AGALATIA 2
2
1 #
Atũm 11.30; 15.2. NINGĨ mĩaka ikũmi na ĩna yathira-rĩ, nĩndacokire kwambata Jerusalemu, twĩ na Baranaba, o na tũgĩthiĩ na Tito. 2Na ngĩthiĩ nĩ ũndũ wa ũrĩa ndaguũrĩirio atĩ ’thiĩ, ngĩmataũrĩra Ũhoro-ũrĩa-Mwega ũrĩa ndũire ’hunjagĩria Ndũrĩrĩ. No rĩrĩ, ndaũtaũrĩire o andũ arĩa marĩ igweta, hatarĩ andũ angĩ, nĩguo gũtigatuĩke hihi atĩ nĩ gũteng’era ndĩrateng’era tũhũ, o na kana ndanateng’era tũhũ wĩra-inĩ wakwa. 3O nake Tito, ũcio twarĩ hamwe nake, o na aarĩ Mũyunani, ndaigana kũhatĩrĩrio atĩ aruithio. 4Ũguo noguo-rĩ, o na kwarĩ na ariũ a Ithe witũ a maheni arĩa maatonyetio na hitho, mokĩte gũtuĩria ũhoro witũ wa gũikara tũtarĩ ohe nĩ watho, nĩ ũndũ wa ũrĩa twohoretwo nĩ Kristo Jesu, nĩguo macoke gũtuoha ũkombo-inĩ. 5Andũ acio-rĩ, tũtietĩkĩrire gwathĩka nĩo o na kahinda kanini, nĩ getha ũhoro-wa-ma, ũrĩa wonekete na Ũhoro-ũrĩa-Mwega, wĩkindĩre wega kũrĩ inyuĩ. 6#Gũcok 10.17.Nao andũ acio monagwo marĩ igweta-rĩ, (ũguo matariĩ niĩ ndikuona arĩ bata, nĩ gũkorũo Ngai ndaroraga ũrĩa mũndũ atariĩ) - acio marĩ igweta-rĩ, matiigana kũnyongerera o na kaũndũ: 7aca, no makĩria, hĩndĩ ĩrĩa monire atĩ nĩ niĩ ndatuirũo wa kũhunjia Ũhoro-ũrĩa-Mwega kũrĩ andũ arĩa mataruaga, o ta ũrĩa Petero aatuĩtwo wa kũũhunjĩria arĩa maruaga-rĩ, 8(nĩ gũkorũo we ũrĩa wahotithirie Petero gũtuĩka mũtũmwo wa andũ acio maruaga, nowe wa’hotithirie o na niĩ nduĩke mũtũmwo wa andũ arĩa mataruaga); 9o na ningĩ, maarĩkia kũmenya Wega wa Ngai ũrĩa ndaheetwo-rĩ, Jakubu na Kefa na Johana, o acio monagwo marĩ itugĩ cia gũtiira kanitha, nĩmaatũgeithirie na moko ma ũrĩo, twĩ na Baranaba, ta kuonania atĩ tũrĩ ngwatanĩro nao, nĩ getha ithuĩ tũthiage kũrĩ Ndũrĩrĩ, o nao mathiage kũrĩ andũ arĩa maruaga. 10Ĩndĩ ũrĩa mendaga mũno no atĩ tũririkanage athĩni; naguo ũndũ o ũcio-rĩ, nĩguo ndakoretwo ndĩ na kĩyo gĩa kũwĩka.
11No rĩrĩ, hĩndĩ ĩrĩa Kefa okire Antiokia, nĩndamũkararirie o ũthiũ-inĩ wake, nĩ ũndũ nĩonetwo ahĩtĩtie. 12Nĩ gũkorũo, andũ amwe moimĩte kũrĩ Jakubu matanakinya-rĩ, maarĩanagĩra na andũ a Ndũrĩrĩ ingĩ: no rĩrĩ, andũ acio maakinya-rĩ, agĩgĩtiga gwĩka ũguo, akĩĩamũra, tondũ wa gwĩtigĩra andũ arĩa maruaga. 13O na Ayahudi arĩa angĩ makĩgwatanĩra nake ũhinga, o nginya o na Baranaba nake agĩtwarĩrĩrio nĩ ũhinga wao. 14No rĩrĩ, hĩndĩ ĩrĩa ndonire atĩ matiathiaga na mĩthiĩre ĩrĩa ĩrũngĩrĩirie, o ta ũrĩa ũhoro-wa-ma ũtariĩ, ũrĩa wonanĩtio nĩ Ũhoro-ũrĩa-Mwega-rĩ, ngĩkĩĩra Kefa, andũ othe marĩ ho, atĩrĩ, Ũngĩkorũo wee, ũkĩrĩ Mũyahudi, ũtũũraga na mĩtũũrĩre ya Ndũrĩrĩ, na ti ta Mũyahudi-rĩ, nĩ kĩ gĩtũmaga ũhatĩrĩrie andũ a Ndũrĩrĩ matũũre na mĩtũũrĩre ya Ayahudi?
15Ithuĩ, tũrĩ Ayahudi gũciarũo, na tũtarĩ ehia ta andũ a Ndũrĩrĩ-rĩ, 16#Thab 143.2; Rom 3.20; Rom 3.22.nĩ ũndũ wa ũrĩa tũũĩ atĩ mũndũ ndatuagwo mũthingu nĩ gwĩkaga maũndũ marĩa maathane nĩ watho, tiga o ũndũ wa kwĩhoka Jesu Kristo-rĩ, na ithuĩ nĩtwĩhokete Kristo Jesu nĩ getha tũtuwo athingu nĩ ũndũ wa ũguo tũmwĩhokete ũcio Kristo, na ti ũndũ wa gwĩkaga maũndũ marĩa maathane nĩ watho; nĩ gũkorũo gũtirĩ mũndũ ũgatuwo mũthingu nĩ ũndũ wa gwĩkaga maũndũ ma watho. 17No rĩrĩa twendaga gũtuwo athingu nĩ ũndũ wa Kristo, tũngĩkorũo ithuĩ ene tũrĩ ehia-rĩ, kaĩ Kristo angĩgĩtuĩka o ndungata ya wĩhia? Hĩ, kũroaga gũtuĩka ũguo! 18Nĩ ũndũ-rĩ, ingĩgĩcoka gwaka rĩngĩ kũrĩa ndatharũrĩtie, nĩngwĩtua mwagarari watho. 19Nĩ ũndũ niĩ-rĩ, nĩndakuĩrĩire watho ngĩtigana naguo na ũndũ wa watho o ro ũcio-rĩ, nĩ getha ndũũre muoyo ndĩ wa Ngai. 20Nĩnyambanĩirio na Kristo mũtĩ igũrũ, no ndĩ o muoyo; ĩndĩ rĩu ti niĩ ndũũraga muoyo, nĩ Kristo ũtũũraga muoyo thĩinĩ wakwa: naguo muoyo ũrĩa ndũũraga naguo rĩu, ndĩ na mwĩrĩ, ndũũraga naguo no ũndũ wa gwĩtĩkia Mũrũ wa Ngai, o we wanyendire, agĩkĩĩruta nĩ ũndũ wakwa. 21Ndiraragia Wega wa Ngai: amu-rĩ, ũthingu ũngĩkorũo wonekaga nĩ ũndũ wa watho-rĩ, no gũtuĩke Kristo nĩaakuire tũhũ.
Currently Selected:
AGALATIA 2: OGKBIBLE
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
