1 TIMOTHEO 4
4
1NO rĩrĩ, Roho nĩoigaga, atekũhithĩrĩra, atĩ matukũ marĩa ma thutha, andũ amwe nĩmakeherera ũrutani ũrĩa wa Wĩtĩkio, marũmbũyagie maroho marĩa mahenanagia, na morutani ma ndaimono, 2nĩ ũndũ wa ũhinga wa andũ arĩa maaragia mathara, o arĩa matũire ta moretwo thamiri ciao na ruoro. 3Acio nĩo makaananagia gũtikanahikanio, na makagirĩrĩria andũ kũrĩa irio mĩthemba ĩmwe, o iria Ngai ombire nĩguo ciamũkagĩrũo na ngatho nĩ arĩa metĩkĩtie makamenya ũhoro-ũrĩa-wa ma. 4Tondũ-rĩ, kĩndũ o gĩothe kĩombirũo nĩ Ngai nĩ kĩega, na gũtirĩ gĩa kũregwo o gĩothe, kĩngĩkorũo nĩkĩamũkĩrĩtwo na ngatho: 5tondũ nĩkĩrĩkĩtie gũtherio na Ũhoro wa Ngai o na kũhoya.
6Ũngĩririkanagia ariũ a Ithe witũ maũndũ macio-rĩ, nĩũgũtuĩka ndungata njega ya Kristo Jesu, ĩrĩa ĩreretwo na ciugo cia Wĩtĩkio, o na cia ũrutani ũrĩa mwega ũrĩa ũtũire ũũrũmagia: 7no rĩrĩ, ndeto itarĩ cia gũtĩa Ngai, o na ng’ano cia tũhũ ta iria iganagwo nĩ iheti, ũciregage. Wĩmenyagĩrie ũhoro wothe wa kwĩamũrĩra Ngai: 8amu mũndũ akĩĩmenyeria maũndũ ma gwĩkĩra mwĩrĩ wake hinya kwĩ bata o kahinda, no kwĩmenyeria kwĩamũrĩra Ngai kwĩ bata maũndũ-inĩ mothe, nĩ ũndũ kwĩ na kĩĩrĩgĩrĩro gĩa kũguna mũndũ muoyo-inĩ ũyũ tũrĩ, o na muoyo-inĩ ũrĩa ũgoka. 9Ũhoro ũcio nĩguo wa kwĩhokeka, na nĩguo wagĩrĩire gwĩtĩkĩrũo o biũ. 10Na tũrutaga wĩra wa mĩnoga tũkerutanĩria nĩ ũndũ wa ũhoro o ro ũcio; amu-rĩ, Ngai, we ũrĩ muoyo, nĩwe tũtũire twĩrĩgĩrĩire, nake nĩwe mũhonokia wa andũ othe, o na makĩria wa andũ arĩa etĩkia.
11Athanaga atĩ maũndũ macio mekagwo, na ũmarutanage. 12Menya ũreke mũndũ o wothe akũire, nĩ ũndũ atĩ wĩ mũndũ mwĩthĩ; nĩ kaba ũtuĩke kĩonereria kũrĩ andũ arĩa etĩkia ũhoro-inĩ wa mĩarĩrie, na wa mĩthiĩre ĩrĩa yagĩrĩire, na wa kwendana, na wa gwĩtĩkia, o na wa gũikaraga na mĩtugo mĩtheru. 13Rũmanagĩria ũhoro wa gũthomera andũ Maandĩko marĩa matheru, na wa gũtaarana, o na wa kũrutana, o nginya hĩndĩ ĩrĩa ngoka. 14Menya ũkaaga kũhũthĩra kĩheo kĩrĩa ũrĩ o nakĩo, kiumanĩte na Wega wa Ngai, o kĩrĩa waheirũo na ũndũ wa mohoro marĩa maarathirũo hĩndĩ ĩrĩa waigĩrĩirũo moko nĩ athuri monganĩte. 15Ĩkagĩra maũndũ macio kĩyo, na ũikarage ũmarũmĩtie, nĩ getha andũ othe mahote kuona ũrĩa ũthiaga na mbere. 16Wĩmenyagĩrĩre wee mwene, na ũmenyagĩrĩre ũrutani ũrĩa ũrutanaga. Tũũra o wĩkaga maũndũ macio: nĩ ũndũ weka ũguo nĩũkwĩhonokia wee mwene, o na andũ arĩa makũiguaga.
Currently Selected:
1 TIMOTHEO 4: OGKBIBLE
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
