2 VATESALONIKE 3
3
Mukhusaalilikhu
1Lukhumalilikha, vasuuvili vashieru, mukhusaalilikhu, khulu khwenya likhuva liu Mwami litsililile khulanda vwangu, nu khuheelwa luyali, khuli kakholekha mu munyi. 2Mukhusaalilikhu khandi, nikanyalikha khuhonyinywi khurula mu vutamanu nende vandu vatamanu; shichila vandu voosi shivanyala khuva ni lisuuvila tawe.
3Navutswa Mwami neye musuuvilwa. Aliitsa khumuha tsingulu, nu khumulinda mu vulindi vulahi khurula khu Mutamanu Woyo. 4Mwami achilanga nu khuva ni lisuuvilitsa mu munyi ndi mukholanga, khandi muliitsa khutsililila khukhola shia shindu shiosi shia khumuvoolelanga.
5Mwami amwimilile muve ni limanya linyishi khulondokhana khu vuyaanzi vurulanga khu Nyasaye nende vwikhutsili vwa Kristo ahaananga.
Shia Mundu Wosi Akhole Muhinzilu
6Vasuuvili vashieru, khumuvoolelanga khuvirila mu lira liu Mwami weru Yesu Kristo, mulekhane na vasuuvili voosi vamenyanga limenya liu vukaara liu khuvula khukhola muhinzilu kwosi; khandi vambakhana khulonda mechitso ka khwamuvoolela. 7Munyi vene mwamanya vulahi khuli mwenyekhanga mulonde mwiima kweru. Shikanyala khuva khwali vandu vakara vavula muhinzilu ku khukhola, lwa khwamenyanga na munyi tawe. 8Shikanyala khuva khwaliakhu shiukhulia shiu mundu, vuchila khumurunga tawe. Navutswa khwakhola mihinzilu ni tsingulu, khandi nu khuchemulila. Khwatsililila khukhola mihinzilu mbasu nu vutukhu, shichila shiukhwali nu khwenyi khuve musiko mulitoho khu munyi tawe. 9Khwakhola ndio, shikali shichila khwali nu khuvula vunyali vu khukhonywa tawe; navutswa khwenyanga khutsi vene khumumanyinyi mwiima mulahi, kwa munyala khulonda. 10Khali lwa khwali nu khushili na munyi, khwali khwamenya nu khwavoola: “Niiva mundu aliitsa khwambakhana khukhola muhinzilu, avuli khulia.”
11Khuvoolanga ndio, shichila khuhulilanga ndi vandu valala vali mu munyi vamenyanga limenya liu vukaara, khandi vayikhala vutswa; nikhali vayaanza khwinjilila mu muhinzilu kwa vandu vandi. 12Khusayanga vandu khuli venavo, nivayaanza khuvirila mu vunyali vu Mwami, vakhole muhinzilu vene, khulu khunyola shiukhulia shiavo shia vanyala khulia.
13Navutswa munyi, vasuuvili vashieru, muvuli khuteteshela khukhola malahi. 14Niiva mundu aliitsa khwambakhana khulonda mivaalo keru, ka khwahandika mu ibarwa yeru, nu vulahi khumanya mundu mwenoyo. Muvuli khukholakhu shindu shiosi naye, nikanyalikha anyole tsisoni. 15Muvuli khumuvukula khuli nu mutsiku. Navutswa mumuchelihitsi khuli musuuvili weshie.
Milembe Chiukhumalilikha
16Mwami uchilanga nu khuva ni milembe, amuhe milembe khumatukhu koosi, khandi mu shia shindu shiosi. Mwami ave na munyi voosi.
17Inzi Paulu, mbandikanga nu mukhono kwanje ibarwa iyi: Nyoli milembe chianje. Nashio shimanyilu shia mbikhanga khu tsibarwa tsianje tsiosi. Nindio khandi mbandikanga.
18Tsimbavasi tsiu Mwami weru Yesu Kristo tsive na munyi voosi.
Currently Selected:
2 VATESALONIKE 3: LLLPRO
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013