Yezekere 38

Gumba pai wa nebi kuti Gogo

1Sangba Yekova ki ye kono du mi ni niya: 2“Wiri boro, mo sá kpakpuro koyo du Gogo ni, du rogo gu ringara nga ga Magogo, gu gbia abazogo nga ga Meseke ko na ga Tubara ko, ki gumba pai wa nebi kuti ko, 3ki ya, Ya Gbia MBORI wẽ: Ako Gogo, mo ngére, mi gbarasi rimoro, nga gbia abazogo nga ga Meseke ko na ga Tubara ko; 4mi aária ro ku sa yo, ki moi kombe ku biringa ngbaro yo, mi ki kusi ro, na gamo rimbasa vura dunduko, afarasi na abanduri afarasi, agu yo dunduko ukadi tiyo na roko vura ki rengbe arengba, bakere rimbasa agu aboro, i dunduko na gayo bakikii vurakube na vurakube a, na abaasape beyo; 5Parasa du na yo, na Kusa, na Puta, i dunduko du na vurakube na kpakpari marã; 6Go mere na gako bakere rimbasa a; na Bete-togaruma na gako bakere rimbasa avura dunduko ti mburu apapara rago nodiyo dunduko dungu aboro du na mo.

7“Mo mbákadi tiro ki du ni mbakadimbakadi tiro, mo na rimbasa agu aboro nga agu yo dungura tiyo ku pati ro kirikiri, mo ki du ni babanda yo. 8Fuo dungu arame oni ki vo bakere gbuu; ti agu agarã ku mbata yo oni andú sa gu ringara nga gu du ni mbakadimbakadi he fuo vura, gu ringara yo aboro adungura tiyo ku ho ni dagba dungu arikaaboro yo ku ri abaagangara du Yisaraere yo, nga gu du ni ngbi ugure kindi; i akusi gaha aboro be arikaaboro i naraka awere ni zezeredi yo, i dunduko. 9Mo andú ku mbata yo, niye wa bakamikami yuge, mo adú na gamo bakere rimbasa avura dunduko, na dungu aboro fuo ro.

10“Ya Gbia MBORI wẽ: Ti gu rago re aberã ayé ku rogo ga berã, mo ki nisangi gu gbegberẽpai, ki ya, 11‘Mi andú sa gu ringara nga gu zanga ngapa pati akporo ho; mi ati ku ri agu aboro du zezeredi naraka zezeredi, i dunduko naraka zanga ngapa bakporo pati yo, adu nga na ngbongbo susu watadu akpuguru bakporo ti ni ya’; 12mi azía úmozi ki tindi gbugbu ahe ku sa yo; ki zubo ngbi ugure nga gu aboro araka rogo ho awere, na agu aboro i adungura yo dagba arikaaboro yo, nadu na zogozogo anya na bagibagi ahe, naraka bebere ringara yo. 13Seba na Dedana na agu ababagiahe nga ga Tarusisa yo, na gaha akporo dunduko, i ayá foro, ‘Mo niye ka zia úmozi? Mo dungura gamo rimbasa agu aboro ka tinda gbugbu ahe ku sa yo, ka tinda feda na dahabu, ka roga zogozogo anya na bagibagi ahe, ka zia bakere úmozi?’

14“Si du, wiri boro, mo gúmba pai wa nebi, ki ya fu Gogo, Ya Gbia MBORI wẽ: Ni gu rago gimi aboro aYisaraere ka raka ni zezeredi, mo azíngisa tiro, 15ki kuru rogo ga ba ti mburu apapara rago nodiyo, mo na dungu aboro na mo, i dunduko nioro ri kina afarasi, nga bakere rimbasa agu aboro, rimbasa vura du na ome; 16mo akúra kuti gimi aboro aYisaraere, wa dubo na dada ringara. Rogo kusa rago mi ayé na mo kuti gi ringara, ya arikaaboro ini re, Ako Gogo, ho mi ka du ni ni kparakpara re ziazia ku bangiriyo mbiko ro.

17“Ya Gbia MBORI wẽ: Mo nga gu ko mi agumba pa ko ni agu arago mbata ku ngba gimi amoyambu nga anebi nga ga aYisaraere yo nanagumba pai ti dungu agarã rogo agu arago re ya mi ayé na mo kuti yo? 18Ono ni gu rago re, wo poi Gbia MBORI, ho Gogo ka ye ni kuti gu ringara nga ga aYisaraere, gi ngariangaria zinga adú ni zingisizingisi he. 19Bambiko mi taki pande pai rogo gi deringo na rogo gi dingidingi ngbaduse, Ya ni gu rago re bakere kio adú rogo ringara aYisaraere; 20atĩo baime akio bara bangire, na azire ari, na anya nvuo, na agu agbiro dunduko nagbe tira sande, na agu aboro dunduko du auru kpotosende, i abáfa abaagangara ku sande, deperangu ambia atíwa, angapa bakporo dunduko atíwa ku sande. 21Mi ayámba ngbatunga agbudagbuda dú kuti Gogo, wo poi Gbia MBORI; ga aboro abasape adú kuti kina awirinayo ni ba sa sa. 22Mi asára ngbanga kuti ko na tata kaza na uka kure; mi ki kedi mai ku ri ko nga bavugumo mai na morogumba, na we na baruti, na ku ri gako bakere rimbasa vura na gu badungu yo du na ko a. 23Si du mi ayúgo pa gi du ni bahe na pa gi du ziazia ki yugu tire ku bangiri dungu arikaaboro i ini re. Si du i aína ha ya mi nga Yekova.

Currently Selected:

Yezekere 38: ZB1978

Highlight

Copy