LITSUSHITSWA 16

Mulukha kwa Pasaka

(Khur 12:1-20)

1“Muliitsa khuha Mwami Nyasaye, uli Nyasaye wenyu luyali, lwa mwikhoyelanga Mulukha kwa Pasaka khu mweli kwa Abibu. Vutukhu vulala vwele khu mweli kwenoko, navwo vwa yamurulitsa mu shivala shia Misri. 2Muliitsa khukhola musango ku khusinza shihanwa shiu Mulukha kwa Pasaka, lwa muliitsa khusinza lilala khu makondi kenyu inoho ing'ombe, havundu halala hele wu Mwami Nyasaye aliitsa khurovola khuva havundu ha muliitsa khusaala khuye, khulu khuha Mwami Nyasaye, uli Nyasaye wenyu luyali. 3Lwa muliitsa khulia shiukhulia shienesho, muvuli khuliakhu mukati kwalombwa na mamela; navutswa muliitsa khulia khumatukhu saba mukati kwalombwa vuchila mamela, khuli mwakhola lwa mwarula vwangu mu shivala shia Misri. Muliitsa khulia mukati yuku, kuliitsa khulaangwa mukati kwi linyakhana -- khumatukhu koosi ka muliitsa khuva numushili mwoyo; muliitsa khutsililila khwitsushitsa litukhu lia mwarula mu shivala shia Misri, havundu ha mwanyakhanilanga. 4Shia mundu wosi wumenyanga mu shivala shienyu, aliitsa khuvula khuva na mamela munzu mwemwe. Inyama yu muruku kwa vasinzi halukolovo khulitukhu liu khuraanga, iliitsa khuvula khulekhwa khutukha mu mavwevwe.

5“Muvuli khusinza muruku kwi shihanwa shiu Mulukha kwa Pasaka, mu litaala liosi liu Mwami Nyasaye, uli Nyasaye wenyu aliitsa khumuha; 6navutswa havundu wu Mwami Nyasaye, uli Nyasaye wenyu, aliitsa khurovola ha muliitsa khusaala khuye. Naho havundu ha muliitsa khusinzila shihanwa shiu muruku ku Mulukha kwa Pasaka halukolovo, lwa liuva liliitsa khuva niliyeelanga, nitsili tsisaa tsi litukhu lia mwarula mu shivala shia Misri. 7Muliitsa khuteekha inyama, nu khuchilia numuli havundu halala hele wu Mwami Nyasaye, uli Nyasaye wenyu aliitsa khurovola khuva havundu ha muliitsa khusaala khuye. Numumali khukhola kenako, munyala khukalukha ingo wenyu khulitukhu lilondakhu mu mavwevwe. 8Muliitsa khulia khumatukhu sita mukati kwalombwa vuchila mamela; khandi muliitsa khwakanila halala khulitukhu lia saba khusaala khu Mwami Nyasaye, uli Nyasaye wenyu. Muvuli khukholakhu muhinzilu kwosi khulitukhu lienelo.

Mulukha kwi Lichesa

(Khur 34:22; Lev 23:15-21)

9“Muliitsa khuvalitsa masitsa saba khurula khulitukhu lia muliitsa khuraanga khuchesa imu yenyu ni ikhoni, 10ma mwikhoyele Mulukha kwi Lichesa lienyu, khuha Mwami Nyasaye, uli Nyasaye wenyu luyali, lwa muliitsa khulera khuye shihanwa shiu khwirulitsa khuhaana nu mwoyo mulala, khulondokhana khuli aliitsa khuva niyamukasitsa. 11Mwikhoye muno imbeli wu Mwami Nyasaye, munyi halala na vaana venyu, varumishi venyu, nende vandu vu lwivulu lwa Levi, vandu vacheni, vavisandu nende vakhali vakhutsakhali vamenyanga mu mataala kenyu. Mukhole ndio havundu halala hele ha mutsitsanga khwakanila khusaala. 12Kenyekhanga mulole mulondi malako kenako; muvuli khwivilila mwali varukwa mu shivala shia Misri.

Mulukha kwa Matiili

(Lev 23:33-43)

13“Lwa muvetsanga nu mwakhahulaka imu yenyu yosi, khandi khukhamulula matunda kenyu koosi ki misabibu, muliitsa khwikhoyela khumatukhu saba Mulukha kwa Matiili. 14Muliitsa khuva nu vuyaanzi munyi halala na vaana venyu, varumishi venyu, nende vandu vu lwivulu lwa Levi, vandu vacheni, vavisandu, nende vakhutsakhali vamenyanga mu mataala kenyu. 15Muliitsa khuha Mwami Nyasaye, uli Nyasaye wenyu luyali lwa mwikhoyelanga khumatukhu saba mulukha yuku, havundu halala hele ha muliitsa khusaala khuye. Muliitsa khuva nu vuyaanzi vunyishi muno, shichila Mwami Nyasaye umali khukasitsa lichesa lienyu nende mihinzilu chienyu chia mukholanga.

16“Vandu vasatsa voosi vamenyanga mu shivala shienyu, valiitsa khusaala hali khavaka, khu Mwami Nyasaye khumuhika, havundu halala hele ha muliitsa khusaala khuye. Valiitsa khusaala nivikhoyelanga Mulukha Kukhulia Mukati kwalombwa vuchila Mamela, Mulukha kwi Lichesa nende Mulukha kwa Matiili. Shia mundu wosi khu munyi aliitsa khuleraho shihanwa 17khuli yinyalitsanga, khulondokhana khu tsikhaavi tsinyishi, tsiu Mwami Nyasaye yamukasitsa natsio.

Muhinzilu kwa Vakhalachi

18“Muliitsa khurovola vakhalachi nende vimilili va shia luhia lwenyu mu shia litaala liosi liu Mwami Nyasaye, uli Nyasaye wenyu amuheetsanga. Navo valiitsa khukhalachila vandu vuchila khwihonela vandi. 19Valiitsa khuvula khwikalila kali ku vulunji inoho khwihonela vandi, lwa valiitsa khuva ni va vakhalachilanga. Valiitsa khuvula khuhuchilila khuheelwa asoya, shichila asooya ivekhulitsanga khali vandu vali nu vusitsa, khandi vakoyanyinya likhola liu vulunji. 20Mulonde katoto khandi kilikali konyene vutswa, khu mumenye khandi muvukule shivala shiu Mwami Nyasaye, uli Nyasaye wenyu amuheetsanga mumenyemu.

21“Lwa muliitsa khumbakha vwaali vu Mwami Nyasaye, uli Nyasaye wenyu, muvuli khuvikha khuluveka lundi lu vwaali vwenovo shimanyilu shiu musambwa kwi shikhali kwa Ashera, shialombwa khu musala. 22Muvuli khusinjilitsakhu irilu yalombwa khu lichina khuva musambwa kukhusaalakhu, shichila Mwami Nyasaye, uli Nyasaye wenyu, wayambakhana vindu khuli vienevo.

Currently Selected:

LITSUSHITSWA 16: LLLPRO

Highlight

Copy

Compare