ESITA 6
6
Modekai Yaheelwa Luyali
1Khulitukhu lilala lienelo mu vutukhu, Mwami Ahaseru yakhaywa khukona, nahaana lilako vitabu vi tsinyinga, vili na makhuva kahandikwamu khulondokhana khuli yamihanga vilerwimu khandi nu khusomwa. 2Makhuva kanyolekha nikahandikwamu khulondokhana khuli Modekai yavoola havulavu ndi Bigitsana nende Tereshi, vitsili vivili viu Mwami Ahaseru valindanga mu shilivwa shi inzu yu vwami, valoshitsa khuli vanyala khwiira Mwami Ahaseru. 3Mwami Ahaseru yareeva, “Nu luyali shina inoho shihanwa shina shia Modekai yanyolakhu khulondokhana khu kenako?”
Varumishi veve vachipa, “Shindu shivulakhuho shia yakholelwa.”
4Mwami Ahaseru yareeva, “Ni viina unyala khuva nali mu lwanyi lwi inzu yu vwami?” Isaa yeneyo, Hamani yali niyakhinjila mu lwanyi lwi inzu yu vwami; yali witsi khuvoolela Mwami Ahaseru likhuva khulondokhana khuli Modekai anyala khusungwa khu misala chia yali nasimiishi. 5Nalwo lwa varumishi veve vachipa, “Hamani wusinjile mu lwanyi lwi inzu yu vwami yeyo alindililanga khukhulola.”
Mwami Ahaseru yavoola, “Muvooleli yinjili munu.”
6Khu, Hamani yinjilamu, ma Mwami Ahaseru namuvoolela, “Khuliho nu mundu wanzikombanga khuha luyali muno. Ukanakananga ni shina shianyala khukholela mundu mwenoyo?”
Hamani yireeva mu mwoyo, “Ni viina wundi uliho wu Mwami Ahaseru yikombanga khuha luyali muno? Ninzi, toto.”
7Khu, Hamani yachipa Mwami Ahaseru, “Mundu wa yivi Mwami Ahaseru uyaanzitswa khumuha luyali; 8haana lilako valere ikaanzu yu vwami ya yivi Mwami Ahaseru wifwali khandi ifarasi ya yivi uhilanga, ifarasi yili ni shimanyilu shiu vwami khu murwi kwayo. 9Nalwo lwa urovola mulala khu vimilili va wamihanga navo afwale mundu mwenoyo ikaanzu yeneyo, khandi amwimilili nanini khu ifarasi, khuvirila hakari hi litaala. Lekha mwimilili mwenoyo alaanjilili lwa mutsitsanga,
‘Lolikhu kakholekhanga khu mundu wa Mwami Ahaseru
yikombanga khuha luyali!’ ”
10Nalwo lwa Mwami Ahaseru yavoolela Hamani, “Khola vwangu utsi khulera ikaanzu nende ifarasi, khandi ukholele vutswa Muyahudi Modekai, wikhalanga ha shilivwa shi inzu yu vwami. Ulamukholela koosi ka yivi mwene uvooli.”
11Khu, Hamani yavukula ikaanzu nende ifarasi; nafwala Modekai, manamwimilila, niyikhale khu ifarasi. Yamuviritsila hakari hi litaala nalaanjilila navoolela vandu,
“Lolikhu kakholekhanga khu mundu wu Mwami Ahaseru
yikombanga khuha luyali!”
12Nalwo lwa Modekai yakalukha ha shilivwa shi inzu yu vwami. Navutswa Hamani yasimukha vwangu natsia munzu mwemwe, nalilanga muvuveleli mu tsimoni. 13Hamani yavoolela mukhali wewe Zereshi nende valina veve shia shindu shiosi shiakholekha khuye. Khu, mukhali wewe nende valina veve vu vusitsa vamuvoolela, “Niiva uranji khale khukoritsa vunyali vwovwo khu Modekai, mulala khu Vayahudi; shiukhusuuvilanga shiulamukuura tawe; navutswa toto uliitsa khwiirwa.”
14Lwa vali nivashilomolomanga naye, vitsili valindanga inzu yu vwami vatukhaho vwangu; vavukula Hamani nivamuhila mu mulukha kwi lilia lia Esita yali navalombele.
Currently Selected:
ESITA 6: LLLPRO
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013