ESITA 7
7
Khuli Hamani Yiirwa
1Khu, Mwami Ahaseru nende Hamani vasimukha nivatsia khulia mu mulukha kwi lilia lia Esita yali nalombi. 2Lwa vali nivang'wetsanga idivai khulitukhu lia khavili lienelo, Mwami Ahaseru yamureeva khandi, “Mwami Esita, ni shina shia wenyanga? Mbolela makhuhe. Khali niiva ni inusu yu vwami vwanje, nakhuha.”
3Mwami Esita yamuchipa, “Niiva kakhuyaanzitsanga yivi Mwami Ahaseru ukholele ka nyenyanga khuvirila mu vwichehitsi, nakhayaanzi mbe mwoyo khandi vandu vaanje vave mwoyo. 4Inzi halala na vandu vaanje khwakuulitswa, khutivitswi, khwiirwi, makhumalwi. Niiva khwakhavele nu khwakuulitswa vutswa khuli varukwa vasatsa nende vakhali, shimbele nakhuvoolelakhu shindu shiosi tawe; shichila vutiinyu vweru shiuvunyala khuvalitswa khuli ni shindu khu Mwami Ahaseru tawe.” 5Khu, Mwami Ahaseru yavoolela Muruchi wi shikhali Esita, “Nu mundu shina ukanakananga khukhola likhuva lienelo? Ni hena ha mundu mwenoyo ali?”
6Esita yachipa, “Nu mutsiku weru, mundu ukhutambitsanga; nu mundu mutamanu Hamani!”
Hamani yaheenza Mwami Ahaseru halala nu Muruchi wi shikhali Esita natechelanga. 7Mwami Ahaseru yasinjila mu mulukha kwi lilia narulaho mu vurima, natsia mu mulimi kwi inzu yu vwami; navutswa Hamani yamanya Mwami Ahaseru umali khuviritsa khale khumusalilitsa, yarikala inyuma areeve Muruchi wi shikhali Esita nikanyalikha avuli khwiirwa. 8Lwa Mwami Ahaseru yakalukha narula mu mulimi kwi inzu yu vwami, khwitsa havundu ha vang'welelanga idivai, Hamani yali nasikame havundu ha Esita yali niyikhale. Nalwo lwa Mwami Ahaseru yavoola, “Toto, mundu uyu alanyerela Muruchi wi shikhali Esita imbeli wanje, mu inzu yanje yu vwami?”
Lwa Mwami Ahaseru yali nashili khumala khuvoola kenako, vakhunikha shindu khu murwi kwa Hamani. 9Khu, mulala khu vandu venavo, walaangwangwa Harabona, wali mulala khu vandu vali vitsili yavoola, “Khali Hamani yasimiikha misala hango hehe chiu khusungakhu Modekai, wahonyinya vulamu vwovwo yivi Uluyali Mwami Ahaseru. Misala chienecho chili nu vuraambi tsimita 22! ”
Mwami Ahaseru yavoola, “Leshi Hamani asunjwi khuchio!”
10Khu, Hamani yasungwa khu misala chia yali niyasiimikha khu Modekai alisungwa khuchio; ma vurima vu Mwami Ahaseru yali navwo nuvucheha.
Currently Selected:
ESITA 7: LLLPRO
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013