ESITA 9
9
Vayahudi Vamulula Vatsiku Vavo
1Khulitukhu li likhomi na khavaka liu mweli kwi likhomi na khavili, nu kuli mweli kwa Adari, lilako liu Mwami Ahaseru lienyekhanga likholeshe. Khulitukhu lienelo vatsiku va Vayahudi vasuuvilanga valiitsa khuvalechelela ni tsingulu, navutswa ka vasuuvilanga kalikholekha ka vakhola tsisoni lwa vandu Vayahudi vavakuura. 2Vandu vivunjelitsa halala mu mataala kavo koosi kali mu tsisomo tsiosi tsiu Mwami Ahaseru yamihanga khukwana yava voosi vakhavanga khuvativitsa. Mundu avulakhuho wali unyala khukwana navo, shichila vandu vi tsimbia tsindi vali vavaria. 3Khali ndio, vimilili voosi vimililanga tsisomo vagavana, varumishi, nende vandu vasinjililanga vwamihi, vakhonya Vayahudi, shichila vali varia Modekai. 4Modekai yali wamanyikhana muno mu shivala shienesho khuli mundu wi tsingulu tsinyishi mu inzu yu vwami, luyali lwelwe lwalandikha shia havundu hosi mu tsisomo tsienetso; natsililila khunyola tsingulu tsinyishi. 5Vayahudi vareemaka vatsiku vavo voosi ni vivavi, nivaviira khandi nivavativitsa; manivakhola vatsiku vavo khuli venyanga.
6Vayahudi viira manivativitsa vandu tsimia tsiranu mu litaala lia Susa. 7Viira khandi Parasandatsa, Dalafoni, Asipatsa, 8Poratsa, Adalia, Aridatsa, 9Paramashita, Arisai, Aridai, nende Vahitsatsa, 10vaana vi shiyayi likhomi va Hamani mwana wa Hamedatsa, wali mutsiku wa Vayahudi. Navutswa shivayaayakhu shindu shiosi tawe.
11Khulitukhu lenelo, Mwami Ahaseru yavoolelwa isavu ya vandu voosi viirilwa mu litaala lia Susa. 12Khu, Mwami Ahaseru yavoolela Muruchi wi shikhali Esita, “Vayahudi vamali khwiira khandi vativitsi vandu tsimia tsiranu halala na vaana vi shiyayi likhomi va Hamani mu litaala lia Susa. Ni shina shia vakholi mu tsisomo tsiarikala tsiu Mwami Ahaseru yamihanga? Ni shina shia wenyanga khuhe? Khulakhuha shia wenyanga. Ni shina shia wenyanga ukholelwi? Ulakholelwa khandi.”
13Esita yachipa, “Niiva ka khuyaanzitsanga yivi mwami, uhuchilile Vayahudi vamenyanga mu litaala lia Susa vakhole khandi mukamba ka vahuchililwi khukhola nunundi. Ma uhaane lilako mivili chia vaana va Hamani likhomi chisunjwi khu misala.” 14Khu Mwami Ahaseru yavoola kakholeshe kario. Lilako liahaanwa mu litaala lia Susa, ma vaana vi shiyayi va Hamani nivasungwa. 15Vayahudi vi litaala lia Susa vivunjelitsa halala khandi khulitukhu li likhomi na khane liu mweli kwa Adari; niviira vandu vandi tsimia tsivaka mu litaala lienelo; navutswa shivayaayakhu shindu shiosi khandi tawe.
16Vayahudi vandi vamenyanga mu tsisomo tsiu Mwami Ahaseru yamihanga vivunjelitsa halala khwilinda vene nu khwishinga khurula khu vatsiku vavo. Viira valala khuvo tsiheelefu makhomi saba na varanu, navutswa shivavayaayakhu shindu shiosi tawe. 17Kenako kakholekha khulitukhu li likhomi na khavaka liu mweli wa Adari; khandi khulitukhu li likhomi na khane nivahulukha. Vakhola litukhu lienelo khuva liu khulia nu khwikhoya.
