Yezekere 29

Gumba pai wa nebi kuti Ezipeta

1Ti bawe garã, ti bawe diwi, ti rameru 12, sangba Yekova ki ye kono du mi ni niya: 2“Wiri boro, mo sá kpakpuro kuti Faro bakindo aEzipeto, ki gumba pai wa nebi kuti ko na kuti aboro Ezipeta dunduko; 3mo gúmba pai, ki ya, Ya Gbia MBORI wẽ:

“Faro bakindo aEzipeto, mo ngére,

mi gbarasi rimoro,

mo nga gu bakere daragona napi

rogo gau wiriadi,

nga gu ru naya, ‘Gi di re nga Nire nga gimi;

mi namangi he tipa re.’

4Mi amáa akombe ku biringa ngbaro yo,

ki idi he fu agu atio du rogo gamo awiriadi ami dika tira kuti iriro;

mi ki gbe ro rogo gamo awiriadi yo,

na agu atio dunduko du rogo gamo awiriadi yo

nadika tira kuti iriro.

5Mi ki ba ro ku ngbakungba yo,

mo na agu atio du rogo gamo awiriadi yo dunduko;

mo ati ku rogo haúrago yo,

ka i adia nga ro ka kpisida ro ya.

Mi afú ro wa riahe

fu anya kpotosende na azire ari.

6“Si du araki Ezipeta yo dunduko aina ha ya mi nga Yekova. Bambiko wa mo adu ni nganzi songoda fu ngbatunga aYisaraere; 7ho i azi ro ni ni beyo, mo ki kiti, ki sipi akpafu beyo dunduko; ho i amegedi kuti ro ni, mo ki kiti dimoyo ki mangi he si kio; 8si du ya Gbia MBORI wẽ: Mo ngére, mi ayé na basape sa ro, ki rogo aboro na anya ku sa yo ti ro; 9ringara Ezipeta adú ni vurubate ni ngbi ugure. Si du i aina ha ya mi nga Yekova.

“Bambiko ya mo, ‘Di nga Nire nga gimi, mi amangi he,’ 10mo ngére, si du mi gbarasi rimoro, mi ki zingi kuti gamo awiriadi, mi ki sa ringara Ezipeta ni ngbi ugure, ni vurubate tona Migedora yo ki da ku Sewene yo, ki da ti kina bangbanda Etiopia. 11Ndu boro asúsa nga rogo ho te; ka ndu nya asúsa nga rogo ho a ya; si adú zanga araki rogo ho garã ki du 40. 12Mi ki sa ringara Ezipeta ni vurubate dagba agu aringara du wa bate, na gaha abaakporo wa vurubate dagba agu abaakporo du wa ngbi ugure, garã ki du 40. Mi agbandaka aEzipeto ku dagba arikaaboro yo, ki kparaka yo ku rogo aringara.

13“Bambiko ya Gbia MBORI wẽ: Ti digida 40 garã mi adúngura aEzipeto be agu aboro i agbandaka yo koyo du yo ni; 14mi ki karaga aEzipeto gene zia yo yo, ki ye na yo berewe ku rogo ringara Paterosa, nga gayo ndikidi ringara; yo i ka du ni ni aboro payasipayasi ngbi. 15Si ki du ni gu payasipayasi ngbi ki susi angbi du, ka si aábia nga tihe berewe ku ri arikaaboro ya; mi ki sa ha ni kina wiri toni he ka si azóga nga arikaaboro berewe wa sa ya. 16Ka si adú nga ni úkidohe tipa ngbatunga aYisaraere berewe ya, nitíngidi pa gayo irairapai, ho i ka sa tiyo ni fuo yo tipa undahe. Si du i aina ha ya mi nga Gbia MBORI.”

17Ti 27 garã, ti bambata diwi, ti bambata rameru, sangba Yekova ki ye kono du mi ni niya: 18“Wiri boro, Nebukadenesara bakindo aBabero arugu gako rimbasa vura si so vura nyanyaki kuti Tura; ri aboro yo dunduko ki du na kpatakpa, pagorõ aboro dunduko ki mbumburu zukpa; ono ko na gako rimbasa vura adia nga mosoro be Tura ka fu he tipa gu vura ko aso ho kuti ni a te. 19Si du ya Gbia MBORI wẽ: Mo ngére, mi afú ringara Ezipeta ku be Nebukadenesara bakindo aBabero; ko ki rogo gaha rimbasa aboro ku sa yo ki gbarasi ahe ki gbu ahe; si ki du ni ga gako rimbasa vura mosoro. 20Mi fu ringara Ezipeta wa gako mosoro tipa gu sunge ko amangi he, bambiko i mangi sunge fere, wo poi Gbia MBORI.

21“Ti gu uru re mi akusa ome si kuru tipa ngbatunga aYisaraere, mi ki za ngbaro dagba yo. Si du i ki ini he ya mi nga Yekova.”

Currently Selected:

Yezekere 29: ZB1978

Highlight

Copy