MATHAYO 23

1HĨNDĨ ĩo Jesu akĩarĩria kĩrĩndĩ o na arutwo ake, 2akĩmera atĩrĩ, Andĩki-marũa o na Afarisai nĩmaikaragĩra gĩtĩ kĩa Musa: 3nĩ ũndũ ũcio maũndũ marĩa mothe mamwĩraga mwĩke, mekagei na mũmarũmagie: no tigagai gwĩka ta ũrĩa mekaga o ene; nĩ ũndũ o moigaga, na matiĩkaga. 4Na nĩmohaga mĩrigo mĩritũ, ĩrĩa ĩtitikagwo na hinya, makamĩigĩrĩrithia ciande cia andũ; no-o ene-rĩ, o na kĩara matingĩmĩhutia nakĩo. 5#Mat 6.1; Gũcok 6.8; Ndar 15.38.Na rĩrĩ, ciĩko ciao ciothe, maciĩkaga nĩguo monagwo nĩ andũ: nĩ ũndũ nĩmaaramagia ithitũ#23.5 Ithitũ icio cia Ayahudi nĩ tũthandũkũ tũnini twĩ na karatathi thĩini kaandĩkĩtwo tuugo twa Ibuku rĩa Ngai, tũkohwo gĩthiithi-inĩ (Gũcok 6.8). ciao, na nĩmaraihagia ciohe cia ndigi cia nguo ciao, 6na nĩmendaga gũikara handũ harĩa ha gũtĩo maruga-inĩ, na gũikarĩra itĩ cia mbere thunagogi-inĩ, 7na kũgeithio nĩ andũ ing’ang’a-inĩ, o na gwĩtagwo nĩ andũ, Rabii. 8No inyuĩ-rĩ, mũtikanetwo Rabii: nĩ gũkorũo ũmwe nĩwe Mũrutani wanyu, o na inyuĩ inyuothe mũrĩ a Ithe ũmwe. 9Ningĩ mũtikanete mũndũ o na ũmwe ithe wanyu gũkũ thĩ: nĩ gũkorũo ũmwe nĩwe Ithe wanyu, o ũrĩa wĩ Igũrũ. 10Ningĩ mũtikanetwo atongoria: nĩ gũkorũo ũmwe nĩwe Mũtongoria wanyu, nĩwe Kristo. 11#Mat 20.26,27; Mar 9.35; 10.43,44; Luk 22.26.No rĩrĩ, harĩ inyuĩ ũrĩa mũnene nĩatuĩke ndungata yanyu. 12#Luk 14.11; 18.14.Na mũndũ o wothe wĩtũũgagĩria, nĩakanyihio; na mũndũ o wothe wĩnyihagia, ũcio nĩagatũũgĩrio.

13No kaĩ mũrĩ na haaro-ĩ, inyuĩ aandĩki-marũa na Afarisai, hinga ici-ĩ! Nĩ gũkorũo nĩmũhingagĩra andũ ũthamaki wa Igũrũ: tondũ inyuĩ ene mũtitonyaga, o na kana mũkareka arĩa megũtonya matonye.

14[Kaĩ mũrĩ na haaro-ĩ, inyuĩ aandĩki-marũa na Afarisai, hinga ici-ĩ! Nĩ gũkorũo nĩmũnyamaragia nyũmba cia atumia a ndigwa, o mũkĩhoyaga mahoya maraya nĩguo mũhenanie: tondũ wa ũguo nĩmũgatuĩrũo ituĩro rĩa kũherithio makĩria.]

15Kaĩ mũrĩ na haaro-ĩ, inyuĩ aandĩki-marũa na Afarisai, hinga ici-ĩ! Nĩ gũkorũo mũringaga iria rĩrĩa inene na mũkorũra bũrũri, nĩguo mũgatũme mũndũ ũmwe atuĩke mũrũmĩrĩri wanyu, nake aatuĩka ũguo, mũgatũma acoke gũtuĩka mũrũ wa Jehanumu amũkĩrĩtie inyuĩ ene maita merĩ.

16Kaĩ mũrĩ na haaro-ĩ, inyuĩ atongoria atumumu! O inyuĩ muugaga, Mũndũ o wothe ũkwĩhĩta na hekarũ, ũguo ti ũndũ; no mũndũ o wothe ũkwĩhĩta na thahabu ĩrĩa ya hekarũ, ũcio nĩwe wĩohete. 17Inyuĩ irimũ ici na atumumu! Nĩ ũndũ-rĩ, nĩ kĩrĩkũ kĩnene, nĩ thahabu ĩo, kana nĩ hekarũ ĩrĩa ĩtũmĩte thahabu yamũrũo? 18Na ningĩ muugaga, Mũndũ o wothe ũkwĩhĩta na kĩgongona, ũguo ti ũndũ; no mũndũ o wothe ũkwĩhĩta na kĩndũ kĩrĩa kĩrĩ ho kĩrute, ũcio nĩwe wĩohete. 19Inyuĩ atumumu aya! Nĩ ũndũ-rĩ, nĩ kĩrĩkũ kĩnene, nĩ kĩndũ kĩrĩa kĩrute, kana nĩ kĩgongona kĩrĩa gĩtũmĩte kĩndũ kĩu kĩrute kĩamũrũo? 20Tondũ ũcio-rĩ, ũrĩa ũkwĩhĩta na kĩgongona, nĩehĩtĩte nakĩo kĩene, gwata indo ciothe iria irĩ ho. 21Nake ũrĩa ũkwĩhĩta na hekarũ, nĩehĩtĩte nayo nyene, gwata Ũrĩa ũtũire thĩinĩ wayo. 22#Isa 66.1; Mat 5.34.Nake ũrĩa ũkwĩhĩta na Igũrũ, nĩehĩtĩte na gĩtĩ-gĩa-ũthamaki kĩa Ngai, gwata Ũrĩa ũgĩikarĩire.

