EZEKIELI 16

1Ningĩ ndũmĩrĩri ya Jehova ĩkĩnginyĩrĩra, ngĩĩrũo atĩrĩ, 2Mũrũ wa mũndũ, menyithia Jerusalemu maũndũ marĩo marĩa maanekwo kuo ma thahu, 3ũrĩĩre atĩrĩ, Mwathani Jehova erĩte Jerusalemu ũũ: Kĩhumo gĩaku nĩ bũrũri wa Akanaani na nĩkuo waciarĩirũo; Mũamori nĩwe warĩ thoguo, o nake Mũhiti nĩwe warĩ nyũkwa. 4Naho ha ũhoro waku wa gũciarũo-rĩ, mũthenya ũrĩa waciarirũo ndwatinirio rũrĩra, o na kana ũgĩthambĩrio maĩ-inĩ ũtherio; ndũigana kũhakwo cumbĩ, o na kana ũgĩthayũo na nguo cia wana. 5Gũtirĩ riitho o na rĩmwe rĩakũiguĩrĩire tha, atĩ rĩgũcaĩre nĩguo wĩkwo ũndũ o na ũmwe wa maũndũ macio; no rĩrĩ, nĩ gũikanio waikanirio na kũu nja werũ-inĩ, nĩ ũndũ wa ũrĩa gĩthiithi gĩaku kĩahohirũo mũthenya o ro ũcio waciarirũo. 6Na hĩndĩ ĩrĩa ndahĩtũkĩire harĩ wee ngĩkuona ũgaragarĩte thakame-inĩ, nĩ kwĩra ndakwĩrire atĩrĩ, O na harĩa wĩ thakame-inĩ yaku, tũũra muoyo. Ĩĩ, ti-itherũ nĩ kwĩra ndakwĩrire atĩrĩ, O na harĩa wĩ thakame-inĩ yaku, tũũra muoyo. 7Na niĩ ngĩgĩcoka ngĩtũma ũingĩhe o ta kĩro kĩrĩa gĩa gĩthaka-inĩ, nawe ũkĩongerereka ũkĩingĩha, o na ũkĩneneha, ũgĩkinya o handũ ha gũtũma wonwo wĩ kĩĩrorerũa, nacio nyondo ciaku ikĩĩhanda, na ũkĩmeria njuĩrĩ; no rĩrĩ, wakorirũo ũrĩ o njaga na ũrĩ ũtheri. 8Ningĩ Mwathani Jehova oigĩte atĩrĩ, Hĩndĩ ĩrĩa ndahĩtũkĩire harĩ wee ngĩkũrora-rĩ, nĩndonire atĩ ihinda rĩu nĩrĩo rĩarĩ rĩaku rĩa kwendeka; ngĩgũtambũrũkĩria nguo yakwa ĩrĩa ndaya, ngĩkũhumba njaga. Ĩĩ, ti-itherũ ngĩkwĩhĩtĩra mwĩhĩtwa, na tũkĩgĩa kĩrĩkanĩro nawe, ũgĩgĩtuĩka wakwa. 9Hĩndĩ ĩo ngĩgĩgũthambia na maĩ; ĩĩ-ni, ngĩgũkumutha, nayo thakame yaku yothe ĩgĩgũthira, ngĩcoka ngĩkũhaka maguta. 10O na ningĩ ngĩkũhumba nguo ng’emie wega irĩ marooro, o na ngĩgwĩkĩra iratũ cia njũa cia mbomboo, ningĩ ngĩkũhotora nguo ya gatani ĩrĩa njega, ngĩcoka ngĩkũhumba na hariri. 11O na ningĩ ngĩkũgemia na mathaga mega, ngĩgwĩkĩra ituro moko, o na kĩrengeri ngingo. 12Ningĩ ngĩgwĩkĩra gĩcũhĩ iniũrũ, na ngĩgwĩkĩra icũhĩ cia matũ, ngĩcoka ngĩgwĩkĩra tanji thaka mũtwe. 13Ũguo nĩguo wakĩgemirio na thahabu o na betha; nacio nguo ciaku ciarĩ cia gatani ĩrĩa njega, o na hariri, o iria ng’emie wega irĩ marooro; nawe nĩ kũrĩa warĩaga mũtu ũrĩa mwega mũhinyu, o na ũũkĩ, o na maguta; nawe ũgĩthakara mũno ũgĩkĩrĩrĩria, ningĩ ũgĩtonga, ũgĩkinya o handũ harĩa ũngĩtuĩka mũthamaki. 14Nayo ngumo ya ũthaka waku ĩkĩhunja ndũrĩrĩ-inĩ ciothe nĩ ũndũ ũthaka ũcio waku warĩ mũkinyanĩru nĩ ũndũ wa riri wa ũkaru wakwa ũrĩa ndakũheete; ũguo nĩguo Mwathani Jehova oigĩte.

