mu tsinganu tawe; navutswa khali walolakhu ni tsimoni tsietsie khuli sasanga! Shichila shina, numulomoloma vindu vitamanu khu murumishi wanje Musa?”
9Mwami Nyasaye yalolela vurima Haruni nende Miriamu, narulaho. 10Lwa malesi kisuunda khurula khu Liheemo Litakatifu, shikhanda shiu mmbili kwa Miriamu shialwala vuchele, nu kukalukhana khuva mulavu khuli imparafu. Lwa Haruni yamuheenza, nalola ali nu vuchele; 11yavoolela Musa, “Musa, nuyaanza uvuli khukhusalilitsa, shichila vwoni vwakhukholele mu vuyiingwa. 12Uvuli khulekha mmbili kwa Miriamu kuve khuli shindu shivulwa nishiakhutsa, luveka lulala nu lwakuunda.”
13Nalwo lwa Musa yililila khu Mwami Nyasaye, “Nyasaye, nuyaanza muhonyinyi!”
14Mwami Nyasaye yavoolela Musa, “Niiva tata wa Miriamu yakhamusutsili maree mu tsimoni, Miriamu mwenoyo yakhavele ni tsisoni khumatukhu saba. Murulitsi mu maheemo kamumenyamu khumatukhu saba. Numumali khukhola ndio, munyala khumukalushitsamu.” 15Miriamu yarulitswa mu maheemo kenako, khumatukhu saba, ma vandu nivalekha khuraanga luchendo lu khurulaho, Miriamu nashili khukalushitswamu. 16Lwa vali nivamali khukhola kenako, vandu varula mu litaala lia Hazerotsi, nivatsia khumenya mu maheemo mu Shiangalangwi shia Parani.
Currently Selected:
LIVALITSWA 12: LLLPRO
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013
