Tshimuangi Diumvuija
Diumvuija
— “Ndi Maweja-Nangila, Mvidi Mukulu webe. Ndi mukupatule mu Ejipitu muuvua ku bupika.” Ke kanungu kanene ka mu mukanda wa TSHIMUANGI (20.2) kadi katumvuija dina dia mukanda ne bualu bunene budiwu utulongesha ne: Mvidi Mukulu udi upikula bantu bende. Kanungu aka kadi kabidi tshitaku (nshindamenu) tshia “Mikenji dikumi:” Mvidi Mukulu uvua mupikule bena Izrayele, bualu udi ubananga, udi musue bua bana bende aba bamuleje dimunanga diabu pa kutumikila mikenji yende.
Bena Izrayele bavua bapete muaba muimpe wa kusomba mu Ejipitu (Tshib 45.17-20; 47.11). Kadi bu mudibu benda bavulangana bungi bupite, mukalenga wa ditunga kubenza bapika. Mvidi Mukulu kavua mulengulule makenga avua bantu bende nawu to. Kusungulaye umue wa kudibu, Moshe, bua abalombole. Mvidi Mukulu kuenza kabidi malu mavule a kukema. Ke pavua bena Ejipitu ne bua kuitaba bua bena Izrayele bapatuke mu bupika, bumuke ne mu ditunga diabu (1.1—15.21). Padibu bapitshila mu tshipela tshia Sinayi, Mvidi Mukulu udi amu ubaludika, ubalama (15.22—18.27). Mvidi Mukulu udi ubenza kabidi bantu bende pa kutua nabu ndondu pa mukuna wa Sinayi, kabidi pa kubamanyisha Mikenji yende (19.1—24.18). Pashishe badi bamanyisha Moshe mudiye mua kuasa muaba wa tshijila (tshit. 25 too ne ku tshit. 31). Kadi bena Izrayele badi badienzela wabu mvidie pa kufula lupingu lua kana ka ngombe. Ke mudi Mvidi Mukulu ne bua kubanyoka bikole (tshit. 32 too ne ku tshit. 34). Ku ndekelu kua mukanda badi batulondela mudibu bibaka muaba wa tshijila, muaba udi Mvidi Mukulu usomba, udileja mudiye ne bukole (tshit. 35 too ne ku tshit. 40).
Miaba yonsu ne mu bikondu bionsu, bantu bavua babueja bantu nabu mu bupika. Kadi mukanda ewu udi utuleja mudi Mvidi Mukulu nkayende mua kutupikula menemene, bua tumone mua kuenza nende tshintu tshimue, kumvuangana kabidi ne bana betu bonsu.
Currently Selected:
Tshimuangi Diumvuija: TSH96
Highlight
Copy
Compare
Share
Want to have your highlights saved across all your devices? Sign up or sign in
Bible avec Livres Deutérocanoniques en Tshiluba © Société Biblique de la R. D. Congo, 1996