15No rĩrĩ, wee waikarire wĩhokete ũthaka ũcio waku, nayo ngumo ĩrĩa wagĩĩte nayo ĩgĩtũma ũhũre maraya, namo maũndũ maku ma ũtharia ũkĩmaitĩra mũndũ o wothe ũrĩa wahĩtũkagĩra harĩ wee, ũkĩmũgwatia. 16Ningĩ ũkĩoya nguo imwe ciaku, na ũkĩgemia matĩri nacio ma kũndũ gũtũũgĩru marĩa wethondekeire, ũgĩkĩmagemia na nguo cia rangi wa mĩthemba mĩingĩ, ũgĩcoka ũkĩhũrĩra maraya kuo; na gũtirĩ kwoneka maũndũ ta macio o rĩ o rĩ, na matikoneka rĩngĩ. 17Ningĩ ũgĩcoka ũkĩoya indo ciaku cia goro cia thahabu yakwa, o na betha yakwa, iria ndakũheete, ũgĩĩthondekera mĩhianano ya arũme, ũgĩcoka ũkĩhũra maraya nayo; 18ningĩ ũkĩoya nguo ciaku ng’emie wega wega ĩrĩ marooro, ũkĩmĩhumba nacio, namo maguta makwa, na ũbumba wakwa, ũgĩciiga mbere yayo. 19O naguo mũgate wakwa ũrĩa ndakũheire, na mũtu ũrĩa mwega mũhinyu, na maguta, na ũũkĩ, o indo iria ndakũheaga cia kũrĩa, ũgĩciiga mbere yayo nĩguo ituĩke cia mũtararĩko ũrĩa ũnungaga wega ũkĩiguwo nĩyo; ũguo nĩguo gwagĩtuĩkire. Nake Mwathani Jehova nĩwe uugĩte ũguo. 20O na ningĩ-rĩ, nĩ kũnyita ũnyitĩte ariũ aku na airĩtu aku, o acio wanjiarĩire, ũkamarutĩra mĩhianano ĩo igongona, nĩguo marĩwo maninwo. Anga ũtharia ũcio waku warĩ ũndũ mũnyinyi, 21tondũ nĩwagĩcokire kũũraga ciana ciakwa, na ũgacineana na ũndũ wa gũtũma ihĩtũkĩrio mwaki-inĩ irutĩrũo mĩhianano ĩo? 22Na rĩrĩ, ũgĩĩka maũndũ macio mothe ma thahu, o na maũndũ maku mothe ma ũtharia-rĩ, ndũigana kũririkana matukũ marĩa warĩ mũnyinyi, o ihinda rĩrĩa warĩ njaga na ũtheri, o rĩrĩa wagaragarĩte thakame-inĩ yaku. 23Wũi-ĩiya-wakwa, kaĩ wĩ mũkorerere nĩ haaro-ĩ! Ũguo nĩguo Mwathani Jehova oigĩte, kuona atĩ thutha wa gwĩka maũndũ macio maku mothe ma waganu-rĩ, 24nĩweyakĩire nyũmba handũ hatũũgĩru, o na ũkĩĩakĩra icorero magomano-inĩ mothe ma njĩra. 25Ituri-inĩ ciothe cia njĩra nĩkuo wĩyakĩire macoorero macio maku, naguo ũthaka waku ũũtuĩte o ta kĩndũ gĩĩ thahu mũno, nĩ ũndũ wa gũtaaganũrĩra mũndũ o wothe ũrĩa ũkũhĩtũkĩra harĩ wee magũrũ, naguo ũtharia waku ũkaũingĩhia mũno. 26O na ningĩ nĩũtharanĩtie na Amisiri, arĩa mũtũire mũhakaine bũrũri nao, nao nĩo me mĩĩto ya aka mũno; naguo ũtharia waku nĩũũingĩhĩtie mũno nĩguo ũ’thirĩkie. 27Na atĩrĩrĩ, tondũ wa ũhoro ũcio, nĩngũtambũrũkĩirie guoko gwakwa gũgũkore, na ngakũnyihanyihĩria irio ciaku cia ndũire, na ngũrekererie ngũneane harĩ andũ arĩa magũthũũrĩte, magwĩke o ta ũrĩa mekwenda, nao nĩo airĩtu a Afilisiti, arĩa maconoretwo nĩ mĩthiĩre yaku ya waga-thoni. 28O na ningĩ nĩũhũrĩte maraya na Aashuri, nĩ ũndũ wa ũrĩa ũtangĩthirũo nĩ mĩĩto ya kwenda arũme; ĩĩ, ti-itherũ nĩũhũrĩte maraya nao, na ndũrĩ ũraigania. 29O na ningĩ ũtharia waku ũũingĩhĩirie makĩria o kũu bũrũri wa Kanaani, o nginya bũrũri wa Kalidei; no o na gwatuĩka nĩ ũguo ndwaiganirũo nĩguo. 30Hĩ! Mwathani Jehova ekuuga atĩrĩ, Kaĩ ngoro yaku yũrĩtwo nĩ hinya atĩa, kuona atĩ nĩwĩkaga maũndũ macio mothe-ĩ! Namo nĩmo mekagwo nĩ mũndũ-wa-nja ũtangĩrirĩka ũtharia; 31nĩ ũndũ wa ũrĩa wĩyakĩire nyũmba yaku handũ hatũũgĩru ituri-inĩ cia njĩra ciothe, o na ũkeyakĩra macoorero njĩra-inĩ ciothe; ningĩ wĩtuĩte o ta ũtarĩ mũmaraya nĩ kũmena mũcara ũrĩa ũheanagĩrũo ũmaraya ũcio. 32Wee mũtumia ũyũ wĩ mũtharia! O wee wĩtaga mũrũrĩrĩ ithenya rĩa mũthuriguo! 33Maraya marĩa mangĩ mothe nĩmaheagwo iheo, no rĩrĩ, wee nĩ gũtega ũtegagĩra anyanya aku, ũkamahaka na indo ciaku wee mwene, nĩ getha moke kũrĩ wee makuumĩte na ndwere ciothe nĩ ũndũ wa ũtharia ũcio waku. 34Nĩ ũndũ ũhoro waku wa ũtharia nĩwĩkũũranĩte na wa aka arĩa angĩ othe a maraya, nĩ ũndũ hatirĩ mũndũ o na ũmwe ũgũthingataga atharie nawe, tondũ wee mwene nĩwe ũheanaga mũcara, na ndũrĩ mũcara ũheagwo; tondũ ũcio ũhoro waku nĩwĩkũũranĩte na wa arĩa angĩ.

