MATIE 2
2
Owi hã zã wa tɛa we zɔ Yezu
1Wa kua Yezu tɛ Bɛtleɛmɛ, ngɔ nù Yude, do 'da fala kɛ Herodɛ zi a nwa ni. 'Do kula 'da a, nɛ Owi hã zã kɛ wa yambala zi gulu osɔlanɔ ni, wa yula si 'biti gba wese, nɛ wa hɔ tɛ Yeruzalɛmɛ. 2Nɛ wa aka na: “Wa kua be kɛ a sɛ a nwa 'da Oyudanɔ ni do nde? We kɛ lɛ zɔa sɔla kɛ ma be na wa kua a ni si 'biti gba wese i, ma kɛ lɛ tɛa we dɔnggɔ a ni.”
3Kɔ nwa Herodɛ nɛa we zele ní, nɛ zu a vĩ, mba do owi Yeruzalɛmɛ vɛ̃. 4Nɛ Herodɛ ngɛma li onwa nganganɔ, do owi be mbulanɔ 'da Oyuda vɛ̃, nɛ a aka wa na: “Wa wia we ko Mɛsiya do nde?”
5Nɛ wa gisa hã a na: “Wa wia we ko a tɛ Bɛtleɛmɛ, ngɔ nù Yude. We kɛ wi gba olo nu Gale kɔma na:
6‘Aa mɔ, le Bɛtleɛmɛ, ngɔ nù Yude,
mɔ a be le sanga olenɔ ngɔ nù Yude gɛ gɔ.
We kɛ mɔ ko sɛ gã nwa
kɛ a kpe sɛ dati winɔ 'da mi, obe Israɛlɛ ni.’ ”
7Nɛ Herodɛ sa mɔ hã Owi hã zãnɔ do ti tũ nɛ, nɛ a aka wa we ngba soe wa zɔa do sɔla ni. 8Kɔ wa tɔ̃a hã a do'do, nɛ a tombo wa tɛ Bɛtleɛmɛ i. Nɛ a tɔ̃ hã wa na: “Nɛ nɛ́, kɔ nɛ aka we be ni gbaa, hã nɛ kpa a, nɛ nɛ tɛ́, nɛ nɛ tɔ̃ we nɛ hã mi, takɔ mi nɛ tɛ mɛ 'bɔ we dɔnggɔ a.”
9-10Owi hã zãnɔ wa zila ní do'do, nɛ wa la. Kɔ wa nɛa we hɔ li wala i, nɛ wa zɔ 'bɔ kpo kpo sɔla wa zɔa ma si 'biti gba wese i ni tɛ la do dati wa. Nɛ wa zi do yangga wena we zɔ sɔla ni. Kɔ sɔla nɛa we hɔ dɛ ngɔ fala kɛ be nɛ ni, nɛ ma yolo nù. 11Nɛ wa ha tɔa, nɛ wa zɔ be do naa a Maria, nɛ wa gu nù, nɛ wa dɔngga be, nɛ wa yala tolenɔ 'da wa, nɛ wa kala mɔ mbali, fũ yɔmbɔ do nɔ mirɛ, nɛ wa 'dɔlɔ hã a. 12Nɛ 'do nɛ, nɛ Gale wila we hã wa do li yalɛ na, wa tɛ sì 'bɔ do kɛ 'da Herodɛ i gɔ. Na mɛ ni, nɛ wa ba gele wala, nɛ wa si dɛ ngɔ nùi 'da wa.
Wa yu do nzɔ Yezu dɛ ngɔ nù Ezipeto
13Owi hãnɔ wa la do'do, nɛ mbe anzɛ 'da Nwa Gale hɔ 'da Yozɛfu do kɔ yalɛ, nɛ a tɔ̃ hã a na: “Mɔ kúlú ngɔ, kɔ mɔ bá be do naa a, kɔ nɛ yú dɛ Ezipeto. Nɛ nɛ ɔ́ dɛ i mɔ gbaa, hã mi tɔ̃ hã mɔ na nɛ si, sɛ nɛ de. We kɛ Herodɛ nɛ fa be gɛ we gbɛ a gbɛa.”
14Nɛ Yozɛfu kulu ngɔ do tũi ni, nɛ a ba be do naa a, nɛ wa la dɛ Ezipeto i. 15Nɛ a ɔa i mɔ ni gbaa ndɔti nɛ a kɛ Herodɛ fia. Ma la na mɛ ni, takɔ we Nwa Gale tɔ̃a zɛ́ do wala 'da wi gba olo nu a na: “Mi sa mɔ hã be 'da mi ngɔ nù Ezipeto i na, a kulu ngɔ, hã a si” ni, ma dɛ tɛ̃ ɛ.
Wa gbɛa obenɔ
16Herodɛ nɛa we zɔ na, owi hãnɔ wa ɔlɔ ɛ ni, nɛ zã a nɔ̃lɔ̃ wena. Nɛ a ba nu a na, wa gbɛ obulu benɔ kɔ le Bɛtleɛmɛ vɛ̃, yolo ngɔ obe sabɛlɛ bɔa we zĩlĩ dɛ nù. Mba gɔ, a ndua nyanga tɔlɔ sabɛlɛ do ngba soe kɛ Owi hãnɔ wa tɔ̃a hã a na, lo zɔa do sɔla ni. 17Na mɛ ni, nɛ we Yeremi, wi gba olo nu Gale tɔ̃a zɛ́ ni, ma dɛa tɛ̃ ɛ. A tɔ̃a zɛ́ na:
18“Wa zila gɛlɛ wele kɔ le Rama,
a tɛ zɛ nu a tɛ ala nu a nganda wena.
Wi a Rasɛlɛ, hã a he kɔ̃a benɔ 'da a ni.
A kɔ̃̀ na, wele dungu do
ɛ hã a mbɔkɔ sila ɛ gɔ,
we duzu kɛ benɔ 'da a wa fia do'do.”
Wa kpula tɛ wa do Yezu dɛ ngɔ nù Israɛlɛ
19'Do kɛ Herodɛ fia ni, nɛ anzɛ 'da Nwa Gale hɔ 'bɔ 'da Yozɛfu do kɔ yalɛ tɛ Ezipeto i, 20nɛ a tɔ̃ hã Yozɛfu na: “Mɔ kúlú ngɔ, kɔ mɔ bá be do naa a, hã nɛ kpóló tɛ nɛ dɛ Israɛlɛ i. Mba gɔ, winɔ wa fa zi we gbɛ a ni, wa fia ia.”
21Nɛ Yozɛfu kulu ngɔ, nɛ a ba be do naa a, nɛ wa kpolo tɛ wa dɛ ngɔ nù Israɛlɛ. 22A hɔa i mɔ, nɛ a zele na, Arkelausi dungu nwa ngɔ nù Yude olo baa a Herodɛ, nɛ a dɛa kili we ɔ di ni. Nɛ 'do nɛ, nɛ Gale wila 'bɔ we hã a do li yalɛ na, a la dɛ ngɔ nù Galile. 23Nɛ wa la dɛ i mɔ, nɛ wa ɔa kɔ mbe le kpo li nɛ a Nazarɛtɛ. Ma la na mɛ ni, takɔ we owi gba olo nu Gale wa tɔ̃a zɛ́ na: “Wa sa sɛ li a na wi Nazarɛtɛ” ni, ma dɛ tɛ̃ ɛ.
Currently Selected:
MATIE 2: NGB
Highlight
Share
Copy
Want to have your highlights saved across all your devices? Sign up or sign in
Ngbaka DC Bible (We Nu Gale) Version © Bible Society of the Democratic Republic of Congo, 1995.