ISAYA 5
5
Lwimbo lu Musabibu Kwavula Khwama
1Leshi nzimbile muyaanze wanje lwimbo khu mulimi kwi misabibu kwekwe:
muyaanze wanje yali nu mulimi kwi misabibu khu shikulu shi lilova linuulu muno.
2Yalima mulimi kwenoko manarulitsamu shia lichina liosi,
naraaka mukwo misabibu minuulu chiene;
yumbakha munaara ku khulinda,
nayeeva vwina vu khuminilamu matunda ki misabibu.
Yaheenzelela alole nichimeelanga matunda,
navutswa kwameela matunda matamanu.
3Munyi vandu vamumenyanga mu Yerusalemi nende mu Yuda,
voolikhu shindu shiosi hakari hanje nende mulimi kwi misabibu kwanje.
4Ni shina shindi shia nali nakhola mu mulimi kwanje kwi misabibu shia nakhakhola tawe?
Lwa naheenzela ndole nukwamanga matunda ki misabibu malahi,
shichila shina nukwama vutswa matunda matamanu?
5“Nyenyanga khumuvoolela ka nzitsanga khukhola mu mulimi kwanje kwi misabibu:
Napomola lukaka lu mulimi kwenoko makwononyinywi;
Napomolanyinya lisisi liakwo
makutuuvachilwi hasi.
6Nakukhola khuva vulimu;
shiukuliitsa khusosolwa inoho khuseembelwa tawe,
maraakalu nende mawua kaliitsa khumeelamu;
niitsa khwikalila imbula khuvula khukhuvamu.”
7Vaisraeli nakwo mulimi kwi misabibu ku Mwami Nyasaye wi Mikaanda Chiliihe
vandu va Yuda navo misala chi misabibu chimuyaanzitsanga;
yalindilila vakhole katoto,
navutswa vasuundula shisahi.
Yalindilila alole nivakhonga likhola liu vulunji,
navutswa yahulila vandu nivali mu vutiinyu nivenya vakhonywi.
Vindu Vitamanu via Vandu Vakholanga
8Wooyi! Muli khu vutiinyu munyi vamutsilililanga khumeeta tsinzu khutsia muli natsio khale.
Munyi vameetanga milimi khuchia muli nachio khale,
khali muvula khulekhakhu shia havundu hosi;
mamutsililila khumenya vonyene mu shivala.
9Mali khuhulila Mwami Nyasaye wi Mikaanda Chiliihe navoolanga,
“Katoto, tsinzu tsinyishi yitsi tsiliitsa khwononyinywa,
tsinzu tsingali khandi tsindahi tsiene,
tsiliitsa khuvula vandu vu khumenyamu
10Misala chi misabibu chimeelanga mu mulimi kwi tsiheka 10
khuliitsa khunyolamu idivai tsilita 8 tsionyene.
Khuliitsa khuliitsa khunyola tsilita 18 tsionyene
khurula mu vukuutsa tsilita 180. ”
11Wooyi! Muli khu vutiinyu munyi vamuvukhanga mu tsindolo nu kushili mu mavwevwe khutsia khukhava malwa;
vamutsilililanga khung'wa mu vutukhu khutukha lwa mutanda.
12Muli ni vukhana nende tsindulelo,
manyanga nende idivai mu milukha chienyu chi lilia;
navutswa mwachaya vikholwa viu Mwami Nyasaye,
khali shiumwamanyakhu shia akholanga tawe.
13Khu, vandu vaanje valiitsa khutsia mu vuhaambe shichila vavula limanya;
vimilili venyu vaheelwa luyali valiitsa khukhutsa shichila inzala
ma vandu vanyishi valikhutsa shichila vuluhu.
14Khulwa yako, shilindwa shimali khwitsula luusa lunyishi khuvirilila
khandi shimali khwalaaminya munwa kwashio khuvira shichelo
vimilili vamenyanga mu Yerusalemi nende vandu vi liyooko va vimililanga vayongovelanga mushio.
15Shia mundu wosi aliitsa khuheelwa tsisoni,
ma vandu vilola voosi vakholwi khuva shindu vutswa.
16Navutswa Mwami Nyasaye wi Mikaanda Chiliihe aliitsa khuheelwa vukhumi shichila akholanga likhola liu vulunji,
khandi aliitsa khumanyinya vutakatifu vwevwe shichila nu wi likhola liu vulunji.
