Mikenji ya bena Levi 18
18
Nunemeke buena nzubu
1Maweja-Nangila kuambila Moshe bua 2amanyishe bena Izrayele ne:
“Ndi Maweja-Nangila Mvidi Mukulu wenu! 3Kanulondi bibidilu bia bena ditunga dia Ejipitu dinuvua basombe, nansha bia bena ditunga dia Kenaane dindi nnupesha.#18.3 Bena Ejipitu bavua baselangana ne balela babu (18.6). — Kenaane: dina edi mu tshioyu tshia kale didi diumvuija buendenda bubi (18.27; Tshib 19.4-9). Kanulondi dikasa dia bantu aba to. 4Kadi nulame meyi ne mikenji yanyi, bualu meme ndi Maweja-Nangila Mvidi Mukulu wenu.
5“Nulame mikenji yanyi ne meyi anyi. Muntu udi ubikumbaja, nebimupeteshe muoyi.#18.5 Tangila Neh 9.29; Yez 18.9; 20.11-13; Luk 10.28; Rom 10.5; Ngal 3.12. Bualu ndi Maweja-Nangila.
6“Meme Maweja-Nangila, ndi ngamba ne: muntu wa kunudi nansha umue, kena mua kubuelela mukaji wa mulela wende mu nzubu.
7“Kuena ne bua kubuelela mamuebe mu nzubu to, kufuisha tatuebe bundu. Udi ufuisha ne mamuebe bundu, bualu udi muledi webe.
8“Kuena ne bua kubuelela mukaji mukuabu wa tatuebe#18.8 Tangila 20.11; Tshib 35.22; Diel 23.1; 27.20; 1 Kor 5.1. mu nzubu to, bualu udi ufuisha tatuebe bundu.
9“Kuena ne bua kubuelela muanenu wa bakaji wa tatuebe nansha wa mamuebe mu nzubu to, nansha bobu kabayi bamukoleshila mu diku dienu.#18.9 Tangila 20.17; Diel 27.22; 2 Sam 13.11-14; Yez 22.11.
10“Kuena ne bua kubuelela muikuluebe wa muanebe wa balume nansha wa muanebe wa bakaji mu nzubu to, bualu udi udiluisha amu bundu nkayebe.
11“Kuena ne bua kubuelela muana wa bakaji wa mukaji wa tatuebe mu nzubu to, bualu mmuana wa tatuebe,#18.11 Muana wa mu diku dia tatuebe, nansha muana wa bakaji wa tatuebe. kabidi mmuanenu.
12“Kuena ne bua kubuelela tatuebe mukaji mu nzubu to, bualu mmuanabu ne tatuebe.
13“Kuena ne bua kubuelela mamuebe mukuabu mu nzubu to, bualu udi muanabu ne mamuebe.
14“Kuena ne bua kubuelela mukaji wa tatuebe mukuabu mu nzubu to, kufuisha tatuebe mukuabu bundu, bualu ke mukajende.#18.14 Tun. 12-14: tangila 20.19-20.
15“Kuena ne bua kubuelela mukaji wa muanebe mu nzubu to, bualu mmukaji wa muanebe.#18.15 Tangila 20.12; Tshib 38.16,26; Yez 22.11.
16“Kuena ne bua kubuelela mukaji#18.16 Tangila 20.21; Mat 14.3-12; fuanyikija ne Diel 25.5-10; Mat 22.23-33. wa muanenu mu nzubu to, bualu udi umuluisha bundu.
17“Kuena ne bua kubuelela mukaji mu nzubu, kubuelela kabidi muanende wa bakaji, nansha muikuluende, muana wa bakaji wa muanende wa balume nansha wa muanende wa bakaji. Bia nanku mbuenzavi,#18.17 Tangila 20.14; Diel 27.23. bualu badi bantu bamue.
18“Kuena ne bua kusela bukonde buebe, patshidi mukajebe ne muoyi to. Bia nanku nebikebeshe mikawu mu lubanza.
19“Kuena ne bua kubuelela mukaji mu nzubu, patshidiye ku tshijila tshia bakaji to, bualu utshidi mupie mikiya.#18.19 Tangila 15.24; 20.18; Yez 22.10.
20“Kuena ne bua kubuelela mukaji wa bana benu mu nzubu to, bualu udi upia mikiya.#18.20 Tangila 20.10; Tshim 20.14; Diel 5.18; 2 Sam 11.2-4; Yez 22.11. 21“Kuena ne bua kulambula bana bebe kudi mvidie wa Moleke#18.21 Moleke: udi mvidie wa bantu ba bisamba bikuabu. Mu ebrewu dina edi didi diumvuija musangu umue muanzu wa “mukalenga”, ne muaku “bundu”. — Tangila 20.2-5; Diel 12.31; 2 Bak 17.17; Yirm 7.31; Mis 106.37-38. to, bualu udi upepeja dina dianyi. Meme ndi Maweja-Nangila Mvidi Mukulu wenu.
22“Kuena ne bua kubuelela mulume nebe mu nzubu, bu mudibu babuelela mukaji to. Nngenzelu mubi udibu bakandika kashidi.#18.22 Tangila 20.13; Tshib 19.5; Bal 19.22; Rom 1.27.
23“Kuena ne bua kulala ne nyama to, bualu neupie mikiya. Kabidi muntu mukaji kena mua kulala ne nyama to. Muntu muenze nanku, udi unyanga mikenji.#18.23 Tangila 20.15-16; Tshim 22.18; Diel 27.21.
24“Kanuena ne bua kupia mikiya ku ngenzelu ya nanku to. Bualu bisamba bindi ngipata kumpala kuenu ebi, mbipie mikiya anu ku ngenzelu ya bundu ya mushindu ewu. 25Nenku ditunga kabidi divua dimane kupia mikiya. Ke mumvua mudinyoke. Dikadi dibenga benadi.
26“Kadi nuenu bena Izrayele too ne benyi badi munkatshi muenu, nulonde mikenji yanyi ne meyi anyi bindi nnupesha. Kanuenji malu mabi aa to. 27Bualu bantu bavua badianjila kusomba mu ditunga edi, bavua benza buenzayi ebu, ditunga kupia mikiya. 28Nenku nuenu bena Izrayele, kanuena mua kupisha kabidi ditunga mikiya nansha. Bualu ditunga didi mua kunubenga, bu muvuadi dibenga bantu bavua badianjila kuasamu. 29Nanku bantu bonsu badi benza malu mabi a nenku, nebabipate mu bena Izrayele.
30“Nenku Meme Maweja-Nangila Mvidi Mukulu wenu, ndi ngamba ne: ‘Nutumikile mikenji yanyi, anu bu mundi munupayi. Kanuenji malu mabi, avuabu benza kudi bantu bavua badianjile kuasa mu ditunga edi. Nudilame bua kanupi mikiya.’ ”
Currently Selected:
Mikenji ya bena Levi 18: TSH96
Highlight
Copy
Compare
Share
Want to have your highlights saved across all your devices? Sign up or sign in
Bible avec Livres Deutérocanoniques en Tshiluba © Société Biblique de la R. D. Congo, 1996
