1 JOHANA 4
4
1ENDWA akwa, mũtigetĩkagie maroho mothe, no rĩrĩ, mũroragie maroho, muone kana nĩmoimĩte kwĩ Ngai; tondũ kwĩ arathi aingĩ a mathara moimĩrĩire gũkũ thĩ. 2Ũrĩa mũngĩhota gũkũũrana Roho wa Ngai nĩ ũguo: roho o wothe ũrĩa wĩtĩkagia atĩ Jesu Kristo nĩokĩte na mwĩrĩ-rĩ, ũcio nĩuumanĩte na Ngai, 3naguo roho o wothe ũrĩa ũtetĩkagia Jesu, ũcio nduumanĩte na Ngai; na ũcio nĩguo roho wa mũmena-Kristo, ũrĩa mũiguĩte atĩ nĩũgũũka, o na rĩu nĩũrĩkĩtie kũgĩa gũkũ thĩ. 4Inyuĩ, twana twakwa, mũrĩ a Ngai, na acio nĩmũmahootete; nĩ ũndũ ũrĩa wĩ thĩinĩ wanyu nĩ mũnene gũkĩra ũrĩa wĩ gũkũ thĩ. 5Acio nĩ a na gũkũ thĩ, na tondũ ũcio maaragia maũndũ ma gũkũ thĩ, nakĩo kĩrĩndĩ gĩa gũkũ thĩ gĩkamaigua. 6Ithuĩ-rĩ, tũrĩ a Ngai; ũrĩa ũũĩ Ngai nĩatũiguaga; ũrĩa ũtarĩ wa Ngai, we ndatũiguaga. Ũguo-rĩ, tũgagĩkũũrana roho ũrĩa wa ma, na roho ũrĩa wa ũhĩtia.
7Endwa akwa, nĩtwendanagei, amu kwendana nĩ kwa Ngai, na mũndũ o wothe wendanaga aciarĩtwo nĩ Ngai, o na nĩoĩ Ngai. 8Ũrĩa ũtendanaga ndoĩ Ngai; amu Ngai nĩwe wendani. 9Ũhoro ũrĩa wendani wa Ngai wonanirio naguo harĩ ithuĩ nĩ ũyũ, atĩ Ngai nĩaarekirie Mũriu wake wa mũmwe oke gũkũ thĩ, nĩ getha tũgĩe muoyo nĩ ũndũ wake. 10Wendani nĩ ũũ; ti atĩ nĩ ithuĩ twendaga Ngai; ĩndĩ nĩwe watwendaga ithuĩ, agĩkĩrekia Mũriũ oke atuĩke ihaki rĩa mehia maitũ. 11Endwa akwa, akorũo Ngai nĩguo aatwendaga, nĩtũkĩagĩrĩirũo na ithuĩ twendanage. 12#Joh 1.18.Gũtirĩ mũndũ ũrĩ ona Ngai; twatũũra twendaine, Ngai nĩatũũraga thĩinĩ witũ, o naguo wendo wake ũgagĩkinyanĩra thĩinĩ witũ.
13Ũndũ ũrĩa tũmenyaga naguo atĩ nĩtũtũire thĩinĩ wake, nake agatũũra thĩinĩ witũ, nĩ ũyũ, atĩ nĩatũgaĩire Roho wake. 14Na ithuĩ-rĩ, nĩtwĩyoneire na tũkaheana ũira atĩ Ithe witũ nĩareketie Mũriu atuĩke Mũhonokia wa kĩrĩndĩ. 15Mũndũ o na ũrĩkũ wa gwĩtĩkia atĩ Jesu nĩ Mũrũ wa Ngai-rĩ, Ngai nĩatũire thĩinĩ wake, nake nĩatũire thĩinĩ wa Ngai. 16Na ithuĩ nĩtũmenyete wendani ũrĩa Ngai e naguo harĩ ithuĩ, na tũkawĩhoka. Ngai nĩwe wendani, nake ũrĩa ũtũũraga arĩ o na wendani atũũraga thĩinĩ wa Ngai, nake Ngai nĩatũũraga thĩinĩ wake. 17Ũguo-rĩ, nĩguo wendani ũtũmagwo ũkinyanĩre harĩ ithuĩ, nĩ getha tũkahota kũũmĩrĩria mũthenya ũrĩa wa gũtuĩrũo cira; nĩ ũndũ, o ta ũrĩa we atariĩ, no taguo ithuĩ tũikaraga tũhaana twĩ gũkũ thĩ. 18Wendani ndũrĩ guoya; wendani ũrĩa mũkinyanĩru nĩũninaga guoya, amu guoya ũkoniĩ kĩherithanio, nake ũrĩa wĩtigagĩra ndakinyanĩirie wendani. 19Ithuĩ twendanaga nĩ ũndũ nĩwe waambire gũtwenda mbere. 20Mũndũ angĩkorũo oigaga ũũ, Niĩ nĩnyendete Ngai, na nĩathũire mũrũ wa ithe-rĩ, ũcio nĩ wa maheni; amu-rĩ, ũrĩa ũtendete mũrũ wa ithe ũrĩa atũire onaga, ndangĩhota kwenda Ngai atakĩrĩ aamuona. 21Ningĩ tũrĩ o na rĩathani rĩrĩ rĩake, atĩrĩ, atĩ ũrĩa wendete Ngai no ende mũrũ wa ithe o nake.
Currently Selected:
1 JOHANA 4: OGKBIBLE
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