35Tondũ ũcio, mũmaraya ũyũ, ta igua ũhoro wa Jehova; 36Mwathani Jehova oigĩte ũũ: Tondũ mbeca ciaku nĩũciitangĩte, o nayo njaga yaku ĩkaguũrio na ũndũ wa ũtharia ũrĩa ũtharagia na anyanya aku; na tondũ wa mĩhianano yaku yothe ya kũhoyũo o ĩo ĩrĩ thahu, o na tondũ wa thakame ĩrĩa ũitithĩtie ya ciana ciaku iria wamĩrutĩire-rĩ, 37atĩrĩrĩ, tondũ wa maũndũ macio mothe, nĩ kũũngania ngakũũnganithĩrĩa anyanya aku othe, o arĩa wanekenia nao, o na andũ arĩa angĩ othe mwanendana nao, me hamwe na andũ othe arĩa ũthũũrĩte; na nĩngatũma makũũnganĩre makuumĩte na ndwere ciothe, na ndĩmaguũrĩrie njaga yaku, nĩ getha makuone njaga yaku yothe. 38Na nĩngagũtuĩra cira o ta ũrĩa aka matuagĩrũo cira arĩa mathahagia ũhiki na magaitithia thakame; na nĩngatũma ũkorũo nĩ mathũgũta, na ũiguĩrũo ũiru, nĩguo ũcokererũo nĩ thakame ĩo. 39O na ningĩ nĩngakũneana moko-inĩ mao, nao matharie nyũmba ciaku iria ciakĩtwo handũ hatũũgĩru na igũrũ, na mamomore macoorero macio maku, na macoke makwaũre nguo ciaku, na magũcume mathaga maku, magũtige njaga ũrĩ ũtheri. 40O na ningĩ nĩmagakũrehithĩrie andũ monganĩte magũũkĩrĩre, nao makũhũre na mahiga nyuguto, na magũthece na hiũ cia njora magũtũrĩkanie. 41Nacio nyũmba ciaku nĩmagacimundia mwaki, na makũhingĩrie matuĩro maku ma cira ũkĩonagwo nĩ aka aingĩ; na niĩ nĩngagũtigithia ũhũri maraya, nawe wage gũgacoka kwĩhakanĩrĩra nĩguo ũhũrũo ũmaraya nawe rĩngĩ. 42Ũguo nĩguo ngehoreria mathũgũta makwa nawe, naguo ũiru wakwa ũgũthengere; na njoke ndĩĩkirĩre ki, na ndicoke kũrakara rĩngĩ o na atĩa. 43Nĩ ũndũ-rĩ, ndũigana kũririkana matukũ ma ũnyinyi waku; no nĩ kũũgita ũnjũgitĩte na maũndũ macio mothe; na atĩrĩrĩ, tondũ ũcio niĩ o na niĩ nĩ gũtũma ngatũma ũcokererũo nĩ maũndũ ma mĩthiĩre yaku; ũguo nĩguo Mwathani Jehova oigĩte. Tondũ-rĩ, githĩ ndwaneka maũndũ macio ma waga-thoni ũkĩmongerera harĩ marĩa ũtũire wĩkaga me thahu?

