MATHAYO 22

1NAKE Jesu akĩmahe ũhoro rĩngĩ na ngerekano, akiuga atĩrĩ, 2Ũthamaki wa Igũrũ nĩ wa kũhaananio na mũthamaki mũna warugire iruga mũriũ akĩhikania, 3agĩtũma ngombo ciake igete arĩa metĩtwo, nĩ getha moke iruga-inĩ rĩu rĩa kĩhikanio: nao makĩrega gũũka. 4Nake agĩcoka agĩtũma ngombo ingĩ, agĩciĩra atĩrĩ, Ĩrai acio metĩtwo, Atĩrĩrĩ, nĩ’thondekete irio ciakwa: ndegwa ciakwa o na ngoima nĩithĩnjĩtwo, na indo ciothe nĩ thondeke: ũkani iruga-inĩ rĩa kĩhikanio. 5No rĩrĩ, andũ acio makĩraria ũndũ ũcio, magĩĩthiĩra; ũmwe agĩthiĩ mũgũnda wake, na ũngĩ agĩthiĩ wonjoria-inĩ wake: 6na arĩa angĩ makĩnyita ngombo ciake, magĩciĩka ũũru na magĩciũraga. 7Nake mũthamaki ũcio akĩrakara; akĩrekia mbũtũ ciake, akĩnina oragani acio, agĩcina itũũra rĩao. 8Hĩndĩ ĩo akĩĩra ngombo ciake atĩrĩ, Iruga rĩa kĩhikanio nĩ rĩthondeke, no rĩrĩ arĩa metĩtwo matiagĩrĩire kũrĩa. 9Nĩ ũndũ ũcio thiĩi magomano-inĩ ma ing’aratua, na arĩa othe mũrĩona, metei moke iruga-inĩ rĩa kĩhikanio. 10Na ngombo icio ikiumagara, igĩthiĩ ing’aratua-inĩ, ikĩũngania arĩa othe cionire, arĩa oru o na arĩa ega: nakĩo kĩhikanio gĩkĩiyũra ageni. 11No rĩrĩa mũthamaki ũcio aatonyire arore ageni acio, akĩona ho mũndũ ũtehumbĩte nguo ya kĩhikanio: 12akĩmũũria atĩrĩ, Mũrata wakwa, ũtonyire atĩa haha ũtarĩ na nguo ya kĩhikanio? Nake agĩkira ki. 13#Mat 8.12; 25.30; Luk 13.28.Hĩndĩ ĩo mũthamaki akĩĩra ngombo ciake, Muohei moko na magũrũ, mũmũikie na nja, kũrĩa kwĩ nduma; kũu nĩkuo gũkagĩa kĩrĩro na kũhagarania magego. 14Nĩ ũndũ arĩa metĩtwo nĩ aingĩ, no arĩa mathurĩtwo nĩ anyinyi.

15Hĩndĩ ĩo Afarisai magĩthiĩ ndundu mamenye ũrĩa mangĩhota kũmũtega akĩaria. 16Magĩtũma arutwo ao me na Aherodia kũrĩ we, makiuga atĩrĩ, Mũrutani ũyũ, nĩtũũĩ atĩ ũrĩ wa ma, o na atĩ nĩũrutanaga ũhoro wa njĩra ya Ngai na ma, o na ndũũragia irũngo rĩa mũndũ o na ũrĩkũ: nĩ ũndũ ndũroraga ũrĩa andũ matariĩ gĩthiithi. 17Nĩ ũndũ ũcio-rĩ, ta twĩre ũrĩa ũgwĩciria. Nĩ wega Kaisari arutagĩrũo mbia cia igoti, kana ti wega? 18Nowe Jesu akĩmenya ũũru wao akĩmacokeria atĩrĩ, Mũkũngeria nĩkĩ, hinga ici? 19Nyoniai kĩrĩa mũrutaga kĩa igoti. Nao makĩmũtwarĩra ciringi. 20Nake akĩmoria atĩrĩ, Mũhianano ũyũ na rĩĩtwa rĩrĩ nĩ cia ũ? 21Makĩmwĩra, Nĩ cia Kaisari. Nake akĩmera, Tondũ ũcio nengagĩrai Kaisari indo iria cia Kaisari, o nake Ngai, mũmũnengagĩre indo cia Ngai. 22Nao maaigua ũguo, makĩgega, magĩtigana nake magĩĩthiĩra.

