Yezekere 37

Gu Ngboongboorago nga ga ugu ameme

1Be Yekova adu ti re, ko ki kusi re yo be gako Toro, ki moi re ku sande rogo ngboongboorago; si ahi ahi be meme aboro. 2Ko ki susi na mi Dati he kirikiri; oni ngére, badungu ameme nadu yo rogo ngboongboorago; were, si adu ni baugu he gbe. 3Ko ki ya fere, “Wiri boro, ka agi ameme re du ni ungaha berewe?” Mi ki karaga ha, “Ako Gbia MBORI, mo ini he.” 4Ko ki ya fere berewe, “Mo gúmba pai fu agi ameme re, ki ya fu he Ako ugu ameme, oni gí sangba Yekova. 5Ya Gbia MBORI fu agi ameme re wẽ: Oni ngére, mi arímisa omeonga ku rogo roni yo, oni ki du ni ungaroni. 6Mi amáa agbaga ti roni, ki moi pasio ti roni, ki moi kpotoboro ti roni, ki moi omeonga ku rogo roni yo, oni ki du ni ungaroni; oni ki ini he ya mi nga Yekova.”

7Si du mi ki gumba pai wa nebi wa Yekova arugu re na ni; wa mi agumba ha, oni ngére, worohe ki wo kesekese; ameme ki zungudi tihe wa sa, meme kuti kina gaha meme. 8Mi ki ngere, ki bi agbaga ti ni, pasio ki ye ku ti ni, kpotoboro ki du ti ni a; ono omeonga adu nga rogo ho yo te. 9Si du ko ki ya fere, “Mo gúmba pai wa nebi fu omeonga, Ya Gbia MBORI wẽ: Ako omeonga, mo ye rogo agu ayuge du biama, ki ongo ku ri gi imiimi aboro re, i du ni ungayo.” 10Si du mi agumba pai wa ko arugu re na ni, omeonga ki rimi ku rogo yo yo, i ki du ni ungayo, ki ru ku ngba nduyo, ni bakere rimbasa aboro gbe.

11Ko ki ya fere, “Wiri boro, agi ameme re nga ngbatunga aYisaraere dunduko. Mo ngére, ya yo, ‘Memerani ugu du, gaani maabangirise go ti rani; i akpara rani Ku sa yo.’ 12Si du mo gúmba pai wa nebi, ki ya fu yo, Ya Gbia MBORI wẽ: Oni ngére, Ako gimi aboro, mi azá amurãroni, ki kusi roni rogo amurãroni yo; mi ayéga na oni ku kporo no berewe na ku rogo ringara aYisaraere. 13Ako gimi aboro, oni aína ha ya mi nga Yekova ho mi ka zaka amurãroni ni, ki kusi roni rogo amurãroni yo. 14Mi ki moi gi Toro ku rogo roni yo, oni ki du ni ungaroni, mi ki moi roni ku rogo kina gaoni ringara; si du oni aína ha ya mi nga Yekova nagumba ha, mi mangi he, wo poi Yekova.”

Gumbapai wa nebi tipa pa kpamia Yuda na Yisaraere berewe

15Sangba Yekova aye kono du mi ni niya: 16“Wiri boro, mo di ngua ki ke pai ti ni, ‘Tipa Yuda, na tipa awiri aYisaraere kpamia tiyo na ko’; mo ki di kura ngua ki ke pai ti ni, ‘Tipa Yosefa ga Efuraima ngua, na tipa gu ngbatunga aYisaraere kpamia tiyo na ko’; 17mo ki zungu he wa sa ku rogo ngua sa, si du wa ngua sa ku be ro. 18Ho awiri ngbatungaro ka ya ni foro, ‘Ka mo yugu nga gu pai fu rani yugu mo na agi angua te re?’ 19Mo yá fu yo, Ya Gbia MBORI wẽ: Oni ngére, mi nikadia ga Yosefa ngua nga gu du be Efuraima na gu ngbatunga aYisaraere kpamia tiyo na ko; mi ki zungu ga Yuda ngua kuti ni, si ki du wa ngua sa, ya si du sa ku be re. 20Ho agu angua mo nike pai ti ni ka du ni be ro ku bangiriyo, 21mo ki ya fu yo, Ya Gbia MBORI wẽ: Oni ngére, mi aróga awiri aYisaraere be arikaaboro dagba agu yo yo i andu ku ho ni, mi ki dungura yo rogo pavururago dunduko, ki ye na yo ku rogo kina gayo ringara; 22mi ki kpamia yo wa rikaaboro sa rogo ringara, ri abaagangara Yisaraere yo; bakindo ki du sa ku ri yo dunduko; ka i adú nga berewe ni arikaaboro ue ya, ka i akparaka nga berewe ku rogo angbi ue a ya. 23I abírikosi nga tiyo berewe na gayo kpiaahe na gayo kere ahe te, watadu na gayo samungu a te; ono mi abátasa yo ti gu tikusayo i amangi ingapai rogo ho, ki girisi yo; i ki du ni gimi aboro, mi ki du ni gayo Mbori.

24“Gi moyambu nga Dawidi adú ni bakindo ku ri yo; i ki du na babanda akandoro sa. I apéka fuo gimi rugaapai ki nibanda pa gimi asarangbanga, ki nimangi he. 25I aráka rogo gu ringara yo abaroni anaraka ni nga gu mi afu fu Yakoba gi moyambu; i na awiriyo na awiri awiriyo aráka yo nye anye kindi; Dawidi gi moyambu adú ni bazogoyo nye anye kindi. 26Mi amánga mokido nga ga zereda na yo; si adú ni nyenye mokido na yo; mi ki fu maku fu yo ki ngeesi yo, mi ki moi gi kparakpara ba dagba yo nye anye kindi. 27Gi baraka adú na yo; mi ki du ni gayo Mbori, i ki du ni gimi aboro. 28Si du arikaaboro aína ha ya mi nga Yekova kpara awiri aYisaraere ziazia, ho gi kparakpara ziazia ba ka du ni dagba yo nye anye kindi.”

Currently Selected:

Yezekere 37: ZB1978

Highlight

Copy