1 PETERO 5
5
1RĨU-RĨ, ndĩ na ũhoro ngũhatĩrĩria athuri a kanitha a kwanyu, ndĩkĩrĩ mũthuri wa kanitha o ũndũ ũmwe nao, na ndĩ mũira wa ũrĩa Kristo aanyarirĩkire, o na wa kũgwatanĩra na inyuĩ riri o ũrĩa ũrĩguũranĩrio. 2#Joh 21.15-17.Atĩrĩrĩi, rĩithagiai wega rũũru rũa Ngai rũrĩa mũrĩ naruo, mũkĩroraga andũ aruo, to ũndũ wa kũringĩrĩrio, no tondũ wa kwĩendera, ta ũrĩa Ngai endaga; na ti ũndũ wa kwĩrirĩria mbia itamwagĩrĩire, no makĩria nĩ ũndũ wa kwĩendera na ngoro. 3Ningĩ mũtigetuage anene a andũ arĩa mũtigĩirũo mũmarorage, no mũtuĩke a kuonagĩrĩria rũũru rũu mĩthiĩre ĩrĩa yagĩrĩire. 4Na hĩndĩ ĩrĩa Mũrĩithi ũrĩa mũnene akaguũranĩrio, nĩmũkaheo thũmbĩ ĩrĩ riri, o ĩrĩa ĩtacokaga kũũma. 5#Thim 3.34.Ũguo no taguo na inyuĩ mũtarĩ akũrũ, athĩkagai nĩ athuri. Inyuothe-rĩ, ikaragai mwĩhotorete ũhoro wa kwĩnyihia, nĩ getha mũtungatanagĩre inyuene: nĩ ũndũ Ngai nĩareganaga na arĩa etĩi, no arĩa menyihĩtie nĩamakinyagĩria Wega wake.
6 #
Mat 23.12; Luk 14.11; 18.14. Nĩ ũndũ ũcio-rĩ, mwĩnyihieni mwathĩkage nĩ guoko kwa Ngai kũrĩa kwĩ hinya, nĩ getha akamũtũũgĩria hĩndĩ ĩrĩa njagĩrĩru yakinya. 7Na mũmũrekagĩrĩrie maũndũ mothe marĩa mũtangĩkagĩra, tondũ nĩwe ũrũmbũyanagia na maũndũ manyu. 8Ikaragai mũterigĩtwo, na mwĩhũgage. Atĩrĩ, mũcukani, thũ yanyu, acangaga ta mũrũthi ũkũrarama, agĩcaragia mũndũ wa gũtambura. 9No rĩrĩ, mũmwĩtiirie mũrũmĩtie ũhoro ũrĩa mwĩtĩkĩtie, nĩ kũmenya atĩ ariũ arĩa angĩ a Ithe witũ mũrĩ thiritũ nao gũkũ thĩ guothe nĩmegũtũũra manyarirĩkaga o ta inyuĩ. 10Nake Ngai mwene Wega wothe, we wamwĩtĩire riri wake ũrĩa ũtagathira nĩ ũndũ wa ũrĩa mũgwatanĩtio na Kristo-rĩ, nĩarĩmũthondeka we mwene mwagĩrĩre kũna, na amũikaragie mũrũmĩte wega, na amwĩkagĩre hinya, mwarĩkia kũnyarirũo kahinda. 11Naguo wathani ũrotuĩka wake o nginya tene na tene. Amen.
12 #
Atũm 15.22,40. Marũa maya makuhĩ ndamwandĩkithĩria kũrĩ Silivano, mũrũ wa Ithe witũ ũrĩa mwĩhokeku, (ũguo noguo nguona atariĩ), nĩ getha ndĩmũhatĩrĩrie, na ndĩmwĩre na ma atĩ ũhoro ũcio-rĩ, nĩguo Wega wa Ngai ũrĩa wa ma; wĩhandei wega thĩinĩ waguo. 13#Atũm 12.12,25; 13.13; 15.37-39; Kol 4.10; Filem 1.24.Kanitha ũrĩa wĩ gũkũ Babuloni, ũrĩa mũthure ũndũ ũmwe na inyuĩ, nĩwamũgeithia; o na mũrũ wakwa Mariko o nake nĩaamũgeithia. 14Geithaniai na ngeithi cia kũmumunyana, iria cia kwendana.
Thayũ ũrogĩa na inyuĩ inyuothe arĩa mũgwatanĩtio na Kristo.
Currently Selected:
1 PETERO 5: OGKBIBLE
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
