AGALATIA 1
1
1NĨ niĩ Paulo, mũtũmwo, (na rĩrĩ, ndirĩ mũtũmwo ũtũmĩtwo nĩ andũ, kana na njĩra ya mũndũ, tiga gũtũmwo ndũmĩtwo nĩ Jesu Kristo, o na Ngai Ithe witũ, ũrĩa wamũriũkirie oime kũrĩ arĩa akuũ), 2niĩ-rĩ, o na ariũ a Ithe witũ othe arĩa tũrĩ nao, nĩ ithuĩ twamũtũmĩra marũa maya, inyuĩ a makanitha ma Galatia. 3Mũrogĩa na Wega wa Ngai o na thayũ, ciumĩte kũrĩ Ngai Ithe witũ, o na Mwathani witũ Jesu Kristo, 4ũrĩa werutire nĩ ũndũ wa mehia maitũ, nĩ getha atũhonokie harĩ maũndũ marĩa moru ma mahinda maya tũrĩ, o ta ũrĩa Ngai, o we Ithe witũ endete. 5Nake arokumagio nginya tene na tene. Amen.
6Nĩ kũgega ndĩragega nĩ ũndũ wa ũrĩa mũratigana narua ũguo na Ũrĩa wamwĩtire nĩ ũndũ wa Wega wa Kristo, mũkagarũrũkĩra ũhoro-mwega wa mũthemba ũngĩ; 7na ti ũngĩ: tiga rĩrĩ, nĩkũrĩ andũ amwe maramũtanga, mendete gũthũkia Ũhoro-ũrĩa-Mwega wa Kristo. 8No rĩrĩ, o na kũngĩkorũo nĩ ithuĩ, o na kana mũraika uumĩte Igũrũ, ũkũmũhunjĩria ũhoro-mwega ũngĩ tiga o ũcio twamũhunjĩirie-rĩ, mũndũ ũcio arogwatwo nĩ kĩrumi! 9O ta ũrĩa twanamwĩra mbere, noguo ngũcoka kũmwĩra rĩu, atĩ mũndũ o wothe angĩmũhunjĩria ũhoro-mwega ũngĩ tiga o ũcio mũheetwo mũkawĩtĩkĩra-rĩ, mũndũ ũcio arogwatwo nĩ kĩrumi!
10Tondũ rĩrĩ, kaĩ arĩ andũ ndĩrageria kwĩendithia kũrĩ o, kana nĩ kũrĩ Ngai? Kana hihi nĩ andũ ndĩrageria gũkenia? Ingĩkorũo ndũire ngeragia gũkenia andũ-rĩ, ndingĩkorũo ndĩ ngombo ya Kristo.
11No rĩrĩ, ariũ a Ithe witũ, ngũmũmenyithia atĩ Ũhoro-Mwega ũrĩa ndamũhunjĩirie ndwoimire kũrĩ andũ. 12Nĩ gũkorũo ti kũheo ndaheirũo kana ngĩrutwo nĩ mũndũ; no nĩ kũguũrĩrio ndaguũrĩirio nĩ Jesu Kristo. 13#Atũm 8.3; 22.4,5; 26.9-11.Tondũ-rĩ, nĩmũiguĩte ũhoro wa mĩthiĩre yakwa ĩrĩa ndatũũraga nayo tene ũhoro-inĩ wa ndini ya Ayahudi, ũrĩa ndanyariraga kanitha wa Ngai itekũgererera, ngĩharaganagia andũ aguo. 14#Atũm 22.3.Na ũhoro-inĩ wa ndini ĩo ya Ayahudi, nĩnderutanĩirie ngathiĩ na mbere mũno, ngakĩra andũ aingĩ a riika rĩakwa arĩa a rũrĩrĩ ruitũ, ngagĩa na kĩyo kĩnene makĩria gĩa kũrũmia irĩra iria cia maithe maitũ. 15#Atũm 9.3-6; 22.6-10; 26.13-18.No rĩrĩ, Ngai, o we wanyamũrire itaanaciarũo nĩ maitũ-rĩ, nĩaanjĩtire nĩ ũndũ wa Wega wake; 16na hĩndĩ ĩrĩa onire arĩ wega anguũrĩrie Mũrũwe ngoro-inĩ yakwa, nĩguo njoke ngahunjie ũhoro wake kũrĩ andũ a Ndũrĩrĩ-rĩ, o rĩmwe ndiigana kwaranĩria na andũ arĩa me na mwĩrĩ na thakame, 17o na kana ngĩambata Jerusalemu kũrĩ andũ arĩa maarĩ atũmwo mbere yakwa: no nĩndethiĩrĩire bũrũri wa Arabia, na thutha wa ũguo ngĩcoka rĩngĩ Dameski.
18 #
Atũm 9.26-30. Na rĩrĩ, mĩaka ĩtatũ yathira, nĩndathiire Jerusalemu tũmenyane na Kefa, ngĩikara nake matukũ ikũmi na matano. 19No tũtionanire na atũmwo arĩa angĩ, o na ũmwe, tiga o Jakubu, mũrũ wa nyina na Mwathani. 20Na rĩrĩ, ha ũhoro wa maũndũ maya ndĩramwandĩkĩra, ndamwĩra atĩrĩ, o mbere ya Ngai, atĩ ndikũhenania. 21Thutha wa ũguo ngĩcoka gũthiĩ mabũrũri ma Suriata na Kilikia. 22Na nginya hĩndĩ ĩo ndatũire itamenyekete ũthiũ wakwa nĩ makanitha ma Judea, marĩa me thĩinĩ wa Kristo: 23tiga atĩ nĩ kũigua maaiguaga atĩrĩ, Mũndũ ũrĩa watũire atũnyariraga tene, rĩu nĩwe ũhunjagia ũhoro wa wĩtĩkio o ũrĩa tene aaharaganagĩria andũ arĩa maawĩtĩkĩtie; 24na magakĩgoocaga Ngai nĩ ũndũ wakwa.
Currently Selected:
AGALATIA 1: OGKBIBLE
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
