2 AKorindo 6
6
1Wa ani namanga pai na ko ani nazungadi roni a ya ka oni adia nga ga Mbori undahe gbua ya 2bambiko ya ko,
“Ni gu rago nangba angba mi agi pa ro,
ni gu rago nga ga bata mi aunda ro.”
Mo ngére, awere nga gu rago ngba angba; mo ngére, areme nga rago bata. 3Ka ani fú nga ũkota rogo gu pai yo wa sa ya, ya ka i dingisa nga pai ti gaani mangaapai ya; 4ono rogo apai yo dunduko ani nimbakadi rimorani, wa amangipa Mbori, rogo bakere zadapai, rogo agberãngbi, rogo adingisaro, rogo arungo, 5rogo amandoro, rogo kisa rani ku abambukisa yo, rogo abasapu, rogo nyanyaki asunge, rogo pida arago, rogo gina ahe; 6rogo ziaziapai, rogo inahe, rogo gbanga hipai, rogo weneringise, rogo Ziazia Toro yo, rogo ndikidi nyemuse, 7rogo gu pai nga ga rengo, rogo gu tandu nga ga Mbori; be gu ũvura nga ga rurupai ku kumbabe yo na ku gare yo, 8be taarimo na wasiro, be gbegberẽ pande na wene pande; wa airabiriki, ono ani du ni airarengo; 9wa ka i aina nga rani ya, ono i ini rani wenengaĩ; wa kpikpi aboro, ono, mo ngére, ani ni ungarani; wa mbusimbusi aboro, ono ka i aimo nga rani ya; 10wa aboro rungo, ono ani ningi angi na arago dũ; wa aboro zingohe, ono ani nasa dungu aboro ni airakumuko; wa ka he adu nga be rani wa sa ya, ono ahe ki du ni gaani dunduko.
11Ako aKorindo, ani agumba pai fu roni zukazuka, ani aza ngbadurani fu roni. 12Ani akisa nga ngbadurani fu roni te, ono oni akisi ngbaduroni fu rani. 13Mi nagumba pai fu roni awere a wa ka oni du ni awire; oni yúgu apai fu rani a wa ani ayugu he fu roni, oni zá ngbaduroni fu rani!
Gu yekaru nga ga unga Mbori
14Ka i kpamia nga roni na azangaidapase wa si arengba nga ya ya, bambiko gini kpamiatise ka du dagba rurupai na irairapai? na gini ngbanya ka du dagba imarago na bitimo? 15Na gini zereda ka du dagba Kristo na gbegberẽ sino aboro? na gini pai ka du dagba idipase na zangaidapase? 16Na gini pai rengbe dagba ga Mbori yekaru na kpiaahe? mbiko ani nga gu yekaru nga ga gu Mbori du ni ungako; a wa Mbori agumba ha ya,
“Mi anyé rogo yo yo, ki nita dagba yo yo;
mi ki du ni gayo Mbori,
i ki du ni gimi aboro.
17Wa du he were oni kúru dagba yo yo,
ki kparaka, wo poi Gbia,
ka oni zádi nga birikobiriko he ya,
mi ki di roni adia ku gume,
18ki du fu roni ni Baroni,
oni ki du fere ni awire nga akumba na ade,
wo poi Gbia du na tandu apai dũ.”
Currently Selected:
2 AKorindo 6: ZB1978
Highlight
Share
Copy
Want to have your highlights saved across all your devices? Sign up or sign in
La Sainte Bible en Zande © Alliance Biblique Universelle, 1978.
