2 VATESALONIKE 2
2
Likalukha liu Mwami Weru Yesu Kristo
1Vasuuvili vashianje, khulondokhana khulitukhu liu Mwami weru Yesu Kristo aliitsa khukalukha, khandi khuli khuliitsa khwivunjelitsa khumwakanila, musayanga numuyaanza, 2muvuli khuva vandu valiitsa khukoyanyinywa mu tsinganakani inoho khuheenditswa mwoyo khulondokhana khu livoola ndi Litukhu liu Mwami khukalukha liatukha khale. Haundi, kanyala khuva khwavoola ndio, lwa khwaprofeta inoho khwilwatsa, inoho khwa kahandika mu ibarwa. 3Mundu avuli khumukaatakhu mu shia shindu shiosi. Litukhu lienelo liliitsa khutukha, lwa Mahingani Kukhumalilikha kaliitsa khuva nikavwele, ma Mundu Mutamanu walaakwa khutivitswa mu shihatisi alilolekha. 4Aliitsa khuhinganyinya shia shindu shiosi shilaangwangwa nyasaye inoho shifwanani shiu khusaalakhu, nu khwikhola mwene khuva neye mwimilili wavio viosi. Khali aliitsa khwikhala mu Litempeli lia Nyasaye, nu khwikhola mwene khuva Nyasaye.
5Munyala khuva mushili khwitsushitsakhu ndi lwa nali nishili na munyi, namuvoolela makhuva kenako? 6Mumanyi nunundi shindu shimwikalilanga khukalukha, khu aliloleshitswa khulitukhu liatoto lienyekhanga. 7Tsingulu Tsiaviswa tsiu Mutamanu tsikholanga muhinzilu nunundi; navutswa woyo uliitsa khutsikalila khwikholekha, alatsililila khukhola ndio khutukha lwa aliitsa khumurulitsaho. 8Nalwo lwa Mundu Mutamanu mwenoyo aliitsa khuloleshitswa; navutswa lwa Mwami Yesu aliitsa khukalukha, aliitsa khumulula nu muya kurulanga mu munwa kwekwe nu khumutivitsa khuvirila muliang'ang'a liu khwitsa khwekhwe. 9Mutamanu Woyo aliitsa khwitsa khuvirila khu tsingulu tsia Shetani, nu khukhola viloleshitsu vinyishi nende vindu viu khuchenyinya viu vuvehi, 10khurumishila injila yosi yu vwoni, nikanyalikha khukaata yavo vali khunjila yu khutivitswa. Valiitsa khutivitswa shichila vambakhana khuyaanza katoto, khulu khuhonyinywa. 11Khulondokhana ni shivune yishi, Nyasaye wavaha tsingulu tsiu khukhola vindu vitamanu khwenya vasuuvili ku vuvehi; 12khandi ndi voosi valiitsa khukhalachilwa shichila vayambakhana khusuuvila katoto; navutswa vayaanzilila khukhola vwoni.
Mwarovolwa khu Muhonyinywi
13Navutswa vasuuvili vashieru, nivali munyi vu Mwami yayaanza, khusanditsinga Nyasaye shia khase khosi shichila munyi. Nyasaye neye wamurovola khurula muliraanga, khu muhonyinywi khuvirila mu tsingulu tsia Roho, khumukhola khuva vandu veve vatakatifu khuvirila mu lisuuvila lienyu mu katoto. 14Nyasaye neye wamulaanga shichila kenako, khuvirila mu Ivanjeli ya khwamwilwatsila, khu munyole shitonye shienyu mu vukhumi vu Mwami weru Yesu Kristo. 15Khulwa yako, vasuuvili vashieru, musinjile ni tsingulu, khandi mutsililile khumenya khulondokhana khu katoto ka khwamwechitsa, kave ni ka khwilwatsa inoho ka mweka khuvirila mu ibarwa yeru.
16Mwami weru Yesu Kristo mwene nende Nyasaye, uli Tata weru, wakhuyaanza khandi khuvirila mu tsimbavasi tsietsie nakhutinyilitsa khumatukhu koosi khandi na khuha lisuuvilitswa lilahi, 17amutinyilitse mu mioyo chienyu, khandi amuhe tsingulu tsiu khukhola shia muhinzilu kwosi mulahi khandi lilomoloma lilahi.
Currently Selected:
2 VATESALONIKE 2: LLLPRO
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013