1 AKorindo 6

Angbanga barangba azangaidapase

1Si ngia gu ni dagba roni yo du na pai kuti kurani, ni erẽ Ka nau ka gumba ngbanga barangba iraira aboro, ka ni andu nga ku barangba ga Mbori aboro ya? 2Na oni aina nga ha ya ga Mbori aboro nikasapa ngbanga aboro zegino te? Si ngia oni nikasapa ngbanga zegino tie, oni are nga na sapa agu apai du ni umba ha, te? 3Oni aina nga ha ya ani asápa ngbanga amaraika te? ngbatika, agu apai nga ga gi unga re? 4Si ngia oni nasapa ngbanga agu apai nga ga gi unga re tie, oni namaa agu yo ni abasapungbanga adu nga ni he dagba kanisa yo ya? 5Mi nagumba gere ka ba zee ti roni. Wo du he, ka oni bi nga gu iratatamana dagba roni yo ka rengbe na ringbisa pai dagba awirinani wa sa te, 6ono wirina nandu na ngbanga kuti wirina, ku barangba azangaidapase a?

7Oó, si wa oni ti bungudu wa du rago re a, bambiko oni na angbanga dagba roni yo. Ka oni vura hi irairapai si mangi wãi? ka i vura di he be roni si ngba susi gere te? 8Oó, ono oni namanga gbegberẽ tigaoni, ki nimangi aboro, nga awirinaroni a.

9Na oni aina nga ha te ya iraira aboro adia nga kumbo ga Mbori ngbi te? Ka i nángi nga roni ya; watadu airameteka, na airisikpiahe, na airabari, na azapu tiyo na akumba, 10na airadĩ, na akpihe, na akpibuda, na airasengahe, na agu yo naroga ga aboro ahe be yo ni aura, i adía nga kumbo ga Mbori ngbi te. 11Agu yo dagba roni yo a nadu ni amangi agi apai re, ono i azundu roni, ono i asa roni ni ziazia roni, ono i adi pai ri roni ni rimo Gbia Yesu Kristo, na rogo Toro gaani Mbori.

Moírisi Mbori ni bororo

12Agu roni naya, “Apai ru aru fere dunduko”, ono ngba nga manga apai dunduko te. Mi rengbe ka ya, “Apai ru aru fere dunduko”; ono mi aida nga ka fu tire ku tii tandu gu wa sa te. 13Ngbatunga anahe tipa vuse, vuse tipa ngbatunga ariahe: ono Mbori adígisa ha dunduko. Ono kpoto boro adu nga tipa pa meteka te, ono tipa Gbia; Gbia ki du tipa kpoto boro. 14Mbori azingisi Gbia be kpio, ko azíngisa rani a ni gako tandu. 15Oni aina nga ya bororoni nga apa Kristo te? Ka mi rogo apa Kristo tie, ki sa ha ni apa anatakuari? Wa sa te. 16Watadu oni aina nga ya gu ni nakpamia tini na natakuari ni nga boro sa na ri te? bambiko, ya ko, “I adu ue ni boro sa.” 17Ono gu ni nakpamia tini na Gbia nga toro sa na ko. 18Oni né pa bari. Gu ebegberẽapai boro namanga ha dunduko si vuru boro yo te; ono gu ni namanga pa bari ni nainga pai kuti boroni. 19Watadu oni aina nga ya bororoni nga yekaru nga ga Ziazia Toro du kpotoroni yo, nga gu naye fu roni yo du Mbori ni te? 20oni adu nga ni gaoni yo te; bambiko i angbe roni ni mosoro. Oni táasi rimo Mbori tie ni bororoni.

Currently Selected:

1 AKorindo 6: ZB1978

Highlight

Copy