ISAYA 52
52
Nyasaye Aliitsa Khuhonyinya Yerusalemi
1Yivi litaala likali lia Sayoni,
kholakhu shindu, kholakhu shindu!
Sinjila ma utinye.
Yifwale tsinguvu tsiotsio tsindahi tsiene muno,
yivi litaala likali lia Yerusalemi, nilili litaala likali litakatifu.
Vandu vasoleli nende vi shifwavi valiitsa khuvula khwinjila mu yivi.
2Yisung'usuli lukuushi lwenyu munyi vandu vi litaala likali lia Yerusalemi,
sinjila mawikhale khu shisoko shioshio shiu vwami.
Yivohololi vene minyololo chiamuvoha munyi vandu va Sayoni;
3shichila Mwami Nyasaye avoolanga,
“Mwakuulitswa navutswa shindu shivulakhuho shia mwarungwa,
muliitsa khuvohololwa vuchila murungu kwosi.”
4Mwami Nyasaye avoolanga, “Muliraanga vandu vaanje vakholomokha nivatsia khumenya mu shivala shia Misri, navutswa lukhumalilikha Vashuria navo va vatambitsa vuchila shivune shiosi.” 5Navutswa Mwami Nyasaye avoolanga, “Nu vukhonyi shina vuli hanu nunundi? Vandu vaanje vahilwa mu vuhaambe, vuchila khurungwa shindu shiosi. Vamihi vavo valila tsikhwili, khandi lira lianje nilikholelwa shihenye henye shia litukhu liosi. 6Vandu vaanje valiitsa khumanya lira lianje khandi vamanye ninzi Mwami Nyasaye ulomolome; ni kilikali ninzi.”
7Lolikhu khuli ka yaanzitsanga khulola murumwa narulili khu shikulu
uvoolelanga vandu vamenye mu milembe,
wilwatsanga makhuva malahi,
khandi alanditsa vuhonyinyi khu vandu!
Avoolelanga litaala likali lia Sayoni,
“Nyasaye wowo yamihanga!”
8Hulishitsakhu! Valindi vovo vi vilivwa valaanjililanga;
valaanjililanga khulala nu vuyaanzi;
shichila valolanga ni tsimoni tsiavo
Mwami Nyasaye nakalukha mu Sayoni.
9Munyi lichiinga lia Yerusalemi, reekuli khulala tsinyimbo tsiu vuyanza,
shichila Mwami Nyasaye waleminya mwoyo vandu veve,
wahonyinya Yerusalemi.
10Mwami Nyasaye umali khumanyinya tsingulu tsietsie tsindakatifu,
imbeli wa vandu vi tsimbia tsindi tsiosi;
khandi vandu voosi mu shivala valiitsa khulola
khuli Nyasaye weru ahonyinyanga vandu veve.
11Ruli! Ruli! Ruli mu shivala shinu!
Muvuli khutiilakhu khu shindu shi shifwavi!
Rulimu mamuve vanihu,
munyi vamuchinganga vindu viu Mwami Nyasaye.
12Navutswa muliitsa khuvula khurulamu vwangu
inoho khwilukha;
shichila Mwami Nyasaye aliitsa khumwimilila imbeli wenyu,
khandi lwa ali Nyasaye wa Israeli,
aliitsa khumulinda munyuma.
Murumishi Unyakhananga
13Mwami Nyasaye avoolanga,
“Murumishi wanje aliitsa khukuura mu muhinzilu kwa akholanga;
aliitsa khuchingulwa aheelwi luyali lunyishi.
14Lwa vandu vanyishi vachenya nivakhamulola,
likoondo lielie liakalukhana khali navula khusasana nu mundu;
khandi mmbili kwekwe shiu kwalolekhanga khuli ku mwana wu mundu tawe.
15Navutswa aliitsa khuchenyinya vandu vi tsimbia tsinyishi;
vami valiitsa khukhaywa shia vavoola shichila ye;
shichila ka vali nivashili khuvoolelwa, valiitsa khulola,
khandi ka vashili khuhulila, nako ka valiitsa khumanya.”
Currently Selected:
ISAYA 52: LLLPRO
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013