ESITA 8
8
Esita Yahonyinya Vayahudi
1Khulitukhu lilala lienelo, Mwami Ahaseru yavukula miandu chiosi chiali chia Hamani, wali mutsiku wa Vayahudi, naha Muruchi wi shikhali Esita. Esita yavoolela Mwami Ahaseru ndi Modekai nu mwiikho wewe. Khuraanjila khulitukhu lienelo, Modekai yahuchililwa khwitsa imbeli wu Mwami Ahaseru. 2Mwami Ahaseru yarulitsa khu shitere ipete yali nu muhuuli kwekwe, ya yali nafwaluli Hamani; naha Modekai. Esita yaha Modekai vunyali vu khusinjilila miandu chiali chia Hamani.
3Nalwo lwa Esita yalomoloma khandi khu Mwami Ahaseru; Esita yasikama ha vilenje hehe nalila. Yamusaya akholekhu shindu khwikalila vindu vitamanu via Hamani, nali mwitsukhulu wa Agagi, yali naloshitsi khukhola Vayahudi. 4Mwami Ahaseru yachela Esita indovoshi yu vwami yalombwa khu itsahabu. 5Khu, Esita yasinjila navoola, “Niiva kakhuyaanzitsanga yivi Mwami Ahaseru, khandi niiva umbendelanga mwoyo, khandi niiva ulolanga likhola liu vulunji, nuyaanza haana lilako linyala khwikalila Hamani khuvula khurweshitsa malako ka mwana wa Hamedatsa, nali mwitsukhulu wa Agagi yahaana khulu khwenya khutivitsa Vayahudi mu shivala shioshio shia wamihanga. 6Khunyala khutsililila khwikhutsila munjila shina niiva matiinyu kenako kalanyola vandu vaanje mwene; ma viikho vaanje viirwi?”
7Khu, Mwami Ahaseru yachipa Muruchi wi shikhali Esita nende Modekai wali mundu Muyahudi, “Loli, mali khusunga Hamani shichila vindu vitamanu via yali naloshitsi khukhola Vayahudi; khandi mbele Esita miandu chiali chiechie. 8Navutswa likhuva liahandikwa khu vandu voosi khuvirila khu lira liu Mwami Ahaseru manilituuywikhu muhuuli ku vwami shilinyala khukalukhanyinywa tawe. Khu, munyala khuhandichila Vayahudi shindu shiosi shia mwenyanga; khandi munyala khuhandika khuvirila khu lira lianje mamutuuyikhu muhuuli ku vwami.”
9Khulitukhu lia makhomi kavili na khavaka liu mweli kwa khavaka, nu kuli mweli kwa Sivani, Modekai yalaanga vakarani voosi vu Mwami Ahaseru; navavoolela vahandichi tsibarwa khu Vayahudi, vagavana, varumishi, nende vimilili vi tsisomo imia indala makhomi kavili na saba khuraanjila India khutsia khutukha Etsopia. Tsibarwa tsiahandikwa khu shia lusomo mululomolomo lwalwo khandi mu mahandiko ka vandu vu lusomo lwenolo vahandikanga; khandi khu Vayahudi mululomolomo lwavo khandi mu mahandiko kavo vene. 10Modekai yavoola vahandichi tsibarwa tsienetso khuvirila khu lira liu Mwami Ahaseru; manatuuyakhu ni ipete yu muhuuli ku vwami. Vandu vahila tsibarwa tsienetso nivanini khu tsifarasi tsiali vwangu tsiakholanga muhinzilu ku Mwami Ahaseru, tsialiishitswangwa shiukhulia khurula mu inzu yu vwami.
11Khuvirila khu tsibarwa tsienetso, Mwami Ahaseru yahuchilila Vayahudi vamenyanga mu shia litaala khwivunjelitsa halala khandi khwilinda vene khurula khu vatsiku vavo, khutivitsa, khwiira khandi khumulula mukaanda kwa vasikali khurula mu vandu vuluhia inoho mu lusomo lwosi vanyala khuvakwana vo, vaana vavo nende vakhali vavo nu khuvayaaya miandu chiavo. 12Likhuva lienelo lienyekhanga likholwi khulitukhu lilala shia havundu hosi mu tsisomo tsiu Mwami Ahaseru, nilili litukhu li likhomi na khavaka liu mweli kwi likhomi na khavili, nu kuli mweli kwa Adari. 13Ibarwa yahandikwa yenyekhanga ilanditswi khuli lilako khandi imanyikhane khu mundu wosi mu shia lusomo; khandi Vayahudi venyekhanga virecheshe khulitukhu lienelo khuvanza vatsiku vavo. 14Khuvirila khu lilako liu Mwami Ahaseru yahaana, vandu vahilanga tsifarasi tsiarumikhanga mu muhinzilu kwi inzu yu vwami, vatsihila vwangu; ma lilako lienelo nilisomwa havulavu mu litaala lia Susa.
15Modekai yarula mu inzu yu vwami, niyifwali tsikaanzu tsiu vwami tsia bulu nende tsindavu, inguvu ya sambarau nende ikofia indahi yene yali ni yalombwa khu itsahabu. Khu, vandu vali nivali mu litaala lia Susa valaanjilila nukhwikhoya. 16Vayahudi vali nu vuyaanzi, lisangala nende luyali. 17Havundu hosi ha lilako liu Mwami Ahaseru lialanditswa, mu shia litaala nende mu lusomo Vayahudi vali ni litukhu liu khuhulukha lilikhoya nu khulia khandi liu vuyaanzi vunyishi muno. Khali ndio, vandu vandi vanyishi viyama havulavu ndi ni Vayahudi, shichila vali nivarili vandu venavo mumatukhu kenako.
Currently Selected:
ESITA 8: LLLPRO
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013