MIKA 1
1
1Mwami Nyasaye yalomoloma khu Mika wi litaala lia Moreshetsi, mumatukhu ka Yotsamu, Ahazi nende Hezekia vamihanga Yuda. Mwami Nyasaye yavoolela Mika makhuva khulondokhana khu vindu viali nivikholekhanga Samaria nende Yerusalemi.
Litaala lia Samaria Lilakhalachilwa
2Hulili munyi vandu voosi;
hulishitsa yivi lilova nende vindu viosi vilimu.
Mwami Nyasaye yitsanga khumuyaala,
Mwami Nyasaye alomolomelanga
mu Litempeli lielie litakatifu.
3Loli! Mwami Nyasaye arulanga havundu hehe hamenyanga,
aliitsa khwikha hasi achendele ikulu khu vikulu.
4Vikulu viliitsa khuyekukha hasi hehe,
khuli ilaamu nili himbi khu mulilu;
tsimbongo tsiliitsa khwatikhana,
khuli matsi katsukhulukhanga hasi khurula hikulu.
5Vindu yivi viosi viliitsa khwikholekha
shichila vutamanu vwa vandu vi inzu ya Yakobo,
khandi shichila vwoni vwa Vaisraeli vakhola.
Nu vutamanu shina vwa Yakobo yakhola?
Kakholeshela mu litaala lielie lia Samaria!
Nu vutamanu shina vwa vandu vi inzu ya Yuda vakhola?
Kakholeshela mu litaala likali liavo lia Yerusalemi!
6Khulwa yako, Mwami Nyasaye avoolanga,
“Niitsa khukhola Samaria khukwa shikulu
shi lichiinga lia mashiindi mu shiangalangwi,
havundu ha varaaka misala chi misabibu.
Niitsa khukolongominya machina ka liumbakhwakhu mu luhoongo,
nu khuyeevulula misinji chialio.
7Vifwanani vievie viosi viliitsa khwiraanyinywa mu vitonye,
mirungu chiechie chiosi chiliitsa khusambwa nu mulilu,
khandi nilitivitsa misambwa chialio chiosi;
shichila yavinyoola khuli mirungu chiu mukhali mulaaya anyolanga,
khandi lwa chili khuli mirungu chiu mukhali wu kholanga vulaaya
chiliitsa khurumishilwa khandi.”
Khuli Mataala ka Yuda Kalitivitswa
8Nalwo lwa Mika yavoola,
“Niitsa khulila tsikhwili ninzikhula,
niitsa khuchenda vilenje viele nindi shekenye.
Niitsa khwikhula ninziula khuli vivwe,
khandi nziuli tsikhwili khuli mayahutu;
9shichila makuule ka Samaria shikanyala khuhona tawe;
khali kanyola Yuda khandi;
kaheenzelele mu shilivwa shia Yerusalemi,
nali havundu ha vandu vaanje vamenyanga.
10“Muvuli khuvoolelakhu mundu mu litaala lia Gatsi,
inoho khulilakhu khali hati hene!
Mukalaakale mu lukuushi numuli Betsi Lehafura.
11Munyi vandu vi litaala lia Shafiri, simushi mutsi,
numuli shekenye khandi ni tsisoni.
Munyi vandu va Zahanani, muvuli khurula mu litaala lienyu.
Vandu vi litaala lia Betsi-ezeli valilanga;
vavula havundu ha munyala khwilushila mu vulindi vulahi.
12Vandu vi litaala lia Marotsi valindililanga
nu mwoyo kwosi khukhonywa,
khali ndio, matiinyu kamali khwitsa khurula khu Mwami Nyasaye
kaheenzelele mu shilivwa shia Yerusalemi.
13Munyi vandu va Lakishi,
muvohe tsifarasi khu makaare kiliihe,
shichila munyi mweka khukhola vwoni
khurula khu vandu va Sayoni,
khandi mwachila Vaisraeli nivakhola vutamanu.
14Khulwa yako, muheelelane milembe chiu khulekhana
na vandu va Moreshetsi Gatsi;
Litaala lia Akuzibu livulakhu shia liakhonya vami va Israeli,
khali vami va Israeli ni shindu shikhaya.
Navo valiitsa khukhutsa mwoyo.”
15Khali munyi vandu va Maresha,
Nyasaye aliitsa khumulerela
khandi mutsiku wa namukumili ni tsingulu;
vimilili vaheelwa luyali va Israeli valiitsa khwilukha khutsia
muluhangaywa lwa Adulamu.
16Munyi vandu va Yuda, veechi vioole khu mirwi chienyu,
khwikhula vaana venyu vamwayaanza;
vambuuli vioole vienyu vive khuli vi shilitsa,
shichila vaana venyu vamulekha vahilwa mu vuhaambe.
Currently Selected:
MIKA 1: LLLPRO
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013
