LITSUSHITSWA 17

1“Muvuli khukholelakhu Mwami Nyasaye, uli Nyasaye wenyu musango kukhusinza ing'ombe inoho likondi lili ni imbala yosi; shichila Mwami Nyasaye wayambakhana kenako.

2“Niiva mundu musatsa inoho mukhali wumenyanga mu munyi, aliitsa khunyolekha mu lilala khu mataala ku Mwami Nyasaye amuheetsanga, nakholanga vwoni imbeli wu Mwami Nyasaye, uli Nyasaye wenyu vuchila khulonda lilakano lielie, 3lwa aliitsa khusaala inoho khurumishila vanyasaye vandi inoho liuva inoho mweli inoho tsinyining'ini, vuchila khukhola ka malako ku Mwami Nyasaye kenyanga; 4niiva muliitsa khuhulila makhuva khuli kenako, mukarunishitsi. Niiva ni kilikali, shindu shitamanu shienesho shiakholekha mu Vaisraeli, 5muliitsa khurulitsa mundu mwenoyo mu litaala nu khumulesa na machina, khutukha lwa aliitsa khukhutsa. 6Navutswa anyala khwiirwa, niiva vashiahidi kavili inoho kavaka vavooli makhuva khulondokhana khuye. Aliitsa khuvula khwiirwa, niiva khuliitsa khuvaho nu mushiahidi mulala wonyene vutswa. 7Vashiahidi navo valiitsa khuva vu khuraanga khulesa mundu mwenoyo na machina, ma vandu vandi voosi valiitsa khuva nivarikale valese mundu mwenoyo na machina khandi; numukhola ndio, muliitsa khurulitsaho vutamanu yuvu mu munyi vene.

8“Niiva makhuva ki shiyaalo matiinyu kaliitsa khulerwa mushiina shienyu, ma kamulechelele khuviritsa -- kave khwiirwa khu mundu, shiyaalo inoho manyekano - muliitsa khukahila havundu wu Mwami Nyasaye, uli Nyasaye wenyu aliitsa khurovola. 9Muliitsa khutsia khu vasalisi vuluhia lwa Levi, khandi khu mukhalachi wu kholanga muhinzilu mumatukhu kenako. Valiitsa khureeveshitsa makhuva kaliitsa khuva nikamulechelele khuviritsa, ma vamuvoolele kukhumalilikha. 10Valiitsa khumuvoolela khuli mukhola ma mukhole vutswa khuli vamuvoolela. 11Huchilili kavaviritsa lukhumalilikha, khandi mulonde mivaalo mu vuraambi kavo koosi. 12Mundu wosi wambakhana khulonda mukhalachi inoho musalisi wu kholanga muhinzilu khumatukhu kenako, aliitsa khwiirwa; numukhola ndio, muliitsa khurulitsaho vutamanu vwosi mu Vaisraeli. 13Vandu voosi valiitsa khuhulila nu khuria, khandi shivaliitsa khulechelitsa katushili khukholwa tawe.

Mivaalo khu Mwami wi Shivala

14“Lwa muliitsa khuva nu mwakhinjila mu shivala, shiu Mwami Nyasaye, uli Nyasaye wenyu amuheetsanga, mamuve mumenyamu, muliitsa khulola mwenyanga mwami unyala khumwamiha, khuli vandu vi tsimbia tsindi tsiosi tsili himbi khu munyi tsili naye. 15Muheenzishitsi mulole ndi mundu wa muliitsa khurovola khuva mwami, neye wu Mwami Nyasaye aliitsa khuva narovole. Mundu mwenoyo aliitsa khurula mu vandu venyu munyi vene. Muvuli khwamihitsakhu mundu mucheni khuva mwami wenyu. 16Mundu wa muliitsa khwamihitsa khuva mwami avuli khuva ni tsifarasi tsinyishi inoho khuvoolela vandu vakalushi mu shivala shia Misri, khukula tsifarasi tsindi tsinyishi; shichila Mwami Nyasaye wamuvoolela, ‘Muvuli khukalukha wamwarula khale.’ ” 17Mundu wa muliitsa khwamihitsa khuva mwami, aliitsa khuvula khuhila vakhali vanyishi. Nikakhavele kario, aliitsa khwambakhana khusuuvila mu Mwami Nyasaye. Aliitsa khuvula khwilomba muhinda ni ifetsa nende itsahabu. 18Lwa aliitsa khwamihitswa, aliitsa khwihandichilwa, mwene shitabu shieshie, shia malako kahandikwa mu shitabu shia malako ka Nyasaye nende mechitso keke kahandikwa khurula khu mechitso ku khuraanga kene, ka vasalisi vuluhia lwa Levi vavikha. 19Aliitsa khuva ni shitabu shienesho, khandi aliitsa khushisoma khumatukhu koosi kaliitsa khuva nashili mwoyo, khweka khuha Mwami Nyasaye luyali; nu khulonda munjila yatoto shia shindu shiosi shiahandikwa mushio. 20Kaliitsa khumwikalila khuvula khwichinjilila wavira Vaisraeli veshie, inoho khwambakhana khulonda malako munjila yosi. Nikakholeshe kario, ye nende vitsukhulu veve, valiitsa khwamiha shivala shieshie shia Israeli khumatukhu manyishi.

Currently Selected:

LITSUSHITSWA 17: LLLPRO

Highlight

Copy

Compare