YOANƐ 16
16
1“Mi tɔ̃ hã nɛ na mɛ ni na, da dɛ kɔ nɛ lá fala kɔ̃ zu li mi gɔ. 2Wa ndaka sɛ nɛ kɔ tɔa mbulanɔ. Nɛ mbe ngba soe kpo, nɛ wa ma sɛ ngɔ gbɛ nɛ, nɛ wa lengge sɛ na, mɛnɔ lo dɛ ni, ma dɔnggɔ Gale dɔngga. 3Wa zɛlɛ sɛ tɛ nɛ na mɛ ni, we kɛ wa ĩ̀ ti Baa mi gɔ, nɛ wa ĩ̀ 'bɔ ti mi gɔ. 4Mi tɔ̃ wenɔ ni hã nɛ, takɔ 'da fala wa ma sɛ ngɔ zɛlɛ tɛ nɛ ni, nɛ ta zu nɛ gba ngɔ wenɔ mi tɔ̃a hã nɛ ni.
Dɛa toe 'da Hi Wi Santo
“Ndo nyanga kɛ lɛ ma zi ngɔ yɛnggɛ do nɛ ni, mi tɔ̃̀ zi wenɔ ni hã nɛ gɔ, we kɛ mi zi dɛ sanga nɛ. 5Kɔ ngangga ni, mi nɛ si 'da Baa mi, Wi tombo mi. Nɛ wele kpo sanga nɛ àkà mi na: ‘Mɔ nɛ do nde’ ni gɔ. 6Kɔ sila nɛ dunu do 'bako, we duzu wenɔ mi tɔ̃a hã nɛ ni. 7Nɛ nde mi tɔ̃ hã nɛ do gbãlã we na, we duzu nɛ, ma dia fɛ̃ na mi la. We kɛ mi là gɔ, nɛ nde Hi Wi Santo, Wi gbaka wi, a tɛ́ sɛ gɔ. Kɔ fala kɛ mi la, nɛ mi tombo sɛ a hã nɛ. 8Kɔ fala kɛ a tɛ, nɛ a be sɛ gulu 'dã mɔ, do bɔlɔ zu dɛa mɔ, do 'bili we 'da Gale hã owinɔ nù gɛ. We kɛ wa ĩ̀ ti gulu nɛ gɔ. 9Wa ĩ̀ ti gulu 'dã mɔ gɔ, we kɛ wa kɔ̃̀ zu li mi gɔ. 10Nɛ wa ĩ̀ ti gulu bɔlɔ zu dɛa mɔ gɔ, we kɛ mi si sɛ 'da Baa mi i, nɛ nɛ zɔ́ sɛ 'bɔ mi gɔ. 11Wa ĩ̀ ti gulu 'bili we 'da Gale gɔ, we kɛ Gale 'bili we 'da Satana, nwa ngɔ nùi gɛ ia.
12“Mi 'bɔ do mbé we we tɔ̃ hã nɛ wena, nɛ nde nɛ wé sɛ we zele ma vɛ̃ ngangga gɛ gɔ. 13Kɔ 'da fala kɛ Hi Wi Santo, kɛ a tɔ̃ gbãlã we ni a hɔ, nɛ a be sɛ gbãlã we ngɔ mɛnɔ vɛ̃ hã nɛ. A tɔ̃́ sɛ wenɔ do linggamɛ 'da a zu a kpo gɔ, nɛ nde a tɔ̃ sɛ vɛ̃ a kɛ a zila ma nu Gale ni. Nɛ a tɔ̃ sɛ 'bɔ we mɛnɔ kɛ ma hɔ sɛ ni. 14A hã sɛ dɔ̃lɔ̃ li hã mi, we kɛ wenɔ a tɔ̃ sɛ hã nɛ ni, a kpa sɛ ma 'da mi. 15Mɛnɔ 'da Baa mi vɛ̃ a mɔ́ mi. Gulu nɛ a mi tɔ̃ na, wenɔ Hi Wi Santo a tɔ̃ sɛ hã nɛ ni, a kpa sɛ ma 'da mi ni.
'Bako ma kifi sɛ yangga
16“Ma 'bana bi sĩ, nɛ nɛ zɔ́ sɛ 'bɔ mi gɔ. Kɔ 'do nɛ la 'bɔ bi sĩ, nɛ nɛ zɔ sɛ 'bɔ mi.”
17Nɛ ombe sanga owi yambala mɛnɔ wa aka ngba wa na: “Kɛ a tɔ̃ na, ma 'bana bi sĩ, nɛ lɛ zɔ́ sɛ ɛ gɔ, nɛ 'do nɛ 'bɔ bi sĩ, nɛ lɛ zɔ sɛ ɛ, do kɛ a tɔ̃ na, ɛ si 'da Baa ɛ ni, gulu nɛ na ge nde? 18Gulu we a tɔ̃ na, ma 'bana bi sĩ ni na ge nde? Lɛ ĩ̀ ti kɛ a tɔ̃ ni gɔ.”
