Tshimuangi 1
1
MVIDI MUKULU UDI UPATULA BENA IZRAYELE MU EJIPITU
Bena Izrayele badi mu bupika mu Ejipitu
1Bana ba balume ba Izrayele#1.1 Izrayele: ke dina dikuabu dia Yakobe (tangila Tshib 32.29). Tshisamba tshia ndelanganyi ya Yakobe tshivua tshipeta dina dikuabu dia nkambua wabu adi: bena Izrayele. — Fuanyikija tun. 1-4 ne Tshib 46.8-27. bavuaye mufike nabu mu Ejipitu, muana yonsu ne bena diku diende, badi nunku: 2Rubene, Shimeyone, Levi, Yuda, 3Isakare, Zebulone, Binyamine, 4Dane, Naftali, Ngade ne Ashere. 5Ndelanganyi ya Yakobe yonsu ivua bantu makumi muanda mutekete.#1.5 Mu mikanda mikuabu ya kale badi bafunde ne: bantu makumi muanda mutekete ne batanu: ke mudibu bafunde kabidi mu MM 7.14 (tangila Tshib 46.27 ne diumvuija). Amu Yozefe uvua mumane kudianjila mu Ejipitu. 6Kadi Yozefe ne bana babu bonsu bavua Yakobe mubuele nabu mu Ejipitu kufuabu. 7Pashishe ndelanganyi ya bena Izrayele kutanta, kuvulangana#1.7 Tangila MM 7.17. kupita bungi mu Ejipitu. Kushalabu bantu ba bukole.
8Mukalenga mupiamupia,#1.8 Mukalenga ewu udi mua kuikala Ramsese muibidi (mu 1304—1238 kumpala kua diledibua dia Yezu Kristu). Uvua muashi munene wa nzubu mivule. Fuanyikija kanungu aka ne MM 7.18. uvua kayi mumanye Yozefe, kudia bukalenga mu Ejipitu. 9Mukalenga kuambila bantu bende ne:
— Bena Izrayele aba mbapite bungi, kabidi mbantu ba bukole. 10Nanku, tukebayi mushindu wa kubapumbisha bua kabavudianganyi to. Tshianana pafika bena mvita, badi mua kudisanga ne bena lukuna betu bua kutuluisha, pashishe kumuka mu ditunga.#1.10 kumuka mu ditunga: badi mua kuandamuna kabidi ne: kudia bukalenga bua ditunga.
11Bena Ejipitu kusungula bamfumu ba mudimu bavua ne bua kuenzeja bena Izrayele mudimu mukole bua kubatekesha. Bena Izrayele kuashila Mukalenga wa bena Ejipitu tshimenga tshia Pitome ne tshia Ramsese#1.11 tshimenga tshia Pitome ne tshia Ramsese: kabena bamanye muaba uvuabi. Bumue bivua muaba udi Nile ubuela mu Mayi manene a pankatshi luseke ludi diba dipatukila. bua balaminemu bintu biende. 12Kadi pa wabu bakengesha bena Izrayele nanku, bavua amu bavulangana mu ditunga dijima. Bena Ejipitu bamona nanku, kutshinabu bena Izrayele bikole. 13Kubenzejabu mudimu wa bupika ne tshikisu tshipite bukole. 14Bena Izrayele kusopa buloba kuenza madiotu, kudimina bena Ejipitu madimi. Mu tshikosu, bena Ejipitu kubenzeja midimu ya mishindu yonsu ne tshikisu.
Mukalenga wa bena Ejipitu udi ukengesha bena Izrayele
15Mukalenga wa bena Ejipitu kuambila Shifra ne Puwa, baleleshi ba bena Ebrewu ne:
16— Panudi nulelesha bakaji ba bena Ebrewu, nutangile bimpe mushindu udi muana. Pikalaye wa balume numushipe, pikalaye wa bakaji numulekele ne muoyi.
17Kadi baleleshi bavua batshina Mvidi Mukulu. Nanku kubengabu diyi dia mukalenga wa bena Ejipitu. Kulekelabu bana ba balume ne muoyi. 18Ke mukalenga wa bena Ejipitu kubabikila, ubakonka ne:
— Nudi benze nenku bualu kayi? Nudi balekela bana ba balume ne muoyi bua tshinyi?
19Baleleshi kuandamuna ne:
— Bakaji ba bena Ebrewu badi ne bukole bua bungi, bapite ba bena Ejipitu. Badi badilelela nkayabu, katuyi banji kufika.
20Nanku bena Izrayele kuvulangana, kushala bantu bakole. Mvidi Mukulu kusankisha baleleshi abu, 21kubapesha bana ba bungi, bualu bavua bamutshina. 22Kadi mukalenga wa bena Ejipitu, kuambila bantu bende bonsu ne:
— Muana wa balume yonsu udi bena Izrayele balele, numuele mu musulu wa Nile. Nulekele anu bana ba bakaji ne muoyi.#1.22 Tangila MM 7.19.
Currently Selected:
Tshimuangi 1: TSH96
Highlight
Copy
Compare
Share
Want to have your highlights saved across all your devices? Sign up or sign in
Bible avec Livres Deutérocanoniques en Tshiluba © Société Biblique de la R. D. Congo, 1996
