NAHUMU 1
1
1Yili nalio likhuva lia Nyasaye shichila litaala lia Nineve, khuli kahandikwa mu shitabu shia Malolo ka Nahumu wi litaala lia Elikoshi yalola.
Vurima vwa Nyasaye khu Nineve
2Mwami Nyasaye ni Nyasaye wi lishiendekha, avanzilanga,
Mwami Nyasaye avanzilanga khandi nu mululu;
Mwami Nyasaye avanzilanga vatsiku veve,
khandi alulilanga vatsiku veve.
3Mwami Nyasaye avula vurima vu vwangu,
navutswa wayitsula tsingulu,
khali asalilitsanga vandu vali nu vutamanu.
Alolekhanga khuli shihungutsi nende imbuutsa;
malesi kalolekhanga khuli lukuushi lutuumukhanga lwa aviranga.
4Akondeshelanga inyanza, nu khuchikhaaminya,
yuminyanga michela chiosi;
khali lwayilu lwa Bashani nende Shikulu shia Karameli vinialanga,
khali mawua ka Lebanoni kavungulukha.
5Vikulu vitechelanga imbeli wewe,
khali rukulu ruyekukhanga;
lilova litechelanga imbeli wewe,
halala ni shivala nende vindu viosi vimenyamu.
6Ni viina unyala khwihonolokha
khurula mu vurima vwa Mwami Nyasaye?
Ni viina unyala khwikhutsila vurima vwevwe vululu?
Vurima vwevwe vumemanga nu vuhemukha khuli mulilu,
khali tsinyanda tsiatikhananga mu vitonye shichila ye.
7Mwami Nyasaye nu mulahi,
ali khuli imbinga mumatukhu ku vutiinyu;
alindanga vandu vilushilanga muye.
8Navutswa vatsiku nivaseera shivala
khuli matsi ki michelelo, neye uvativitsanga;
avahitsanyinyanga vakorela mu shisuundi.
9Ni shina shia muloshitsanga khukhola Mwami Nyasaye?
Neye uliitsa khumutivitsa,
mutsiku avulakhuho wa aliitsa khuvanzila hali khavili.
10Vatsiku veve valiitsa khulaalitswa
nu mulilu khuli shisakha shia mavwa;
valiitsa khutivitswa khuli vunyasi vumakanu.
11Mundu warula mu munyi,
ukanakanilanga Mwami Nyasaye likhola litamanu,
wukhavanga inganakani yu khukhonywa
khurula khu vandu vatamanu.
12Mwami Nyasaye avoolelanga vandu veve,
“Khali niiva Vashuria vali ni tsingulu tsinyishi khandi ni vanyishi,
valiitsa khwiirwa nu khutivitswa.
Khali niiva ninzi wachila numunyakhana,
niitsa khulekha khumunyashitsa khali hati hene.
13Niitsa khumenekanyinya tsingulu tsia Vashuria shichila munyi,
khandi ndemakanyinyi minyololo chia mwavohwa.”
14Mwami Nyasaye umali khuhaana malako keke shichila yivi Nineve,
“Mundu avulakhuho uliitsa khukhukulikha numali khukhutsa.
Niitsa khutivitsa vifwanani via walomba
nende vifwanani via wakhonga
khurula mu litempeli lia vanyasaye venyu.
Ninzi uliitsa khukhuyeveela shilindwa shioshio,
shichila utushili khukhutsa.”
15Loli! Murumwa yitsanga narula mu vikulu,
nalera makhuva malahi!
Aleranga likhuva li milembe;
Munyi vandu va Yuda, mwikhoyele milukha chienyu,
nu murweshitsa ka mwisuuha muliitsa khukhola;
shichila litukhu livulakhuho liu mundu mutamanu
aliitsa khumuseera khandi;
shichila wamala khutivitswa.
Currently Selected:
NAHUMU 1: LLLPRO
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013
