Gate 40

Pa dua Banye na kpara ha ziazia

1Yekova ki ya fu Mose, 2“Ti gu bambata uru nga ga bambata diwi, mo adúa banye ku ari nga ga bamburoko dungurati. 3Mo ki moi sanduki dezirepai ku vuru he yo, ki kpara sanduki ni roko kparahe. 4Mo ki ndu na mbisa ku dimo yo, ki moi agu ahe ku baha nikadu ku auru he; mo ki ndu na baduawe, ki tigi gaha awe. 5Mo ki moi gu bamotumo dahabu du tipa fuõngua barangba sanduki dezirepai, ki moi asiasi roko kparaba ti ngbadimo banye ku baha. 6Mo ki moi gu bamotumo nga ga zozo motumo barangba ngbadimo banye nga ga bamburoko dungurati, 7mo ki moi kurungbu zundatise dagba bamburoko dungurati na bamotumo, ki uka ime ku rogo ho. 8Mo ki dua agbaraga kirikiri pati vurukporo banye, ki asi gu asiasi roko kparaba tipa ngbadimo vurukporo. 9Mo ki di gu nzeme mbeda, ki mbedi banye, na agu ahe du vuru he yo dunduko, ki kpara ha, na aũhe dunduko; si ki du ni kparakpara ha ziazia. 10Mo ki mbedi bamotumo nga ga zozo motumo, na aũhe dunduko, ki kpara bamotumo; bamotumo ki du ni kparakpara ha ziazia ki susi. 11Mo ki mbedi kurungbu zundatise na ndu mouruhe, ki kpara ha a. 12Mo ki ndu na aArona na awiriko ku ngbadimo bamburoko dungurati yo, ki zundu yo ni ime, 13mo ki ukadi Arona ni kparakpara ziazia aroko, mo ki mbedi ko ni nzeme, ki kpara ko, ya ko nimangi pare rogo pa ga boromotumo sunge. 14Mo ki ye na awiriko, ki ukadi yo ni aroko kuari 15ki mbedi yo a wa mo ambedi bayo, ya i nimangi pare rogo pa ga aboromotumo sunge: pa mbeda yo ki du fu yo tipa du yo ni aboromotumo nye anye kindi dagba arika ngbatungayo dunduko.”

16Kina wo Mose amangi he; ko amangi he kuti agu apai dunduko Yekova arugu ko na ni. 17Ti bambata diwi rogo ue garã, ti gu bambata uru nga ga diwi, i ki dua banye ku ari. 18Mose ki dua banye ku ari; ki moi anduhe ku rogo abaha, ki dua agbaragaha ku ari, ki rimisi angbongboho, ki dua adangbaha ku ari. 19Ko ki gbaragi bamburoko ku ri banye, ki moi ũdadahe tipa bamburoko ku ari, auru he, a wa Yekova arugu Mose na ni. 20Ko ki di dezirepai ki moi he ku rogo sanduki, ki moi angbongbo ti sanduki, ki moi bainapai ku ari ku ri sanduki. 21Ko ki ndu na sanduki ku vuru banye yo, ki asi roko kparaba, ki kpara sanduki dezirepai; wa Yekova arugu Mose na ni. 22Ko ki moi mbisa ku rogo bamburoko dungurati yo, pavuru banye ku nodiyo, pati roko kparaba ku zegi yo, 23ko ki moi kpokuta ku auru he nzunzu ku bangiri Yekova; a wa Yekova arugu Mose na ni. 24Ko ki moi baduawe vuru bamburoko dungurati yo, pati mbisa ku bani, pavuru banye ku sudiyo; 25ko ki tigi awe ku bangiri Yekova, a wa Yekova arugu Mose na ni. 26Ko ki moi bamotumo dahabu vuru bamburoko dungurati yo barangba roko kparaba, 27ki zo wene fuõngua auru he; a wa Yekova arugu Mose na ni. 28Ko ki asi roko kparaba ku baha ti ngbadimo banye. 29Ko ki moi bamotumo zozo motumo pati ngbadimo banye bamburoko dungurati, ki tumo auru he ni zozo motumo, na motumo riahe a; a wa Yekova arugu Mose na ni. 30Ko ki moi kurungbu zundatise dagba bamburoko dungurati na bamotumo, ki uka ime ku rogo yo, tipa mbeda ha, 31aMose na Arona na awiriko ki zundu abeyo na anduyo yo; 32i ki nizundu tiyo ho i anindu ni ku vuru bamburoko dungurati yo, na ho i animbedi ni na bamotumo, wa Yekova arugu Mose na ni. 33Ko ki dua gbaraga vurukporo ku ari kirikiri pati banye na pati bamotumo, ki asi asiasi aroko kparaba ti ngbadimo vurukporo. Were Mose anyasi gu sunge re.

Pa bakamikami Dubo ku ri Banye

(Geda 9:15-23)

34Fuo gure, bakamikami dubo ki dadi ri bamburoko dungurati, ga Yekova taarimo ki hisi banye. 35Ka Mose arengba nga na rima ku tii bamburoko dungurati yo ya, bambiko bakamikami dubo anye ri he, ga Yekova taarimo ki hisi banye. 36Hoianidi bakamikami dubo ni ku ari ri banye, awiri aYisaraere ki nisusi ku mbata yo, ti rago gayo anunguro dunduko; 37ono ka i adia nga bakamikami dubo ku ari yo ya, si du ka i andu nga a ya, dati kina gu uru di yo ho ri he yo ku ari. 38Bambiko ga Yekova bakamikami dubo anidu ri banye uru, we ki du rogo ho yo na yuru, ku bangiri ngbatunga aYisaraere dunduko, rago gayo anunguro dunduko.

Currently Selected:

Gate 40: ZB1978

Highlight

Copy