17Nalwo lwa makondi kaliitsa khwayamu khuli kayaanga mushiayo shiako;
vimeme vi tsimbuli viliitsa khwaya shia havundu hosi ha tsing'ombe tsiali nitsiakhomeela vulahi tsiayaakhu khale.
18Wooyi! Muli khu vutiinyu munyi vamukholanga vwoni khandi muveha,
munyi vamukhola vutamanu khuli mukhwesanga likaare ni mikoye.
19Munyi vamuvoolanga,
“Leshi Mwami Nyasaye akhole vwangu khurweshitsa kavooli alakhola,
khu khulolekhu;
Leshi Nyasaye Mutakatifu wa Israeli aloshitsi ka yenyanga khukhola;
leshi khulole ka akanakananga khukhola.”
20Wooyi! Muli khu vutiinyu munyi vamukholanga vindu vitamanu
numulola ndi mukholanga vindu vilahi;
vamulolanga shisuundi mamuvukula khuli nu vulavu,
vamulolanga vulavu mamuvukula khuli ni shisuundi,
vamuliitsanga shilulu nukanakana ni shinuulu
nu mulia shinuulu numukanakana ni shilulu.
21Wooyi! Muli khu vutiinyu munyi vamukanakananga muli nu vusitsa,
khandi mwacheliha muno.
22Wooyi! Muli khu vutiinyu munyi vamung'wetsanga idivai khuvira shichelo,
khandi mwamanyikhana nu munyi vamutsukanyinyanga viu khung'wa!
23Muheelwangwa asoya khu muvoholola vandu vali nu vutamanu,
navutswa mwikalila vandu vavula vutamanu vwosi khuvula khukholelwa katoto.
24Khulwa yako, khuli mulilu kusambanga nu kuyeelitsa ikhulio nende vunyasi vuuma khukwa likooshe,
nindio miili chiavo chiliitsa khukuunda
khandi mawua kavo kavungulukhanga, nikasalana khuli lukuushi;
shichila vayambakhana khulonda malako ku Mwami Nyasaye wi Mikaanda Chiliihe,
khandi vachaya likhuva lia Nyasaye Mutakatifu wa Israeli.
25Mwami Nyasaye wi Mikaanda Chiliihe avukulilanga vandu veve vurima,
khandi umali khwirechekha khuvarumula indovoshi.
Vikulu vitechelanga,
ma mivili chia vandu vakhutsa chialaakalala mu tsinjila tsi litaala likali khuli indakala.
Khali namali khukhola ndio, ashili nu vurima navo,
liikha lielie lishili khuvwa.
26Mwami Nyasaye achinganga ipendera ikulu
khuli shimanyilu shilanganga tsimbia tsimenyanga ihale wene.
Akhuvanga ifilimbi khutsilaanga khurula shia havundu hosi mu shivala;
khandi lolikhu khuli tsitsanga nitsilukhaka vwangu muno!
27Mundu avulakhuho khali mulala khuvo uvwetsanga tsingulu
inoho wisikarilanga,
khali urenjetsanga inoho ukonanga tsindolo;
khali wa lukhaanda lwelwe mu shisiindi lwateya;
khali wi shikhanda shi shilaro shieshie shiakhalikha.
28Mivanu chiavo chiali miuchi,
vura vwavo vwalingwa khulesa.
Tsimbakaywa tsi tsifarasi tsiavo tsiali tsindinyu khuli lichina liuchi,
khandi makurutumu ka makaare kavo
ka vongoyanga khuli shihungutsi.
29Vahumanga khuli isimba ihumanga,
vahumanga khuli vaana vi isimba vahumanga;
vanyenyekhanga nivakumila va vareeka,
vachinganga nivarilitsaho,
khandi mundu avulakhuho unyala khuvahonyinya.
30Valiitsa khuhuma huma khulitukhu lienelo khuvia vakumila, khuli inyanza ihumanga.
Niiva mundu alaheenza mu shivala
aliitsa khulola vutswa shisuundi nende linyakhana;
khali vulavu vuliitsa khumwaminywa na malesi kavwo kene.
Currently Selected:
ISAYA 5: LLLPRO
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013