2 AKorindo 7

1Wa du ani na agi akidohe be rani tie re, amangure, ani gírisi tirani be gu meteka dunduko nga ga borose na toro, nimbakadi ziaziapai nzunzu rogo gunde ti Mbori.

Ga Pauro ngbarago mbiko ga kanisa saberã

2Oni fú ba fu rani ku ngbaduroni yo. Ani amanga nga gbegberẽ fu boro wa sa te, ani airasi nga boro wa sa te, ani amanga nga boro ni biriki wa sa te. 3Mi agumba nga ha ka kita ngbanga roni te bambiko mi agumba ha mbata, ya oni ngbadurani yo, ka ani mongo kpiki na ka ani mongo nye ni ungarani. 4Fugore du koyo du oni ni zukazuka gbe, gi sambuati du ni bakere he tipa roni: mi hi ahi be wasa, mi hi be ngbarago susi rogo gaani gberãngbi dunduko.

5Bambiko ni kina gu rago ho ani ada ni ku Makedonia no, ongoda adu nga fu bororani ho te ono i arungosi rani kirikiri, sopa vura adu ku zegi yo, gunde ki du ku kpotorani yo. 6Si avura du wo vurũ, gu ko nafu wasa fu agu yo nga abayee, kina Mbori, ko afu wasa fu rani be ye Tito; 7na mbiko ye ko sa te, ono mbiko gu wasa oni angarasi ko na ni a, wa ko ape pa gaoni nyemuhe, pa gaoni rungo, pa gaoni nyaka tipa re; si mi angi angi mbiko ho susi. 8Bambiko mi avura ba rungo ti roni ni gi keke waraga vurũ, si agberã nga ti re, wa si agberẽ ti re mbata te; mbiko mi bi he ya gu keke waraga re si aba rungo ti roni, ono si adu ngbutuko. 9Awere mi nangi angi mbiko i aba rungo ti roni te, ono mbiko i aba rungo ti roni sa saberã: bambiko i aba rungo ti roni wa du pa Mbori, ya ka oni zanga nga pai mbiko rani wa sa ya. 10Bambiko gu rungo du na pa Mbori, si nandu sa saberã tipa bata, nga gu saberã aye nga na birãtise kusa ya. Ono gu rungo nga ga zegino si nandu sa kpio. 11Bambiko oni ngére, kina boro gi pai re, nga ba rungo ti roni wa du pa Mbori, gu kakaka bandatise si amangi rogo roni yo, ii, na mbakada tironi, ii, na imisiringbaduse, ii, na gunde, ii, na nyemu he, ii, na nyaka, ii, rogo pa sapangbanga. Oni ayugu tironi rogo apai yo dunduko ya oni adu ziazia ti gi pai re. 12Si du wa mi avura ke pai fu roni, mi ake nga ha tipa gu ko namangi gu gbegberẽpai te re, na tipa gu ko nahi gu gbegberẽpai a te re, ono ya gaoni kakaka berã pa rani au ni kusikusi he fu roni ku bangiri Mbori. 13Si du i afu wasa fu rani ti ni.

Rogo gaani wasa ani ki ngi angi bakere susi mbiko gu ngbarago nga ga Tito, bambiko toroko adu ni ngarãsingarãsi he be roni dunduko. 14Mbiko si ngia mi asambua he fu ko mbiko roni, si adu nga ni zee fere te; ono wa ani agumba apai fu roni ni rengo dunduko, a wo gaani sambuahe a, nga gu mi amangi barangba Tito i abi he ya si du ni rengo. 15Gako nyemuhe du kpotoko yo si ki du kovo du oni ni ni bakere he susi, wa ko atingida pa gu giasangba nga gaoni dunduko, wa oni adi ko ku gume ni gunde na kio. 16Mi nangi angi ya mi rengbe na kida kuti roni rogo apai yo dunduko.

Currently Selected:

2 AKorindo 7: ZB1978

Highlight

Copy