23 # Alaw 27.30. Kaĩ mũrĩ na haaro-ĩ, inyuĩ aandĩki-marũa na Afarisai, hinga ici-ĩ! Nĩ gũkorũo nĩmũhothaga gĩcunjĩ gĩa ikũmi gĩa terere#23.23 Terere: hau hekũgwetwo tũnyeni twa kũrĩo twatuagwo gĩthaka-inĩ kĩa bũrũri ũcio. na bithari, na thuu; no rĩrĩ, maũndũ ma watho marĩa marĩ bata makĩria, nĩmo gũtua ciira na kĩhooto, o na kũiguanĩra tha, o na gwĩtĩkia, macio-rĩ, mũtimekaga: ĩndĩ nĩmo mwaagĩrĩirũo nĩ gwĩkaga, o na mũtikaage gwĩkaga macio mangĩ. 24Inyuĩ atongoria atumumu! O inyuĩ mũkeeraga rũmuru, na mũkameria ngamĩra.

25Kaĩ mũrĩ na haaro-ĩ, inyuĩ aandĩki-marũa na Afarisai, hinga ici-ĩ! Nĩ gũkorũo mũtheragia gĩkombe na thani na igũrũ; no thĩinĩ-rĩ, ciiyũire ũtunyani na ũhahanyi. 26Wee Mũfarisai ũyũ mũtumumu! Amba ũtherie gĩkombe na thani na thĩinĩ, nĩ getha o na igũrũ nakuo gũtuĩke gũtheru.

27 # Atũm 23.3. Kaĩ mũrĩ na haaro-ĩ, inyuĩ aandĩki-marũa na Afarisai, hinga ici-ĩ! Nĩ gũkorũo mũhaanaine na mbĩrĩra cierũhĩtio na mũũnyũ, iria cionagwo irĩ thaka na igũrũ, no thĩinĩ ciiyũrĩte mahĩndĩ ma andũ akuũ, na gĩko kĩa mĩthemba yothe. 28No taguo o na inyuĩ muonagwo na igũrũ athingu mũrĩ, no thĩinĩ mũiyũrĩtwo nĩ ũhinga na waganu.

29Kaĩ mũrĩ na haaro-ĩ, inyuĩ aandĩki-marũa na Afarisai, hinga ici-ĩ! Nĩ gũkorũo mwakaga mbĩrĩra cia anabii na mahiga, na mũkagemia mahiga ma kĩririkano kĩa andũ arĩa athingu, ningĩ mũkoiga atĩrĩ, 30Tũngĩarĩ muoyo ithuĩ matukũ ma maithe maitũ, tũtingĩagwatanĩire nao magĩitithia thakame ya anabii. 31Ũguo nĩguo mwĩumbũraga atĩ nĩ inyuĩ ariũ a arĩa moragire anabii. 32No kĩiyũrĩrĩriei kĩgeri kĩrĩa kĩa maithe manyu. 33#Mat 3.7; 12.34; Luk 3.7.Inyuĩ nyamũ-cia-thĩ! Njiaro cia ndwĩra! Mũkahonoka atĩa mũtigatuĩrũo ituĩro rĩa Jehanumu? 34Nĩ ũndũ ũcio-rĩ, ngũmũrekeria anabii, na andũ ogĩ, na aandĩki-marũa: na amwe ao rĩmũkamoraga, na mũmaambithie mĩtĩ igũrũ; na amwe nĩmũkamahũrithĩria thunagogi-inĩ cianyu na iboko irĩ njaaga, na mũmanyarire kuuma itũũra-inĩ rĩmwe kinya itũũra rĩrĩa rĩngĩ: 35#Kĩam 4.8; 2 Maũ 24.20,21.nĩguo atĩ inyuĩ mũcokererũo nĩ thakame ya andũ othe athingu ĩrĩa yanaitwo thĩ, gwata thakame ya Habili ũrĩa mũthingu, nginya thakame ya Zakaria mũrũ wa Barakia, ũrĩa mworagĩire gatagatĩ ka Handũ harĩa Hatheru na kĩgongona. 36Ngũmwĩra atĩrĩ na ma, atĩ maũndũ macio mothe nĩmagakinyĩrĩra rũciaro rũrũ.

37Atĩrĩrĩ, Jerusalemu, Jerusalemu! Wee ũũragaga anabii, na ũkahũra na mahiga arĩa marekagio kũrĩ wee! Nĩ mahinda maigana atĩa ndanenda gũcokanĩrĩria ciana ciaku hamwe, o ta ũrĩa ngũkũ ĩcokanagĩrĩria tũcui twayo nguruĩ ya mathagu mayo, na mwanarega? 38#Jer 22.5.Atĩrĩrĩ, nyũmba yanyu nĩ ndige ĩrĩ thuthĩku. 39#Thab 118.26.Nĩ ũndũ ngũmwĩra atĩrĩ, Kuuma rĩu, mũtigacoka kũnyona, nginya rĩrĩa mũkoiga atĩrĩ, Kũrathimwo-rĩ, nĩ ũrĩa ũgũũka na rĩĩtwa rĩa Mwathani.

Currently Selected:

MATHAYO 23: OGKBIBLE

Highlight

Copy