23 # Atũm 23.8. Mũthenya ũcio Asadukai, nĩo arĩa moigaga atĩ andũ arĩa akuũ matikariũka, magĩũka kũrĩ we makĩmũũria atĩrĩ, 24#Gũcok 25.5.Mũrutani, Musa oigire atĩ, Mũndũ angĩkua atarĩ na ciana, mũrũ wa nyina nĩathambie mũtumia ũcio, nĩ getha acokerie mũrũ wa nyina mbeũ. 25Rĩu-rĩ, gwitũ nĩkwarĩ andũ mũgwanja a nyina ũmwe, nake ũrĩa mũkũrũ akĩhikania, agĩkua, na ndatige mbeũ, agĩtigĩra mũrũ wa nyina mũtumia; 26na ũrĩa wa kerĩ, o na wa gatatũ nake, o na ningĩ othe nginya ũrĩa wa mũgwanja, magĩĩka o ũguo. 27Na thutha wao othe, mũtumia ũcio o nake agĩkua. 28Rĩu-rĩ, rĩrĩa andũ arĩa akuũ makariũka-rĩ, mũtumia ũcio agatuĩka wa ũrĩkũ wa acio mũgwanja? Nĩ gũkorũo aakĩrĩ mũtumia wao othe. 29Nake Jesu akĩmacokeria akĩmera, Mũkũhĩtia, nĩ ũndũ mũtiũĩ Maandĩko o na kana hinya wa Ngai. 30Tondũ rĩrĩa arĩa akuũ makariũka, matikahikanagia, kana makahikio; no rĩrĩ, magatuĩka ta araika arĩa marĩ Igũrũ. 31Naho ha ũhoro wa kũriũka kwa arĩa akuũ-rĩ, kaĩ mũtathomete ciugo iria mwerirũo nĩ Ngai, akiuga, 32#Thama 3.6.Nĩ niĩ Ngai wa Iburahimu, Ngai wa Isaaka, o na Ngai wa Jakubu? Ngai-rĩ, ti Ngai wa arĩa akuũ no wa arĩa marĩ muoyo. 33Nakĩo kĩrĩndĩ kĩaigua ũguo, gĩkĩgega nĩ ũndũ wa ũrutani wake.

34No Afarisai, rĩrĩa maaiguire atĩ nĩaahootire Asadukai, magĩkĩũngana hamwe. 35Na ũmwe wao, wĩ mũrutani wa mawatho, akĩmũũria atĩrĩ, nĩguo amũgerie, 36Mũrutani, rĩathani rĩrĩa inene watho-inĩ nĩ rĩrĩkũ? 37#Gũcok 6.5.Nake akĩmũcokeria atĩrĩ, Enda Mwathani Ngai waku na ngoro yaku yothe, na muoyo waku wothe, na gwĩciria gwaku guothe. 38Rĩu nĩrĩo rĩathani rĩrĩa inene, na rĩa mbere. 39#Alaw 19.18.Narĩo rĩa kerĩ, rĩhaana o ta rĩu, nĩ rĩrĩ, Enda mũndũ ũrĩa ũngĩ o ta ũrĩa wĩendete wee mwene. 40#Luk 10.25-28.Maathani macio merĩ nĩmo gatũũrũ ka watho wothe, o na ka mohoro mothe ma anabii.

41Na hĩndĩ ĩo Afarisai monganĩte-rĩ, Jesu akĩmoria atĩrĩ, 42Ha ũhoro wa Kristo, muugaga atĩa? Nĩ mũrũ wa ũ? Makĩmũcokeria atĩrĩ, Nĩ wa Daudi. 43Nake akĩmoria atĩrĩ, Na nĩkĩ gĩagĩtũmire Daudi, arĩ na Roho, amwĩte Mwathani wake, rĩrĩa oigire,

44 # Thab 110.1. Mwathani nĩerire Mwathani wakwa atĩrĩ,

Ikara thĩ guoko-inĩ gwakwa kwa ũrĩo,

Mũira wa ngaiga thũ ciaku ruungu rũa magũrũ maku?

45Rĩu-rĩ, akorũo Daudi nĩamwĩtĩte Mwathani, angĩkĩhota atĩa gũtuĩka mũrũwe? 46Na gũtirĩ mũndũ wahotire kũmũcokeria kiugo o na kĩmwe: na kuuma mũthenya ũcio gũtirĩ mũndũ wacokire gweta kũmũũria ciũria ingĩ.

Currently Selected:

MATHAYO 22: OGKBIBLE

Highlight

Copy