IBUKU RĨA JOSHUA 1
1
1NA GŨGĨKINYA atĩrĩ, atĩ Musa, ndungata ya Jehova, aarĩkia gũkua, Jehova akĩaria na Joshua wa Nuni, ũrĩa watungatagĩra Musa, akĩmwĩra atĩrĩ, 2Musa ndungata yakwa nĩakuĩte; tondũ ũcio rĩu gĩũkĩre ũringe rũũĩ rũrũ rũa Jorodani, wee mwene, o na andũ aya othe, mũthiĩ mũkinye bũrũri ũrĩa ngũmahe, o ũcio ngũhe ciana cia Isiraeli. 3#Gũcok 11.24,25.Na rĩrĩ, handũ o hothe harĩa mũgakinya na ikinya rĩa magũrũ manyu, hau nĩndamũhe, o ta ũrĩa nderire Musa. 4Nakuo kũndũ kũrĩa mĩhaka yanyu ĩgakinya, nĩ kuuma werũ-inĩ o nginya kũu Lebanoni, o na kuuma rũũĩ rũrĩa rũnene rũĩtagwo Farati, bũrũri wothe wa Ahiti, o nginya iria-inĩ rĩrĩa inene mwena ũrĩa riũa rĩthũagĩra. 5#Gũcok 31.6,8; Ahib 13.5.Gũtikagĩa mũndũ o na ũmwe ũkahota gũgwĩtiiria matukũ mothe ma muoyo waku; o ta ũrĩa ũhoro witũ na Musa watariĩ, o ũguo noguo ũhoro witũ nawe ũgũikara; ndigagũtigĩrĩra, kana ndigane nawe. 6#Gũcok 31.6,7,23.Gĩa na hinya, na ũũmĩrĩrie, nĩ gũkorũo nĩwe ũgatũma andũ aya magae bũrũri ũrĩa nderĩire maithe mao na mwĩhĩtwa atĩ nĩngamahe. 7No rĩrĩ, wee gĩta o kũgĩa na hinya, na ũũmĩrĩrie mũno, ũmenyagĩrĩre gwĩka maũndũ mothe o ta ũrĩa watho ũtariĩ ũrĩa Musa, ndungata yakwa, aagwathire wĩkage; ndũkanagarũrũke na mwena wa ũrĩo o na kana wa ũmotho, ũũtige, nĩ getha ũgĩage na ũũgĩ maũndũ-inĩ maku handũ o hothe harĩa ũrĩthiaga. 8Ciugo cia ibuku rĩrĩ rĩa watho itikanatige kwario na kanua gaku; no makĩria nĩũgeciragia mohoro ma cio mũthenya o na ũtukũ, nĩ getha ũmenyagĩrĩre gwĩka o ta ũrĩa ũhoro wothe ũtariĩ ũrĩa wandĩkĩtwo thĩinĩ warĩo; nĩ gũkorũo weka ũguo, mĩthiĩre yaku nĩĩgatũma ũgaacĩre, o na ningĩ nĩũkagĩaga na ũũgĩ maũndũ-inĩ maku. 9Githĩ ti niĩ ngwathĩte? Wee gĩta o kũgĩa na hinya, na ũũmĩrĩrie mũno; ndũkanetigĩre, o na kana ũmake, nĩ ũndũ Jehova Ngai waku e hamwe nawe handũ o hothe harĩa ũrĩthiaga.
10Hĩndĩ ĩo Joshua agĩatha anyabara arĩa maaroraga andũ, akĩmera atĩrĩ, Thiĩi kũndũ guothe kĩraaro-inĩ mwathe andũ, mũmere atĩrĩ, 11Wĩthondekerei rĩĩgu, mũũige, nĩ ũndũ matukũ matatũ maathira nĩguo mũkaringa rũũĩ rũrũ rũa Jorodani, nĩ getha mũthiĩ mũtonye bũrũri ũrĩa Jehova Ngai wanyu amũheaga, mũkawĩgwatĩre ũtuĩke wanyu.
12 #
Ndar 32.28-32; Gũcok 3.18-20; Josh 22.1-6. Ningĩ Joshua akĩarĩria Areubeni, na Agadi, o na nuthu ĩrĩa ya mũhĩrĩga wa Manase, akĩmera atĩrĩ, 13Ta ririkanai ũhoro ũrĩa Musa ndungata ya Jehova aamũheire, akiuga atĩrĩ, Jehova Ngai wanyu nĩekũmũhe ũhurũko, o naguo bũrũri ũyũ nĩekũmũhe. 14Atumia anyu, na ciana cianyu, na ũhiũ wanyu, megũikara bũrũri ũyũ Musa aamũheire, mũrĩmo ũyũ wa Jorodani; no rĩrĩ, inyuĩ arũme, inyuothe arĩa mũrĩ njamba irĩ hinya, nĩmũkaringa mũrĩmo mũtuĩke ngerewani ya ariũ a ithe wanyu, mwĩohete indo cianyu cia ita, nĩ getha mũkamateithie, 15o nginya hĩndĩ ĩrĩa ariũ a ithe wanyu magakorũo maheetwo ũhurũko nĩ Jehova, o ta ũrĩa inyuĩ na inyuĩ mũheetwo, o nao makorũo megwatĩire bũrũri ũrĩa Jehova Ngai wanyu ekũmahe ũgatuĩke wao; hĩndĩ ĩo nĩguo mũkahũndũka mũcoke bũrũri ũyũ mũheetwo ũtuĩke wanyu kĩũmbe, o mũrĩmo ũyũ wa Jorodani, o ũyũ ũrorete irathĩro rĩa riũa. 16Nao magĩcokeria Joshua makĩmwĩra atĩrĩ, Maũndũ marĩa mothe ũtwathĩte nĩtũkũmeka, o na kũrĩa guothe ũgatũtwara, nĩtũgathiĩ. 17Na atĩrĩrĩ, o ta ũrĩa twaiguaga Musa maũndũ-inĩ mothe, ũguo noguo tũrĩkũiguaga wee; no rĩrĩ, Jehova arogĩta o gũikara hamwe nawe, o ta ũrĩa aaikarĩte hamwe na Musa. 18Mũndũ ũrĩa wothe ũgakũrema arege gwĩka ũrĩa wathanĩte, o na aage kũigua mohoro marĩa ũkũmũhe maũndũ-inĩ marĩa mothe ũkũmwĩra-rĩ, mũndũ ũcio nĩ kũũragwo akoragwo; no rĩrĩ, wee gĩta o kũgĩa na hinya, na ũũmĩrĩrie.
Currently Selected:
IBUKU RĨA JOSHUA 1: OGKBIBLE
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
