1 AKorindo 7

Kpakara apai tipa dia de

1Were tipa agu apai oni ake pa ha; Ka si du wa kumba adia nga de te, si ngba. 2Ono, mbiko pa bari akumba ka au na adiayo kperekese, ade ki du a na akumbayo kperekese. 3Kumba mángi gu pai ru fu diako, de ki mangi a wo fu kumbari. 4Dia boro adu nga na pa zoga borori te, kina kumbari, a wo ka kumba adu nga na pa zoga boroko te, kina diako. 5Ka gu ni ka nga fu gu ni ya, kina gu oni ka ida ha dagba roni yo tipa gu rago, ya oni fu tironi sa kpe, oni ki kpamia tironi berewe, Satana ka asada roni mbiko gaoni zanga rugatise. 6Ono mi nagumba gere ni ida ha, ni rugute te. 7Bambiko gu ka ngba ti re nga ka aboro du wa kina re tigimi dunduko. Ono aboro du na gayo gamahe yo du Mbori ni dunduko, gu ni wa gere, gu ni wa gure.

8Ono ya mi fu agu yo adu nga na adiayo ya, na fu adekurugbo, nye wa kina re ngba fu yo. 9Ono si ngia rugatise ti yo te, i rogo tiyo, bambiko rogatise ngba ti gbi agbi.

10Ono mi nagumba ha fu agu yo aima roga tiyo, mi a te, ono Gbia, ya ka de gúari nga pati kumbari ya, 11(ono si ngia ri guari, watadu ri nye ni sa ri, na ri mbakadi pai na kumbari berewe) ― ka kumba mbú nga diako a ya.

12Ono fu kura yo mi nagumba ha, Gbia te, ya ka gu wirina du na diani adu nga na idapase ya, ri ki idi ka nye na ni, ka ni mbú nga ri ya. 13Na gu de du na kumbari adu nga na idapase ya, ni ki idi ka nye na ri, ka ri mbú nga kumbari ya. 14Bambiko gu kumba adu nga na idapase ya, ni du ziazia mbiko diani, na gu de adu nga na idapase ya, ri du ziazia mbiko kumbari. Ka si adu nga wo ya ka awironi adu nga gigiri ya, ono awere i ziazia. 15Ono ka gu ni guari adu nga na idapase ya, ni gúari; ka si du wo, gu idipase nye, watadu kumba na de, ni adu nga ni vodivodi ni te, bambiko Mbori ayambu rani sa zereda. 16Bambiko, mo aina wãi, de, si ngia mo abátasa kumbamo? na mo aina wãi, kumba, si ngia mo abátasa diaro?

Ga Mbori yambahe tipa ro

17Ono, wa Gbia aringbisi he fu boro, wa Mbori ayambu boro, wo ka ni ta ata. Wo rugu mi he a fu akanisa dunduko. 18I ayambu gu boro i aima yera ni? Ka ni sá nga tini ni zangayeratise ya. I ayambu gu boro i ayera nga ni ya? Ka i yére nga ni ya. 19Yeratise nga he te, zangayeratise nga he te; ono ka kuti agu arugute nga ga Mbori. 20Boro nyé anye rogo gu pai ni adu ti ni ho i ayambu ni ni. 21I ayambu ro mo du ni kanga? Ka si dú nga ni pai bangiro ya. Ono ka ngia mo rengbe na kusa goro, manga mo wo ngba. 22Bambiko gu ni i ayambu ni rogo Gbia yo, ni du ni kanga, ni nga ga Gbia kusikusi boro; a wo gu ni i ayambu ni, ni ra ni rini, ni nga ga Kristo kanga. 23I angbe roni ni mosoro; ka oni yé nga ka du ni ga aboro akanga ya. 24Awirina, boro nyé na Mbori, rogo kina gu pai i ayambu ni ti ni.

Pa ngasu ade na adekurugbo

25Were tipa ngasu ade, rugute be re yo du Gbia ni te. Mi nafu gi berã, wa gu boro nadi inapai be Gbia ka ru aru. 26Mi berẽ he tie ya gi pai ngba re mbiko gu gberãngbi du awere, nga, du boro kina ku ho wa du ni ngba. 27I kpamia ro na diaro? Ka mo gbáta nga kparaka na ri ya. Mo kparaka na de? Ka mo kía nga de ya. 28Ono si ngia mo adia de, ingapai nga ha te; na ka ngasu de di kumba ingapai nga ha a te. Ono agu yo namanga wo, pai afúda boroyo afuda. Mi ki nikpi nyemu ka banda roni be he. 29Ono gumba mi gere fu roni, ya rago guru, ya fuo gere agu yo du na adiayo i du wa ka i adu nga na adiayo ya. 30Agu yo nakpara ni aume ki du wa ka i akpara nga ni aume ya. Agu yo nangi angi ki du wa ka i angi nga ya. Agu yo nangbe ahe, ki du wa ka he adu nga be yo ya. 31Agu yo namanga pai na gi zegino re ki du wa ka i aka nga kuti pa gi zegino re ya; bambiko pa gi zegino re nago ago.

32Ono mi nakpi nyemu oni bati be fudifudi apai. Gu ni adia nga de ya ni naberã pa agu apai nga ga Gbia, ya ni awira pa ngba na Gbia wãi. 33Ono gu ni du na diani ni naberã pa agu apai nga ga zegino, ya ni awira pa ngba na diani wãi. 34Diaboro akia ti ngasu de a. Gu ri adia nga kumba ya ri nabera pa agu apai nga ga Gbia, ya ri du ziazia ni borori na ni torori. Ono gu ri du na kumbari ri naberã pa agu apai nga ga zegino, ya ri awira pa ngba na kumbari wãi. 35Gumba mi gere bambiko ngba ha fu roni; mi nare gbina tipa roni, a nga si te, ono tipa gu pai ru aru, ya oni du zezeredi ka manga pa Gbia zanga fudifudi pai.

36Ono ka ngia gu boro naberã ha ya ni amanga nga pa ngasu wirini wenengaĩ te ka ri susi parangari, na ka pai ru aru wo, ni mangi gu ngba ti ni; ni ainga nga pai te; i rogo tiyo. 37Ono gu ni naru nyanyaki kpotoni yo, ka dingisaro adu nga ti ni ya, ono ni du na tandu manga gu pai ni aberã ha ni ki ya kpotoni yo tigani wẽ, ni aka kuti ngasu wirini, ni amanga ha wenengaĩ. 38Wa du he were tie gu ni nafu ngasu wirini sa rogatise ni namanga wenengaĩ; gu ni afu nga ri sa rogatise ya ni namanga ha wenengaĩ susi.

39De du ni vodivodi ri wa du kumbari ni ungani; ono ka kumbari aima kpi, ri rengbe na dia gu ni a wa ri ka kpi nyemu he, ono kina rogo Gbia yo. 40Ono ka ri nye kina ku ho si ngba fu ri, wo mi aberã ha: ya mi tigimi mi du na Toro Mbori a.

Currently Selected:

1 AKorindo 7: ZB1978

Highlight

Copy