44Atĩrĩrĩ, mũndũ o wothe ũrĩa ũhũthĩire kwaria na thimo-rĩ, nĩagakuuna thimo ĩno, oige atĩrĩ, O ta ũrĩa nyina wa mwana atariĩ, ũguo noguo mwarĩ nake atariĩ. 45Wee-rĩ, wĩ mwarĩ wa mũndũ-wa-nja ũrĩa ũrurũkĩte mũrũme mũno, o na ciana ciake; ningĩ wĩ mwarĩ wa nyina na aka arĩa marurũkĩte arũme ao mũno o na ciana ciao. Nyũkwa aarĩ Mũhiti, nake thoguo aarĩ Mũamori. 46Nake mwarĩ wa nyũkwa ũrĩa mũkũrũguo nĩ Samaria, ũcio ũgũikaraga mwena wa ũmotho, we mwene o na airĩtu ake. O na ningĩ mwarĩ wa nyũkwa ũrĩa mũrunaguo, ũrĩa ũgũikaraga mwena wa ũrĩo, nĩwe Sodomu na airĩtu ake. 47No rĩrĩ, o na kũngĩtuĩka nĩ ũguo-rĩ, wee ndũigana gũthiĩ na mĩthiĩre ta yao, o na kana ũgĩĩka maũndũ me thahu ta mao; no rĩrĩ, wee, mĩthiĩre-inĩ yaku yothe-rĩ, nĩ gũkũndũka wakũndũkire ũkĩmakĩria, wonete ta ũndũ ũcio wĩ mũnyinyi mũno. 48Na rĩrĩ, Mwathani Jehova oigĩte ũũ: O ta ũrĩa niĩ ndũũraga muoyo-rĩ, mwarĩ wa nyũkwa ũrĩa wĩtagwo Sodomu we mwene, o na kana airĩtu ake, matiigana gwĩka ta ũrĩa wĩkĩte wee mwene na airĩtu aku. 49Atĩrĩrĩ, waganu wa Sodomu, mwarĩ wa nyũkwa, nĩ ũyũ, nĩ gwĩtĩa etĩaga, na agaikara agaacĩire na akahũna irio nyingĩ hatarĩ maũndũ egũtangĩkĩra, we mwene hamwe na airĩtu ake; ningĩ ndaigana gũteithia andũ arĩa akĩa kana arĩa athĩni amekagĩre hinya. 50Nao maarĩ a mwĩĩkĩrĩro, na magekaga maũndũ me thahu me mbere yakwa tondũ ũcio ndameheririe o ta ũrĩa ndonire arĩ wega. 51Ningĩ Samaria ndaigana kwĩhia mehia ta ma nuthu ĩmwe ya mehia maku; no rĩrĩ, wee ũingĩhĩtie maũndũ maku marĩa wĩkaga me thahu kũrĩ o, na ũgatũma airĩtu a nyũkwa monwo ta marĩ athingu na ũndũ wa maũndũ maku mothe marĩa wĩkaga ma thahu. 52Wee nawe tũũra ũconokaga, nĩ ũndũ wa maũndũ marĩa ũtũmĩte airĩtu a nyũkwa matuĩrũo cira wegega kũrĩ wee, nĩ ũndũ mehia maku marĩa wĩhĩtie nĩ ma gũthũũrũo mũno gũkĩra mao, nao nĩmonagwo marĩ athingu gũgũkĩra. Ĩĩ, ti-itherũ, ũrokĩrĩrĩria gũconorithio, na ũtũũre ũconokaga, nĩ ũrĩa ũtũmĩte airĩtu acio a nyũkwa monwo ta marĩ athingu. 