Yezekere 28

Gumba pai wa nebi kuti Bakindo Tura

1Sangba Yekova ki ye kono du mi O ni niya: 2“Wiri boro, mo gúmba pai fu bazogo Tura, Ya Gbia MBORI wẽ:

“Bambiko kpotoro yo nakiisa pa tihe,

mo ki ya, ‘Mi nga mbori,

Mi sungu rogo basunga nga ga mbori,

bebere abaime yo,’

ono mo ta du ni boro, mbori te,

ka mo vura wisiga pa tiro ni iratatamana wa mbori―

3mo nga iratatamana ni rengo ki susi Daniere;

a nga rondo ho du ni gbugbu he ti ro te;

4mo bi ngarã tipa ro

be ga tatamana na ga rugatinapai,

ki dungura dahabu na feda ku rogo

gamo abaigaamarã yo;

5mo kiisi pa ga ngarã

be ga bakere tatamana rogo bagaahe,

kpotoro yo ki kiisi pa tihe be ga ngarã a―

6si du ya Gbia MBORI wẽ:

Bambiko mo berẽ pa tiro

wa iratatamana wa mbori,

7si du, mo ngére; mi ayé na kungba aboro ku ri ro,

nga airakigisa aboro dagba arikaaboro susi;

i ki mofo gayo abaasape kuti wene ngbanya ga tatamana,

ki birikosi gamo taataa apai.

81 atúra ro ku Due yo,

mo ki kpi gu kpio nga ga imiimi yo

bebere abaime yo.

9Mo naya kindi, ‘Mi nga mbori’?

ku bangiri agu yo naimo ro,

ka mo vura du ono ni boro, ni mbori te,

ku be agu yo nahoga ro.

10Mo akpi gu kpio nga ga azangaye ratise

ku be kungba aboro;

bambiko mi gumba ha, wa poi Gbia MBORI.”

Kpenunga ku ri Bakindo Tura

11Sangba Yekova ki ye kono du mi ni ku ri gere niya: 12“Wiri boro, mo tóna biakpe ku ri bakindo Tura, ki ya fu ko, Ya Gbia MBORI wẽ:

“Mo adu wa tongo ido nga ga ndikidi pai,

hi ahi be tatamana,

ki du ziazia rogo wene ngbanyaro.

13Mo adu Edene yo, gu ati nga ga Mbori;

kikiipa ambia dunduko adu ni gu he naadada ro,

nga sadio, tapazo, yaroma,

rusoriso, oniki, yasipi,

safera, zumeradi, taataa mbia;

i amangi he dunduko na taataa dahabu si zi he ku baha,

na gamo gbakigbaki aze.

Si adu ni mbakadimbakadi he

ti gu uru i amangi ro.

14Mi amoi ro na gu mbedimbedi keruba nabanda pai;

mo adu ri ga Mbori ziazia bagangara yo;

mo ata dagba ambia we.

15Mo adu zanga gbarasa rimoro rogo gamo apai

tona ti gu uru i amangi ro,

daho i abi irairapai ni rogo ro yo.

16Mo ahi be zuu,

mbiko gu kpaima bagibagi ahe nangia gamo, mo ki mangi ingapai;

si du mi aba ro wa birikobiriko he ri ga Mbori bagangara,

gu keruba nabanda pai ki do ro ku zegi yo

ku dagba ambia we yo.

17Kpotoro yo akiisi pa tihe mbiko wene ngbanyaro;

mo awasi ga tatamana

mbiko ga taataa apai.

Mi aba ro ku sande;

mi akusi ro ku bangiri abakindo, i ki bi ro abi ni bangiriyo.

18Mo abirikosi gamo kparakpara aba;

mbiko rimbasa gamo irairaapai,

rogo pa ga sunge bagahe zanga rurupai;

si du mi akusi we rogo ro yo;

si ariti ro,

mi ki sa ro ni kuke auru kpotosende

ku bangiri agu yo dunduko nabi ro.

19Agu aboro dunduko ini ro dagba aboro

i nakiga mbiko ro;

mo da ti iiriwo digidapai,

ka mo adú nga ho berewe nye anye kindi ya.”

Gumba pai wa nebi kuti Sidona

20Sangba Yekova ki ye kono du mi ni niya: 21“Wiri boro, mo sá kpakpuro koyo du Sidona ni, ki gumba pai wa nebi kuti he, 22ki ya, Ya Gbia MBORI wẽ:

“Ako Sidona, mo ngére, mi gbarasi rimoro,

mi adú ni irisiirisi re rogo bangbanda ro.

I ki ini he ya mi nga Yekova

ho mi ka sara ngbanga ni rogo ho yo,

ki du ni kparakpara re ziazia rogo ho yo;

23bambiko mi akéda tata kaza ku rogo ho yo,

na kure ku ngba gaha agene bakporo;

kangba ki niti rogo ho yo,

be gu basape nga gu du kuti he ti papara arago dunduko.

Si du i aina ha ya mi nga Yekova.

24“Kiwe adú nga yo berewe tipa ngbatunga aYisaraere, ka rupa yo watadu nguruza ka imisa yo dagba akurayo dunduko napayasi yo te. Si du i aina ha ya mi nga Gbia MBORI.

25“Ya Gbia MBORI wẽ: Ho mi ka dungura ngbatunga aYisaraere ni dagba agu aboro yo i agbandaka yo ku ho ni, ki du ni kparakpara re ziazia rogo yo yo ku bangiri arikaaboro, si du i aráka kina rogo gayo ringara nga gu mi afu fu gi moyambu nangia Yakoba. 26I ki niraki zezeredi rogo ho, i ki nidudua abambu niruku bakakue aati yo. I aráka zezeredi ho mi ka sara ngbanga ni ku ri akurayo dunduko napayasi yo. Si du i aina ha ya mi nga Yekova gayo Mbori.”

Currently Selected:

Yezekere 28: ZB1978

Highlight

Copy