Pa Amotume 1
1
Pa Zozo Amotumo
1Yekova ki yambu Mose, ki gumba pai fu ko bamburoko dungurati yo, ki ya, 2“Mo gúmba pai fu awiri aYisaraere, ki ya fu yo, Ho gu boro dagba roni yo ka ye na gamunihe mbedisatise ni fu Yekova, oni aniye na gaoni gamunihe mbedisatise nga zogozogo anya, dagba rimbasa abagara yo watadu dagba rimbasa akandoro yo.
3“Ka gani gamunihe mbedisatise du nga zozo motumo ni bagara dagba rimbasara yo, ni aniye na bara zanga serõ; ni aniye na u ku pangbadimo bamburoko dungurati yo, Yekova idi pa ni; 4ni animoi beni ku auru ri gu zozo motumo re i ki idi pa ha fu ni si mangi pa dada ingapai tipa ni. 5Si du ni aniimi babagara bara bangiri Yekova; awiri Arona nga aboromotumo nikaniye na kureru, ki migidi kureru kuti bamotumo kirikiri, nga gu du pangbadimo bamburoko dungurati. 6Ni ki yuku pasio zozo motumo, ki yepe he rukutu; 7awiri Arona nga aboromotumo nikanirogo we ku auru bamotumo, ki moi nyake ti we nzunzu; 8awiri Arona nga aboromotumo anipipigi gu rukutu pasio re na riru na nzemeru ni tangaratangara ha nzunzu ri gu nyake du ti we auru bamotumo. 9Ono aũvuru yo na anduru ko ka nizundu he azunda. Boromotumo ki nizo ho dunduko ri bamotumo ni zozo motumo, nga motumo ni we, du ni guzuguzu fuõhe fu Yekova.
10“Ka gani gamunihe mbedisatise tipa zozo motumo du dagba rimbasa anya yo, ni kandoro watadu ameme, ni aniye na bara zanga serõ; 11ni ki niimi ru pati bamotumo ku nodiyo bara bangiri Yekova, awiri Arona nga aboromotumo animigidi kureru kuti bamotumo kirikiri. 12Ni ki niyepe he rukutu na riru na nzemeru, boromotumo ki nipipigi he ni tangaratangara ha nzunzu ri gu nyake du ti we auru bamotumo; 13ono aũvuru yo na anduru ko ka nizundu he azunda. Boromotumo aniye na ni dũ, ki zo ho ri bamotumo; si nga zozo motumo, nga motumo ni we, du ni guzuguzu fuõhe fu Yekova.
14“Ka gani gamunihe mbedisatise fu Yekova du ni zozo motumo nga azire, ni aniye na ambipo ni gani gamunihe mbedisatise, watadu paranga agbungu. 15Boromotumo aniye na u ku pati bamotumo ki kama riru ki kati he, ki zo ho auru bamotumo; kureru ki gbadi ki niga kuti pavuru bamotumo; 16ko anidi kunduru na amangeru ki ba ha pati bamotumo ku uroyo ku ba akuke yo; 17ko aninyagba apuporu ti ru ono ka ko asipa nga pasioru ya. Boromotumo anizo ho auru bamotumo, ku ri gu nyake du ti we; si nga zozo motumo nga motumo ni we, du ni guzuguzu fuõhe fu Yekova.
Currently Selected:
Pa Amotume 1: ZB1978
Highlight
Share
Copy
Want to have your highlights saved across all your devices? Sign up or sign in
La Sainte Bible en Zande © Alliance Biblique Universelle, 1978.