Mulukha kwa Purimu
18Vayahudi vamenyanga mu litaala lia Susa, vali vivunjelitsi halala khulitukhu li likhomi na khavaka nende likhomi na khane; khandi khulitukhu li likhomi na kharanu vahulukha manivalilomba live litukhu liu khulia nu khwikhoya. 19Nashio shivune shichilanga Vayahudi vamenyanga mu mataala mati vakholanga kenyekhanga khulitukhu li likhomi na khane liu mweli kwa Adari khulitukhu liu khwikhoya liu khuhulukha, litukhu liu khulia nu khuhelelana vihanwa vi shiukhulia.
20Modekai yahandika vindu viakholekha; naruma tsibarwa khu Vayahudi shia havundu hosi mu tsisomo tsiu Mwami Ahaseru yamihanga, have himbi inoho ihale wene; 21navavoolela vakhole kenyekhanga khulitukhu li likhomi na khane nende li likhomi na kharanu ku mweli wa Adari, khuva khuli matukhu ku khuhulukha shia muhika kwosi. 22Yaka nako kali matukhu ka Vayahudi vakuura vatsiku vavo; nakwo kwali mweli kwakalukhana nu kukwa mweli kwi likhoya nende vuyaanzi khurula mushivela nende liheenda mwoyo. Vavoolelwa vakhole kenyekhanga khumatukhu kenako khuvirila mu mulukha nende milukha chi lilia, nivaheelelana vene vihanwa khandi vukhonyi khu vandu vamanani. 23Khu, Vayahudi vahuchilila khutsililila nukhwikhoya khwavali nivraanjitsi nivakhola vindu via Modekai yali navahandichili vakhole.
24Hamani mwana wa Hamedatsa, wali mwitsukhulu wa Agagi, khandi wali mutsiku wa Vayahudi voosi, yali ukhavi khuli anyala khutivitsa Vayahudi khandi yali ukhuvi Puri, (nakhwo khuvoola ikura) khuvamulula nu khuvativitsa. 25Navutswa Esita yasimukha natsia khulola Mwami Ahaseru, ma mwami mwenoyo nahaana malako kahandikwa kachila Hamani navanzilwa ka yali nakanakane aliitsa khukhola Vayahudi -- ye halala na vaana veve vi shiyayi vasungwa khu misala. 26Khulwa yako, nako kachilanga matukhu kukhuhulukha kenako nikalaangwa Purimu, khurulana khulikhuva Puri. Khu, shichila vindu viosi viahandikwa mu ibarwa ya Modekai khandi shichila vindu viosi via vali nivaloli khandi viali nivikholeshe khuvo; 27Vayahudi varaanjitsa mwiima kwavo vene, kwa vitsukhulu vavo, khandi kwa mundu wosi unyala khwenya khukholwa Muyahudi, ndi litukhu lienyekhanga shia muhika kenyekhanga shia khase khosi vakhole kenyekhanga khumatukhu kavili kenako, khulondokhana khu mivaalo ka Modekai. 28Vaviritsa ndi shia vandu vi inzu ya Vayahudi va shia likhula liliitsa khuvaho mu shia lusomo khandi mu shia litaala vitsushitsi khandi vakhole kenyekhanga khumatukhu ka Purimu khumatukhu koosi kaliitsa khuvaho.
29Khu Muruchi wi shikhali Esita, mwana wi shikhana wa Abihaili, halala na Modekai, vahandika khandi ibarwa, nahaananga vunyali vwevwe vwosi khu ibarwa yeneyo shichila Purimu, ya Modekai yali niyahandika khale. 30Ibarwa yahandikwa khu Vayahudi voosi, khandi tsibarwa tsindi khurula khuyo tsiarumwa mu tsisomo tsiosi imia indala makhomi kavili na saba tsiu Mwami Ahaseru yamihanga. Ibarwa yeneyo yikombelanga Vayahudi vanyole milembe khandi vamenye vulahi 31khandi nivivaalila vo halala na vitsukhulu vavo vakhole kenyekhanga mumatukhu ka Purimu khusaa yenyekhanga, khuli vali vanyola malako khulondokhana khumatukhu kukhuhonga vuchila khulia khandi matukhu kukhwikhula. Modekai nende Esita navo vahaana malako kenako. 32Lilako lia Esita, liahuchilila malako shichila makhuva khu milukha chia Purimu, kahandikwa mu shitabu.
Currently Selected:
ESITA 9: LLLPRO
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013