YOANƐ 15
15
Yezu a te vinɔ
1“Mi a ngbongbo te vinɔ, nɛ Baa mi a wi wa fɔ nɛ. 2A 'bili gbakɔ̃ te vɛ̃ kɛ ma wálá gɔ ni, nɛ a fo ogisa nwá tɛ kɛnɔ ma wala ni, takɔ tɛ nɛ sa, nɛ ma wala dɛ dati. 3Nɛ nɛ, nɛ sa ia we duzu wenɔ mi bia zi hã nɛ ni. 4Nɛ 'báná dɛ kɔ mi, ɔ nɛ kɛ mi 'bana dɛ kɔ nɛ ni. Fala kɛ gbakɔ̃ te 'bànà dɛ tɛ te gɔ, nɛ nde ma wè tɛ wala nɛ gɔ. Nɛ nɛ ɔ tɛ mɛ 'bɔ na mɛ ni. Fala kɛ nɛ 'bànà dɛ kɔ mi gɔ, nɛ nde nɛ wé sɛ tɛ dɛ mɔ kpo gɔ.
5“Mi a te vinɔ, nɛ nɛ a ogbakɔ̃ nɛ. Wi kɛ a 'bana dɛ kɔ mi, nɛ mi 'bana dɛ kɔ a ni, a ɔ nɛ gbakɔ̃ te kɛ ma wala nɛ ge nde ni. Kɔ fala kɛ mi 'bànà dɛ kɔ nɛ gɔ, nɛ nde nɛ wé sɛ tɛ dɛ mɔ kpo gɔ. 6Wi kɛ a 'bànà dɛ kɔ mi gɔ, nɛ Gale a da sɛ a nza, ɔ nɛ gbakɔ̃ te kɛ ma kolo, kɔ ma gbini, nɛ wa kala, nɛ wa da li we, nɛ ma ngutu vɛ̃ ni. 7Kɔ fala kɛ nɛ 'bana dɛ kɔ mi, hã wenɔ 'da mi ma 'bana dɛ kɔ sila nɛ, nɛ nɛ kpa sɛ mɛnɔ kɛ nɛ gɔ ma ni vɛ̃. 8Nɛ zɔ́, mɛ kɛ ma hã dɔ̃lɔ̃ li hã Baa mi, mɛ a kɛ na, nɛ kó wala te wena, nɛ ma be sɛ na, nɛ a owinɔ 'da mi.
9“Mi kɔ̃a gɛnɛ nɛ, ɔ nɛ kɛ Baa mi kɔ̃a do gɛnɛ mi ni. Nɛ dɛ̃ na, mi 'bana tɛ kɔ̃ gɛnɛ nɛ ni fai. 10Fala kɛ nɛ dɛ mbula 'da mi, nɛ mi kɔ̃ sɛ gɛnɛ nɛ fai, ɔ nɛ kɛ mi dɛ mbulanɔ 'da Baa mi, nɛ a 'bana tɛ kɔ̃ gɛnɛ mi fai ni.
11“Mi tɔ̃ hã nɛ na mɛ ni, takɔ nɛ kpa yangga kɛ mi do ma ni, nɛ sila nɛ dunu do yangga. 12Nɛ zɔ́ mbula 'da mi ma kɛ: Nɛ kɔ̃́ gɛnɛ ngba nɛ, ɔ nɛ kɛ mi kɔ̃a do gɛnɛ nɛ ni. 13Kɔ̃a zã kɛ ma nɛa ngɔ mɔ vɛ̃, mɛ a kɛ na, wele kɔ̃ gɛnɛ ngbɛ ɛ, nɛ a fe we a ni. 14Kɔ fala kɛ nɛ dɛ mbula 'da mi, nɛ nde nɛ a oyali ngba mi. 15Nɛ mi sá sɛ 'bɔ li nɛ na Owi dɛa tonɔ 'da mi gɔ, we kɛ wi dɛa to ĩ̀ ti linggamɛ 'da nwa 'da a gɔ. Nɛ nde mi sa sɛ li nɛ na oyali ngba mi, we kɛ mi bia mɛnɔ kɛ mi kpa ma 'da Baa mi ni hã nɛ vɛ̃ ia. 16Nɛ a nɛ sàkà zi mi gɔ, nɛ nde mi a mi saka nɛ. Nɛ mi hã to hã nɛ na, nɛ ɔ nɛ te kɛ ma wa wala ni, nɛ wala tenɔ ni 'bana fai. Na mɛ ni, fala kɛ nɛ gɔ mɔ kɔ̃ Baa mi do zu li mi, nɛ a hã sɛ ma hã nɛ. 17Kɔ mbula mi kɔ̃a na, nɛ dɛ́ gɛ mɛ a kɛ na, nɛ kɔ̃́ gɛnɛ ngba nɛ.
