NAHUMU 2

Khuli Litaala lia Nineve Liativitswa

1Yivi litaala lia Nineve, mutivitsi umali khwitsa khukhukwana!

Ulinde tsimbinga tsiotsio!

Uheenzeshitsi khu muhaanda!

Wirecheshe!

Wiyavaale khutsia khukwana muliihe!

2Mwami Nyasaye akalushitsilanga vandu va Yuda vukhumi vwavo,

khuli vukhumi vwa Israeli,

khali niiva vayaayi vavayaaya shia shindu shiosi

nu khwononyinya tsisia tsiavo tsi misabibu.

3Vasikali vavo vachinganga tsingavo tsimuuchi;

vifwalanga tsinguvu tsia sambarau.

Makaare kavo kiliihe kahemukhanga khuli mulilu,

nikaroonjele khu luvaaso,

shituma shi tsifarasi tsiroonjelanga vuchila khuria.

4Makaare kiliihe kali vwangu khu mihaanda chi litaala likali,

kaviranga vwangu iyi neyo hakari hi litaala likali.

Kasasanga khuli tsimemo tsiu mulilu,

khuli likulu lihilikananga.

5Mwami alaanganga vimilili va vasikali veve;

visikarilanga lwa vatsitsanga imbeli,

vatukhanga vwangu khu lisisi;

nivirecheshitsa vindu viu khuvashinga.

6Vilivwa viu muchela via yikulwa,

inzu yu vwami itechelitswangwa.

7Litaala lia Neneve liaviritswa khuhilwa mu vuhaambe,

vakhali vamenyanga mulio varulitswayo;

vatsiulanga khuli vituti,

khandi vasung'usulanga tsimbele tsiavo nivavelele.

8Litaala lia Nineve lili khuli lituvwi

liapomokha li michelelo chia matsi karulanga nikasuundukha.

Vandu valio vilukhakanga iyi neyo nivavoola,

“Yikalili! Yikalili!” --

Navutswa mundu avulakhuho wishevukhanga inyuma.

9“Muvayaaye ifetsa,

Muvayaaye itsahabu!

Livishilu shilivwetsanga tawe!

Vindu viu vukuuli vululu viashilayo!”

10Litaala lia Nineve liarikala lielie likhaya,

liamala khutivitswa!

Vandu vakhutsa mioyo, vachendanga nivateteshele,

shichila vavula tsingulu,

vasamushila mumoni mwavo!

11Ni shina shikholekha havundu hi tsisimba tsiamenyanga,

luhangaywa lwa vaana vi tsisimba,

ha isimba yatsitsanga nende vaana vayo,

vuchila khunyashitswa?

12Isimba yiirilanga vaana vayo inyama ya tsilia

nu khwikura,

nu khulumakanyila tsisimba tsikhali inyama ya tsilia,

yayitsulitsa mu tsimbangaywa inyama inyishi,

havundu ha imenyanga yayitsula mu vunyishi inyama yakavulwa.

13Mwami Nyasaye wi Mikaanda Chiliihe avoolanga, “Lola, nzitsanga khukhukwana. Niitsa khulaalitsa makaare kiliihe koko khutukha lwa kaliitsa khutuumukha khuli mwooshi. Vasikali venyu valiitsa khwiirwa muliihe. Niitsa khumunuula shia shindu shiosi, shia mwali numwanuula vandi. Lienya lia varumwa venyu vikombanga khukholelwa, liliitsa khuvula khuhulilikhana.”

Currently Selected:

NAHUMU 2: LLLPRO

Highlight

Copy

Compare