19Nɛ Yezu ĩ na wa kɔ̃a we aka a ni, nɛ a tɔ̃ hã wa na: “Mi tɔ̃a sɔ hã nɛ na, ma 'bana bi sĩ, nɛ nɛ zɔ́ sɛ mi gɔ, nɛ 'do nɛ 'bɔ bi sĩ, nɛ nɛ zɔ sɛ 'bɔ mi. Kɔ nɛ aka ngba nɛ we wenɔ ni nde? 20Mi tɔ̃ hã nɛ do gbãlã we na, nɛ dungu sɛ do mili kɔ̃a, do 'bako, nɛ nde winɔ nù gɛ wa sɛ do yangga wena. Nɛ sɛ do 'bako, nɛ nde 'bakoe 'da nɛ ma kifi sɛ yangga. 21Ma ɔ nɛ fala kɛ wuko kɔlɔ fala ko nɛ, nɛ nde a do 'bako, we duzu kɛ ngba soe zɛlɛ kula 'da a kɔla ni. Kɔ fala kɛ be hɔ do'do, nɛ ta zu a ele ngɔ zɛlɛ kula, we kɛ a do yangga mbé be a kua a ni. 22Ma tɛ mɛ 'bɔ na mɛ ni we nɛ. Mba gɔ, ngangga ni, nɛ do 'bako, kɔ mi zɔ sɛ 'bɔ nɛ, nɛ sila nɛ ma dɛ sɛ yangga, nɛ wele wé sɛ we fo yangga ni gɔ.
23“Kɔ ngba soe kɛ nɛ zɔ sɛ 'bɔ mi ni we, nɛ nɛ áká sɛ 'bɔ mi aka gɔ. Mi tɔ̃ hã nɛ do gbãlã we na, Baa mi a hã sɛ mɛnɔ vɛ̃ kɛ nɛ gɔ ma kɔ̃ a do zu li mi ni hã nɛ. 24Gbaa tia do sɔɛ gɛ, nɛ tɛ gɔ̀ mɔ kɔ̃ Baa mi do zu li mi gɔ. Kɔ fala kɛ nɛ gɔ, nɛ nɛ kpa sɛ. Kɔ fala kɛ nɛ kpa ma, nɛ sila nɛ ma dunu sɛ do yangga.
Yezu do ngawi nɛa ngɔ mɛnɔ nù gɛ vɛ̃
25“Mi tɔ̃a zi wenɔ ni vɛ̃ hã nɛ do gba we. Kɔ 'do gɛ, nɛ nde mi tɔ̃́ sɛ 'bɔ hã nɛ do gba we gɔ. Mi tɔ̃ sɛ wenɔ 'da Baa mi hã nɛ dɛ wila fala iko. 26Kɔ ngba soe ni we, nɛ nɛ gɔ sɛ mɔ kɔ̃ Baa mi do zu li mi. Nɛ mi áká sɛ Baa mi we nɛ aka gɔ, 27we kɛ Baa mi ngboo kɔ̃a gɛnɛ nɛ. A kɔ̃a gɛnɛ nɛ, we kɛ nɛ kɔ̃a gɛnɛ mi, nɛ nɛ kɔ̃a na, mi yula 'da Gale. 28Mi yula zi 'da Baa mi, nɛ mi tɛa nù gɛ. Kɔ ngangga ni, mi nɛ la nùi gɛ, nɛ mi si dɛ 'da Baa mi i.”
29Nɛ Owi yambala mɛnɔ 'da a wa tɔ̃ na: “Mɔ zɔ́, ngangga ni mɔ tɔ̃a dɛ wila fala, mɔ tɔ̃̀ do gba we gɔ. 30Nɛ lɛ ĩ na, mɔ ĩ ti mɛnɔ vɛ̃, nɛ ma wè na, wele aka mɔ do we aka sɛ nɛ de gɔ. Ma kɛ lɛ kɔ̃a na, mɔ yula 'da Gale ni.”
31Nɛ Yezu gese hã wa na: “Ngangga ni, nɛ kɔ̃a ní ngboo nde? 32Do ngba soe ma tɛ 'do gɛ, nɛ ma hɔa 'bɔ ia ni, nɛ nɛ vɛ̃ nɛ pɛsɛ sɛ ndã ndã, nɛ wele do wele a si sɛ dɛ nu tɔa 'da a, nɛ nɛ la sɛ mi zu mi kpo. Nɛ nde mi sɛ zu mi kpo iko gɔ, we kɛ Baa mi do mi boe. 33Mi tɔ̃a zi wenɔ ni hã nɛ, takɔ nɛ mba do mi kpo, hã sila nɛ gɛ̃. Nɛ kpa sɛ zɛlɛ tɛ ngɔ nù gɛ, nɛ nde nɛ ɔ́ do kpã sila! Mba gɔ, ngawi 'da mi nɛa ngɔ mɛnɔ nù gɛ vɛ̃ ia.”
Currently Selected:
YOANƐ 16: NGB
Highlight
Share
Copy
Want to have your highlights saved across all your devices? Sign up or sign in
Ngbaka DC Bible (We Nu Gale) Version © Bible Society of the Democratic Republic of Congo, 1995.