ISAYA 53
53
1Ni viina wasuuvila makhuva ka khwahulila?
Ni viina wamanyinywa tsingulu tsiu Mwami Nyasaye?
2Yavilukha imbeli wewe khuli shiraakwa shitoro
khandi khuli shirina shiseevukhanga khurula hasi mu malova kumakana.
Shiyalikhu nu luyali inoho likoondo liakaasa khukhulera khuye mwene,
inoho ni likoondo lilahi khu khumwikombe tawe.
3Vandu vamuchaya khandi nivamwambakhana,
mundu wali nu vuveleli mu mwoyo khandi wamenya nanyakhananga.
Mundu avulakhuho wali ni lienya liu khumuheenzakhu.
Khwamulechelitsa nu khuvula khumuvukula khuli ni shindu.
4Ni kilikali, yikhutsila linyakhana lia khwenyekhanga khunyakhane,
khali nachinga vulwale vweru;
navutswa khwali ninganakani ndi linyakhana lia yanyakhananga
liarulanga khu Nyasaye.
5Navutswa yasalilitswa tsinguma shichila vwoni vweru,
yashiutwa shichila vutamanu vweru;
lisalilitswa lia yavirilamu liachila nu khunyola vulamu,
khandi tsinguma tsia yarumulwa tsiakhuhonyinya.
6Khutsi voosi khwakora khuli makondi,
shia mulala khu khutsi wakoyana;
navutswa Mwami Nyasaye neye wamutiukha vutamanu vweru vwosi.
7Yatambitswa khandi nanyashitswa,
nikhali avula shindu shia yalomoloma;
khuli shimeme shihilwangwa khutsia khusinzwa,
khandi likondi lia vatsitsanga khukhalaka vwoya,
vuchila khulomolomakhu shindu shiosi.
8Yatambitswa, yakhalachila nahilwa khutsia khwiirwa,
khandi ni viina walomolomakhu shindu shiosi khu vitsukhulu veve?
Yakhutsa shichila vwoni vwa vandu veru.
9Yavikhwa mu shilindwa halala na vandu vatamanu,
nayeveelwa halala na vahinda,
khali niiva shindu shitamanu shivulakhuho shia yali nakholi,
inoho khuvoola vuvehi.
10Nikhali liali lienya liu Mwami Nyasaye ashiutwi nu khunyakhana,
khali shihanwa shiu khusemeha vwoni vweru.
Aliitsa khuva nu vulamu mihika ni mihika nu khulola vitsukhulu veve;
neye uliitsa khurweshitsa lienya liu Mwami Nyasaye.
11Mwami Nyasaye avoolanga,
“Namali khuvirila mu linyakhana, aliitsa khuva nu vuyaanzi;
aliitsa khumanya ndi shiyanyakhananga shikhaya tawe.
Murumishi wanje wihaana nu mwoyo kwosi, wa nayaanzitswa naye,
aliitsa khwitiukha lisalilitswa lia vandu voosi
khandi niitsa khuvasemeha shichila ye.
12Khulwa yako, niitsa khumuha havundu hali nu luyali mu vi tsingulu,
havundu ha aliitsa khuva halala na vi tsingulu nende vu vunyali.
Mwene yirulitsa manasanga mu likhutsa lia vandu vatamanu vali ni vatushili khuvirilamu.
Yavukula vwiyangu vwa vooni vanyishi
khali nasaalila vandu vatamanu khu vasemehwi.”
Currently Selected:
ISAYA 53: LLLPRO
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013