Owele wa sɛna Yezu
18“Fala kɛ winɔ nùi gɛ wa sɛnɛ nɛ, nɛ nɛ ĩ́ na, wa sɛnɛ zi mi dati hã nɛ ia. 19Ɔ do kɛ nɛ sɔ a owinɔ nù gɛ, nɛ owinɔ nùi gɛ wa kɔ̃ sɔ gɛnɛ nɛ, we kɛ nɛ a winɔ 'da wa. Nɛ nde mi saka zi nɛ, nɛ mi kala nɛ sanga wa do'do, nɛ nɛ 'bɔ a winɔ 'da wa gɔ, ma kɛ winɔ nùi gɛ wa sɛnɛ nɛ ni. 20Nɛ lénggé do we mi tɔ̃a zi hã nɛ na: ‘Wi dɛa to nɛ̀ ngɔ gɛlɛ nwa 'da a gɔ’ ni. Fala kɛ wa zɛlɛ zi tɛ mi, nɛ wa zɛlɛ sɛ tɛ mɛ 'bɔ tɛ nɛ. Hã fala kɛ wa kɔ̃ zi we nu mi, nɛ wa kɔ̃ sɛ tɛ mɛ 'bɔ we nu nɛ. 21Wa dɛ sɛ mɛnɔ ni vɛ̃ do nɛ, we kɛ nɛ a owinɔ 'da mi, nɛ wa ĩ̀ ti Wi tombo mi gɔ. 22Fala kɛ mi tɛ̃ sɔ, hã mi tɔ̃ we hã wa gɔ, nɛ nde wa sɔ do 'dã mɔ bina. Kɔ ɔ nɛ kɛ mi tɛa, nɛ mi tɔ̃a hã wa ni, wa wè tɛ kafa 'dã mɛnɔ 'da wa gɔ. 23Wi kɛ a sɛnɛ mi, nɛ nde a sɛnɛ tɛ mɛ 'bɔ Baa mi. 24Fala kɛ mi dɛ̀ sɔ mbe mɔ, kɛ gele wele dɛ̀ ma dati gɔ ni dɛ li wa gɔ, nɛ nde wa sɔ do 'dã mɔ bina. Nɛ nde ngangga ni, wa zɔa mɛnɔ mi dɛa ni do gbali wa vɛ̃, nɛ wa sɛnɛ mi, nɛ wa sɛnɛ 'bɔ Baa mi. 25Ma la na mɛ ni, takɔ kɛ wa kɔma zɛ́ kɔ 'buku mbula 'da wa na: ‘Wa sɛnɛ mi yala iko’ ni, ma dɛ tɛ̃ ɛ.
26“Mi tombo sɛ Wi gbaka wi hã nɛ. A yolo sɛ 'da Baa mi, nɛ a be sɛ gulu gbãlã we hã nɛ. Kɔ 'da fala kɛ a tɛ, nɛ a tɔ̃ sɛ we ngɔ mi hã nɛ, we kɛ a yula 'da Baa mi. 27Nɛ nɛ tɛ mɛ 'bɔ, nɛ tɔ̃ sɛ we ngɔ mi, we kɛ nɛ zi fala nɛ kpo do mi, ndo do nyanga kɛ lɛ ma zi ngɔ yɛnggɛ do nɛ ni.
Currently Selected:
YOANƐ 15: NGB
Highlight
Share
Copy
Want to have your highlights saved across all your devices? Sign up or sign in
Ngbaka DC Bible (We Nu Gale) Version © Bible Society of the Democratic Republic of Congo, 1995.