53Na rĩrĩ, nĩngahũndũrithĩria andũ ao arĩa atahe, o andũ arĩa atahe a Sodomu na airĩtu ake, o na andũ arĩa atahe a Samaria na airĩtu ake o nao, ndĩmahũndũrithanĩrie hamwe na andũ aku arĩa atahe, 54nĩguo ũtũũre ũconokaga, o ũgĩconokagĩra maũndũ mothe marĩa wĩkĩte, nĩ ũndũ wa ũrĩa ũtuĩkĩte ta ũrĩ mũmahoreria ngoro. 55Nao airĩtu a nyũkwa nĩmagacoka gũtũũra o ta ũrĩa maatũire tene; Sodomu na airĩtu ake macoke gũtuĩka o ta ũrĩa maatariĩ tene, nao Samaria na airĩtu ake matuĩke o ta ũrĩa maatariĩ tene o nao; o nawe wee mwene o na airĩtu aku mũtuĩke o ta ũrĩa mwatariĩ tene o na inyuĩ. 56Amu nĩwaregaga kũgweta Sodomu mwarĩ wa nyũkwa na kanua gaku, hĩndĩ ĩrĩa waiyũrĩtwo nĩ mwĩtĩo, 57o mbere waganu waku ũtanaguũka ũmenyũo wega, o ihinda rĩrĩa wanyararagwo nĩ mwarĩ wa Suriata, na andũ othe arĩa maamũrigicĩirie, o na airĩtu a Afilisiti, acio maakũmenagĩrĩria makũrigicĩirie na ndwere ciothe. 58Nĩ gũcokererũo ũcokereirũo nĩ ũhoro waku wa waga-thoni o na maũndũ maku marĩa waneka me thahu; ũguo nĩguo Jehova oigĩte. 59Nĩ ũndũ Mwathani Jehova oigĩte ũũ: Niĩ o na niĩ ngagwĩka o ta ũrĩa wee mwene wĩkĩte, o wee ũmenete mwĩhĩtwa ũrĩa wĩhĩtĩte, na ũgathũkia kĩrĩkanĩro. 60No rĩrĩ, o na gwatuĩka atĩ ũguo noguo wĩkĩte, nĩngaririkana kĩrĩkanĩro gĩakwa kĩrĩa twarĩkanĩire nawe rĩrĩa warĩ mũnyinyi, na nĩngatũũra ngũrũmĩirie kĩrĩkanĩro gĩa gũtũũra tene na tene. 61Na hĩndĩ ĩo wee nawe nĩũkaririkana mĩthiĩre yaku, ũconoke, o hĩndĩ ĩrĩa ũgacoka kũiguana na airĩtu a nyũkwa, arĩa akũrũ, o na arĩa anyinyi; nĩngamaheana harĩ wee matuĩke airĩtu aku wee mwene, no ti ũndũ wa kĩrĩkanĩro giitũ nawe. 62Na niĩ nĩngarũmia kĩrĩkanĩro giitũ nawe, na nĩũkamenya atĩ niĩ nĩ niĩ Jehova, 63nĩ getha ũririkane maũndũ macio, ũconoke, na ndũkanacoke gũtumũra kanua rĩngĩ o na atĩa, nĩ ũndũ wa njono iria ũgakorũo nacio; ũguo nĩguo gũgatuĩka rĩrĩa ngakorũo nguoheire maũndũ mothe marĩa waneka; ũguo nĩguo Mwathani Jehova oigĩte.

Currently Selected:

EZEKIELI 16: OGKBIBLE

Highlight

Copy

Compare