Matayi 2
2
Bena meji badi baya kumona Yezu
1Kulelabu Yezu mu musoku wa Betleyeme,#2.1 Mu 1 Sam 16.1 badi bamba ne: Betleyeme ke musoku wa Davide. mu ditunga dia Yudeya. Tshikondu atshi Erode ke uvua mukalenga wa ditunga. Bamane kulela Yezu, bena meji, bavua balonge malu a mitotu bikole, kufikabu mu tshimenga tshia Yerushalayime, batumine luseke ludi diba dipatukila. 2Kukonkabu ne: — Muana udibu balele bua kuikalaye mukalenga wa bena Yuda udi penyi? Tudi bamone mutotu wende luseke ludi diba dipatukila. Ke patudi bafike bua kumukukuila.
3Mukalenga Erode ne bena Yerushalayime bonsu bumvue nanku, kupampakanabu bikole. 4Mukalenga Erode kubikidisha bamfumu bonsu ba batuangaji, ne balongeshi ba mikenji ba bena Izrayele. Kubakonkaye muaba uvuabu ne bua kulela Kristu. 5Kumuandamunabu ne:
— Mu musoku wa Betleyeme mu ditunga dia Yudeya. Bualu muambi uvua mufunde ne:
6“Wewe, Betleyeme, musoku wa mu ditunga dia Yudeya,
kuena mushadile ku misoku yonsu ya mu ditunga dia Yudeya.
Bualu kuudi wewe nkuafumina mfumu,
mulombodi wa bantu banyi, bena Izrayele.#2.6 Mi 5.1.”
7Ke Erode kubikidisha bena meji abu mu musokoku. Kubakonkaye diba menemene divua mutotu mumueneke. 8Pashishe kubatumaye ku musoku wa Betleyeme, ubambila ne:
— Nuye, nukebe muana bimpe. Panuikala bamusangane, nummanyishe. Nanku meme kabidi nenye kumukukuila.
9Bena meji bamane kumvua meyi a kudi mukalenga Erode, kutungunukabu ne luendu. Diba adi mutotu, uvuabu bamane kumona luseke ludi diba dipatukila, kubamuenekela kabidi. Uvua wenda kumpala kuabu. Mutotu ufika muaba uvua muana, kuimanawu mulu. 10Bena meji bamone mutotu wenza nanku, kusankabu bikole bipite. 11Kubuelabu mu nzubu, kumonabu muana ne mamuende Mariya. Kutuabu binu panshi bua kukukuila muana. Pashishe kusululabu mabuki abu, kupeshabu muana bintu bivuabu bamutuadile: tshiamu tshia mpawungi, musenga wa kamonya, ne manananshi. 12Kadi Mvidi Mukulu kubadimuja mu tshilota bua kabapinganyi kudi Erode kabidi to. Nanku kupinganabu kuabu mu njila mukuabu.
Badi baya kusokomena ne Yezu mu Ejipitu
13Bena meji bamane kumuka, ke mutumibue wa Maweja-Nangila kumuenekela Yozefe mu tshilota, umuambila ne:
— Juka, angata muana ne mamuende, uye kusokomena nabu mu Ejipitu. Ushalemu too ne pangakuambila bua wewe kupingana. Bualu Erode neakebe muana bua kumushipa.
14Nanku Yozefe kujuka, kuangata muana ne mamuende, kuya nabu butuku mu Ejipitu. 15Yozefe kushala mu Ejipitu too ne pakafua Erode. Bionsu ebi bivua bienzeka bua kukumbaja bivua Maweja-Nangila muakule mukana mua muambi ne: “Mvua mubikile muananyi wa balume bua kumukaye mu Ejipitu.#2.15 Osh 11.1.”
Badi bashipa bana
16Erode kujingulula ne: bena meji mbanshime, kufikaye munda bikole. Kutumaye diyi bua bashipe bana ba balume bonsu ba mu Betleyeme, ne ba mu misoku ivua pabuipi. Bana aba bavua ne bidimu bibidi anyi bishadile, bilondeshile tshikondu tshivua bena meji bamujadikile bua dimueneka dia mutotu. 17Nanku meyi avua muambi Yirmeya muakule kukumbanawu. Uvua muambe ne:
18“Bantu kumvua mbila mikole,
miyenga ne miadi, ku Rama.
Rakele ke udi udila bana bende,
kena musue bua bamusambe,
bualu bana bende kabatshienaku.#2.18 Yirm 31.15.”
Badi bumuka ne Yezu mu Ejipitu
19Erode mumane kufua, mutumibue wa Maweja-Nangila kumuenekela Yozefe mu tshilota mu Ejipitu, 20umuambila ne:
— Juka, angata muana ne mamuende, upingane nabu mu ditunga dia bena Izrayele. Bualu bantu bavua bakeba kushipa muana mbamane kufua.
21Nanku Yozefe kujuka, kuangata muana ne mamuende, kupingana nabu mu ditunga dia bena Izrayele. 22Kadi Yozefe kumvua lumu ne: Arkelawuse#2.22 Arkelawuse: uvua muana wa Erode munene. Uvua mupingane tatuende ku bumfumu biangatshile ku tshidimu tshia 4 bgbg ne Y.K., too ne ku tshia 6 k.k. Y.K. mmushale mukalenga wa ditunga dia Yudeya, mupingane tatuende Erode. Nanku Yozefe kumvua bowa bua kuya kusomba mu Yudeya. Mumane kumvua mu tshilota tshivuaye ne bua kuenza, kuyaye mu buloba bua Ngalileya. 23Kusombaye mu tshimenga tshiyuabu binyika ne: Nazarete. Bionsu ebi bivua bienzeka bua kukumbaja diyi divua bambi bamba ne: “Nebamuinyike ne: mmuena Nazarete.#2.23 mmuena Nazarete: ke muvuabu binyike Yezu (tangila Mat 21.11), ne bena Kristu ba kumpala (tangila MM 24.5). — Katuena bamanye muambi uvua muambe miaku ayi.”
Currently Selected:
Matayi 2: TSH96
Highlight
Share
Copy
Want to have your highlights saved across all your devices? Sign up or sign in
Bible avec Livres Deutérocanoniques en Tshiluba © Société Biblique de la R. D. Congo, 1996